Jeremia 23

Gen pi anyim pa jo Icrael ma gudong

1Can iwi lukwat ma gineko dok ma gikeyo romi ki i oleta! 2Ma omiyo Rwot Lubanga pa Icrael tye kawaco lok bot lukwat ma gigwoko jone ni, “Wun dong wukeyo romina woko, ci wuryemogi gucito woko, ento pe wubedo kagwokogi wa ki acel. Pimeno abiketo cwinya me keto can ikomwu pi gin marac ma wutimo. 3Lacen abicoko romina ma gudong woko liweng ki i lobo ducu kama yam aryemogi gucito iye, abidwokogi cen kany aketogi i dwolgi, ci gibinywal ginya matek. 4Abiketo lukwat ma bigwokogi, man miyo dong pe gibibedo ki lworo mo, dok cwinygi bene pe bibale, ki mo ma birwenyo bene bibedo peke, man an Rwot ma awaco. 51

Nen, kare tye kabino ma abiketo iye lakwar Daudi kikome me bedo rwot. En bibedo jang yat ma bilot ki kit ma atir, ma biloyo loc ki ryeko, dok bitiyo gin matye atir dok kakare i lobo man. 6Ikare ma nongo en tye rwot, jo Juda gibibedo mot labongo lworo mo, ki jo Icrael bene dong gibibedo ki kuc. Kibilwongo rwot meno ki nying ni, ‘Rwot aye ma miyowa kit ma atir.’

7Pimeno wunen, kare tye kabino ma pe dok ngat mo bikwonge i nyinga kun giwaco ni, ‘I nying Rwot ma en aye okwanyo wan jo Icrael okelowa woko ki i lobo Ejipt.’ 8Ento wubikwonge ni, ‘Macalo Rwot tye kwoni, ma okelo jo Icrael woko ki i lobo ma yo tung kumalo, dok ki i lobo ducu kama yam en oryemogi gucito iye.’ Pien abikwanyogi adwokogi cen i lobogi kikome mayam amiyo bot kwarigi.”

Lok ma Jeremia otito ikom lunebi ma lugoba

9Cwinya obale woko omiyo koma ducu tye ka myel amyela.

Man otime pi Rwot,

kun bene lubu lok mere maleng;

atye dong calo dano ma omer ki kongo,

dano ma omato kongo bwino madwong.

10Pien lobo dong opong ki jo ma giworo lubanga atagu;

gibedo ki kit kwo marac dok bene gitiyo ki tekogi i yo marac.

Lobo tye ka kumu pien Rwot dong oceno woko,

ki oletgu bene dong gutwo woko.

11Rwot owaco ni,

“Lunebi kacel ki ajwaki pe giwora;

anongogi ma gitye katimo gin marac i Ot pa Lubanga kikome.

12Pimeno yo ma gilubu, yone bibedo pwot dok col;

abimiyo giyoke ci gipoto.

Abimiyo gin marac poto ikomgi;

kare me keto can ikomgi tye kabino.

13Dong atyeko neno bal pa lunebi me Camaria:

gubedo katito lok i nying Baal,

ci gutelo jona jo Icrael,

gumiyo gungak gubwota woko. 142

Ento aneno lunebi ma i Jerucalem dok gitimo gin makelo lworo mukato kare:

gitimo abor dok giloko lok goba;

gikonyo lutim gin marac weko gimede ki timo gin marac,

pi lok meno, miyo dano pe giloke me weko timo bal.

Gin ducu gudoko calo Codom ki tung bota,

ma girac adada calo jo Gomora.”

15Piman an Rwot me mony awaco lok ma kemo lunebi kuman ni,

“Nen, abimiyo gimato yat roka,

abimiyo bene gimato pii ma kiketo iye kwir;

pien gunyayo kit me woro jogi gumiyo oromo i lobo woko ducu.”

16Rwot me mony owaco kuman bot jo Jerucalem ni, “Pe wuwiny lok ma lunebi gitito, pien gitye ka piko gen mogo me gobagoba ma pe konyo i iwu. Gitito botwu ginanyuta mogo ma gin gutamo atama ki wigi ken gi, ento nongo pe gin ma an Rwot aloko. 17Gin giwaco lok teretere bot jo ma gicayo lok pa Rwot ni, ‘Wubibedo maber labongo ayela mo’; gitito bene bot jo ma ngutgi nwang ma gitiyo gigi gin ma igi mito ni, ‘Can mo pe bipoto ikomwu wa ki acel.’”

18Ci an awaco ni, “Anga ikin lunebi magi mono ma dong ocung i coke pa Rwot, ma gunene dok ma guwinyo loke? Anga ikin gi ma owinyo loke ci olubu? 19Nen, akemo pa Rwot okati ocito woko calo yamo kot, calo yamo lapiru mager; ma bimwoc woko iwi lutim maracu. 20Kiniga pa Rwot pe bigik nio wang ma Rwot otiyo dok ocobo gin ma en oketo i tame. Inino ma pud tye anyim wubiniang iye maber adada.”

21Rwot owaco kuman ni, “An gira onongo pe aoro lunebi magi, ento gin guringo aringa oyotoyot ki kwenagi. Pe aloko botgi bene lok mo, ento gubedo katito lok i nyinga. 22Ka nene gucung i cokena, kono nene gutito lok ma mera bot jona, kono guloko jona ki ikit kwo marac ma onongo gitye iyeni, kono jona guloke guweko timo gin marac.

23An Lubanga ma atye i kabedo ducu, ento pe i kabedo ni keken 24Petye dano mo matwero kane woko i kabedo mo matye i mung ma pe atwero nene. Pe an aye ma apongo polo ki lobo? 25Dong atyeko winyo lok ma lunebi guwaco ma gitito lok goba ki nyinga, kun giwaco ni, ‘Aleko lek, aleko lek!’ 26Lunebi magi gibikano goba i cwinygi ma gitito lok gobagoba me bwola ma giparo ki i cwinygi ken gi pi kare marom mene? 27Gin gitamo ni lekgi ma gititoni bimiyo wi jona wil woko ikoma, kit macalo kwarigi yam wigi owil woko ikoma ci guloke gudok ka woro jok Baal. 28Lanebi ma oleko lek myero otit leke, ento lanebi ma dong owinyo lok myero otit lok meno ki ada. Anga matwero poro reng ngano ki ngano kikome mono? 29Loka obedo calo mac dok calo nyol ma tyero gweng woko matinotino. 30Pimeno, nen, atye ki lok ikom lunebi ma gikwalo lok ki bot luwotgi ki ikin gi keken gi ka gitito kun giwaco ni gitito loka. 31Dok bene atye ki lok ikom lunebi ma gitito gigi lokgi, kun giwaco ni, ‘Man Rwot ma owaco.’ 32Dok atye ki lok ikom lunebi ma gitito lekgi ma opong ki goba kekeni, ma gitito lekgini ci gitelo jona miyo gingak gibwota woko pi gobagi ki kitgi me nyate, ma kun nongo pe acwalogi dok bene nongo pe acikogi ni guciti; pe gitye ki kit kony mo wa ki acel bot lwak man.”

Atwom pa Rwot

33Ci Rwot owaca ni, “Jeremia, ka ngat mo ikin jona, nyo kadi lanebi nyo ajwaka, openyi ni, ‘Atwom pa Rwot mono en gin ango?’ Ci ibidok iye ni, ‘Wun aye atwom bot Rwot, pimeno en bikwanyowu bolowu woko matwal, man Rwot ma owaco.’ 34Kace inen lanebi kadi ki ajwaka, nyo ngat mo acel ikom lwak man ma biwaco ni, ‘Atwom pa Rwot,’ an abiketo can ikom dano meno ki jo ma i ode ducu. 35Ma ka waco lok meno, myero ngat man openy lawote nyo omine ni, ‘Rwot mono dong odok iye ningo, nyo ni, Rwot mono oloko gin ango?’ 36Ento lok man ni ‘Atwom pa Rwot’ pe dong wubiloko matwal, pien atwom ma wuloko pireni en aye obedo lok pa dano acel acel ma en waco pire kene; pimeno wudwalo loka woko, an Lubanga makwo, ma an aye a Rwot me mony dok Lubangawu. 37Dong in Jeremia, peny lunebini ni, ‘Gin ango dong ma Rwot odok iye ki wun?’ Nyo ni, ‘Rwot oloko gin ango?’ 38Ento ka guwaco ni, ‘Atwom pa Rwot,’ ci itit botgi ni pien guwaco lok man, kun onongo acikogi woko matek ni pe gulok lok man, 39pimeno, adada abikwanyogi atingogi malo ci abologi woko cen ki inyima, gin kacel ki taun madit mayam amiyo botgi ki bot kwarigi. 40Dong abikelo lewic marac ki cac ma bedo nakanaka aketo ikomgi, ma wi dano pe biwil iye matwal.”