Jeremia 24

Aduku ma opong ki nyig oduru

11

Rwot onyuta aduku aryo ma opong ki nyig oduru ma kiketo inyim Ot pa Lubanga. (Man otime lacen inge kare ma Nebukadnejar rwot me Babilon otero kwede Yekonia wod pa Yekoyakim rwot me Juda me bedo opii, kun okwanyo ki i Jerucalem kacel ki lutela me Juda, ludito tic mapatpat kacel ki lutet ducu ci oterogi i Babilon.) 2Aduku acel onongo opong ki nyig oduru mabeco, ma gukwongo ceke; ento aduku mukeneni onongo opong mere ki nyig oduru maracu keken, girac adada ma dano pe twero camone. 3Cutcut Rwot owaca ni, “Jeremia, ineno ango?” Ci adok iye ni, “Aneno oduru, oduru mabeconeni gibeco adada, ki oduru maracuneni giracu adada ma pe kitwero camone.”

4Rwot dok owaco bota ni, 5“An Rwot Lubanga pa Icrael, atamo ni jo ma acwalo woko i lobo pa jo Kaldaya ni gubedo calo nyig oduru mabeco adadani, an abitic kwedgi kun kica maka ikomgi. 6Abibedo ka gwokogi maber ci akelogi adwokogi cen i lobo man. Abigerogi calo ot ci gibicung matek, ma pe abimukugi aretogi woko piny; abipitogi calo ginapita, ento pe abiputugi woko. 7Abimiyo gibedo ki miti i cwinygi me ngeyo ni an aye a Rwot. Lacen dong gibibedo jona, ki an bene abibedo Lubangagi, pien dong gibiloke gidwogo bota woko ki cwinygi ducu.

8Ento an Rwot awaco kuman ni, Jedekia rwot me Juda, kacel ki rwodine, ki jo Jerucalem ma gudong gubedo i lobo man, ki jo mukene ma gucito gubedo i lobo Ejipt, an Rwot abiterogi kit macalo atero kwede ki nyig oduru maracu tutwali ma pe kitwero camogini. 9Abikelo can marac kitmeno aketo ikomgi ma bimiyo rok ducu gibedo ki lworo. Dano bicayogi, ci gibidoko lok aboka, kun dano giloko lok agec ikomgi dok gibitic ki nyinggi macalo lok lacen dano i kabedo ducu ma abiryemogi gicito iye. 10Abimiyo kilwenyo ikomgi ki pala lucwan, abimiyo kec nekogi ki two gemo bene poto ikomgi, nio ka guto gutum woko ducu ki i lobo mayam amiyo botgi ki bot kwarigini.”