Jeremia 25

Lumerok ma gibia ki i lobo ma tung kumalo

11

I mwaka me angwen me loc pa Yekoyakim wod pa Yocia rwot me Juda, Rwot oloko kweda lok ma okemo jo Juda ducu. (Man aye obedo mwaka mukwongo me loc pa Nebukadnejar rwot me Babilon.) 2Ci awaco bot jo Juda ducu ki bot jo ducu ma bedo i Jerucalem ni, 3“Kombedi dong odoko mwaka pyere aryo wiye adek kulu, cake i mwaka me apar wiye adek me loc pa Yocia wod pa Amon rwot me Juda nio kwede wa onyo. Rwot oloko kweda dok an bene abedo ka titiwu loke teretere ma pe aling; ento wun pe wuketo cwinywu kawinyo loke. 4Wun pe wuwinyo dok pe wuciko itwu kawinyo loke, kadi bed Rwot obedo kacwalo lutice lunebi teretere botwu. 5Gin gutito botwu ni myero wuloke wuwek kitwu me timo gin marac, man bimiyo wubedo i lobo mayam Rwot omiyo wacon botwu ki bot kwariwu me bedo mewu matwal. 6Gin bene gutito botwu ni pe wuwor lubanga mukenegu dok pe wutii botgi bene. Dok bene pe myero wunget cwiny Rwot wek kiniga omake pi cal lubanga ma wutiyo ki cingwu. Ka onongo nene wulubu gin ma Rwot oloko, kono en nene pe oketo can ikomwu. 7Ento Rwot kikome owaco ni wun wukwero winyo loke, ma ka meno, wungeto cwinye wumiyo kiniga omake pi cal lubanga ma wutiyo atiya ki cingwuni, ma omiyo wun aye ma wukelo can me pwod ma opoto i komwuni kenwu.

8Pimeno, kit macalo wukwero winyo lokeni, omiyo Rwot me mony owaco kuman ni, 9‘Abicwalo rok ducu ma gibedo i lobo matye yo tung kumaloni ki latica Nebukadnejar rwot me Babilon ikomwu. Abikelo lwak me rok ducu me lweny ikom rok man ki jone ducu, ki ikom rok ducu ma orumugi dyere. Ci abinekogi atyekogi woko liweng; abimiyo lworo mako dano kun gijwat pi gangi ma odong obur, man bibedo macalo lok me cac matwal. 102Dok bene abijuku dwon me wo me yomcwiny madwong woko ki botgi, dwon nyako ger ki dwon lanyom, ki mor pa kidi rego, kun aneko mac taragi woko bene. 113Lobo man ducu bidoko obur ma iye bidong nono, dok bene rok ma orumugini gibibedo ite loc pa Nebukadnejar rwot me Babilon pi mwaka pyere abiro kulu. 12Lacen ka mwaka pyere abiro dong otum, abiketo can ikom rwot me Babilon ki ikom lobone pi balgi. Ci abibalo lobogi woko wek odong obur matwal. 13Abiketo can ikom rok meno ki gin ducu ma dong atyeko wacone, ki gin ducu ma kicoyo i buk man, ki gin ducu ma Jeremia oloko mukemo rok magi ducu. 14Rok mapol ki luker mapol gibiloko jo Babilon gidoko opii, ci dong abiculugi kun lubu gin ma gutimo.’”

Ngolo kop pa Lubanga ikom rok ducu

15Rwot Lubanga pa Icrael owaco bota ni, “Ene, gam kikopo kongo bwino ma opong ki akemona. Gam ci imii jo me rok ducu kama abicwali iye gumati. 16Ka dong gumato, ci gibicato ki wot dok bene gibibedo maming i tamgi pi lweny ma abicwalo ikomgini.”

17Kitmeno agamo kikopo ki i cing Rwot, ci amiyo jo me rok ducu kama Rwot ocwala iye gumato. 18Jerucalem ki taun ducu me Juda, kacel ki lukergi ki rwodigi ducu gumato; pimeno lobogi dong bidoko tim aroo ma iye bidong nono, bimiyo dano gijwat kun giuru, miyo dano gibitic ki nyinggi macalo lok lacen dano kit macalo tye kwede wa onyoni. 19Jo mukene bene ma gibimato akemo pa Rwot gin ene:

Parao rwot me Ejipt ki lutice, rwodine, kacel ki lwake ducu; 20ki jo me rok mukene ducu ma gibibedo ikin gi; luker ducu me lobo Uj ki luker ducu me lobo Piliciti (Acikelon ki Gaja, Ekron, ki jo Acidod ducu ma gudong); 21ki jo ducu me Edom, Moab, ki jo Ammon. 22Luker ducu me Turo, luker ducu me Cidon, ki luker me lobo matye i dog nam. 23Jo ducu me taun me Dedan, Tema, ki Buj; jo ducu ma ginyaro yer wigi dong macego; 24luker me Arabia ducu ki luker me kaka mapatpat ma gurube aruba ma gibedo i tim aroo; 25luker ducu me Jimri, Elam, ki Media. 26Luker ducu me lobo yo matye tung kumalo, jo ma bedo kamabor ki jo ma bedo kamacok, kun gin ducu gilube aluba kikore. Rok ducu matye iwi lobo bene myero gumati. Ka me agikine dong rwot me Babilon bimato.

27Lacen Rwot owaca ni atit botgi ni Rwot me mony, Lubanga pa Icrael, waco kuman ni, “Wumat akemona nio wang ma wumer dok wungok, nio ka wupoto piny ma pe dong wutwero a malo pi lweny ma abicwalo ikomwuni.”

28En dok owaca ni, “Kace gukwero gamo kikopo ki i cingi wek pe gimat akemona, ci itit botgi ni, ‘Rwot me mony owaco ni myero wumati.’ 29Pien nen, dong abicako timo gin marac ikom taun madit ma kilwongo ki nyingani. Gin ada gitamoni gibibwot ma pe aketo can ikomgi? Pe kumeno, ento abiketo can ikomgi, pien abicwalo lweny ikom jo ducu ma gibedo iwi lobo. Man an Rwot me mony kikoma aye ma awaco.

30Piman in Jeremia, myero itit lok magi ducu ma an awacini. Myero i tit bot jo magi ni,

‘Rwot bimoro dwone ki i polo,

en bilok bene ki i kabedone maleng.

En bimoro dwone matek adada ikom jone;

en bidange calo dano matye kanyono olok.

Pimeno jo ducu ma gibedo iwi lobo gibiwinyo loke.

31Mor dwone biwinye wa i agiki piny,

pien Rwot tye ki pido ikom rok ducu.

En bingolokop ikom jo ducu,

ci bimiyo kineko jo maracu woko ki pala lucwan.

Man an Rwot ma awaco.’”

32Rwot me mony owaco ni can tye kabino ikom rok ducu ki acel acel kun lubugi kore kikore, ki yamo lapiru mager tye kakodo kun a ki i agiki piny. 33Inino meno kom jo ma Rwot onekogi kibikeyo woko ata i but lobo ducu. Pe kibikumu pirgi, pe kibicokogi, pe bene kibiyikogi. Komgi birade i ngom lirat macalo cet dyang ma guket ata.

34Wukok, kun wudange, wun lukwat,

wungene i buru wun lukwat ma wukwayo jone,

pien kare dong oromo me nekowu, en kare me ketowu woko ata.

Kibingolo ngutwu calo kingolo ngut nyogi romi mucwe.

35Kabedo mo ma lukwat giringo gilaro iye pe bidong,

kadi ki kabwot mo ma lutela pa jone gibibwot iye pe bidong.

36Wuwiny koko pa lukwat,

wuwiny bene ka lutela pa jone gikok!

Pien Rwot tye ka balo kakwat woko ki kiniga,

37oweko dwol romine ma onongo tye ki kuci odong obur.

38Rwot dong otenyo jone woko calo

labwor ma oweko borone,

pien lobogi dong iye odong nono

pi pala lucwan pa jo ma giunu dano,

ki pi kiniga mager pa Rwot.