Jeremia 26

Kipido ki Jeremia

11

Cutcut inge kare ma Yekoyakim wod pa Yocia odoko rwot me Juda, Rwot owaco lok man bota ni, 2“Cung i dyekal me Ot pa Rwot, dok iwac lok bot jo ducu me Juda ma gibino ka woro Lubanga i Ot pa Rwot. Tit botgi lok ducu ma dong aciki me lokone; pe ikan lok mo iwek odong. 3Gwok nyo gibiwinyo lok man, ci miyo dano acel acel loke weko yone marac, wek an alok tama pi gin marac ma onongo ayubu ni abitimo ikomgi pi gin marac ma gin gubedo katimoneni.”

4Ci Rwot dok owaca ni awac botgi kuman ni, “Kace pe wubiwinyo loka, kun wulubu cika ma amiyo botwu, 5ki ka pe wubiwinyo lok pa lutica lunebi ma acwalogi me bino botwu pi oyotoyot, kadi bed pe wuketo cwinywu ka winya, 62ci dong abibalo Ot man woko kit macalo yam atimo ikom Cilo, dok abimiyo rok ducu ma gibedo iwi lobo gitiyo ki nying taun madit man me ceno dano.”

7Ajwaki ki lunebi ki lwak ducu guwinyo ka awaco lok magi i Ot pa Rwot. 8Ka dong atyeko loko lok ma Rwot ocika me loko bot lwak ducu, ki bot ajwaki ki lunebi, ci lwak ducu gumaka woko liking, kun giwaca ni, “Myero ito woko! 9Pingo kono itito lok ki nying Rwot, kun iwaco ni, ‘Ot man bidoko calo Cilo, ki taun madit man bene bidoko wi obur, bidong nono labongo dano mo ma bedo iye?’” Ci lwak ducu gucoke guruma woko dyere i Ot pa Rwot.

10Ka rwodi me Juda guwinyo lok magi, ci gua ki i Ot pa rwot gucito gubedo i kabedogi inget Doggang Manyen ma gidonyo kwede i Ot pa Rwot. 11Ci ajwaki ki lunebi guwaco bot rwodi kacel ki lwak ni, “Dano man myero kingol kop me to iwiye, pien oloko lok marac ikom taunwa madit, kit macalo wun bene wuwinyo ki itwuni.”

12Ci dok anwoyo loko lok bot rwodi kacel ki lwak ducu kun awaco ni, “Rwot oora me tito lok ikom Ot man ki ikom taun madit man, lok ducu ma wun dong wuwinyo atito botwuni. 13Pimeno kombedi myero wuyub kitwu ki gin ma wutimo, ci bene wulub lok ma Rwot Lubangawu owaco botwu, ci Rwot biloko tame ikom gin marac ma onongo en dong oyube me timone ikomwuni. 14Dong an mera atye ite twerowu. Wutii ikoma giwu gin ma wuneno ni ber dok tye atir. 15Lok acel keken ma amito wunge en aye ni, kace wuneka giwu, ci wubineko dano ma peke ki bal, dok bene alii me tona bibedo iwiwu ki ikom taun madit man ki jo ducu ma bedo iye, pien i adane Rwot oora botwu pi loko lok magi ducu wek wuwiny ki itwu.”

16Lacen rwodi kacel ki lwak ducu guwaco bot ajwaki ki lunebi ni, “Dano man pe myero kingol kop me to iwiye, pien en otito lok botwa ki nying Rwot Lubangawa.”

17Inge meno ludongo mogo ikin ludongo me lobo gua malo ci guwaco bot lwak ducu ma gucoke ni, 183“Mika ma en dano me Morecet yam otito lok ikare pa Kejekia rwot me Juda, ma owaco bot jo ducu ni Rwot me mony owaco kuman ni,

‘Kibipuru Cion woko macalo poto;

Jerucalem bidoko wi obur,

ki got ma kigero Ot pa Rwot iwiye bidoko bunga.’

19Rwot Kejekia kacel ki jo Juda pe guneko Mika. Ento Kejekia olworo Rwot ci oteme me tiyo gin maber ma Rwot pwoyo. Ci meno omiyo Rwot oloko tame ikom gin marac ma onongo en oyube me timone ikomgi. Ento kombedi wan dong wacok kelo can madit ikomwa kekenwa giwa.”

20(Tye dano mo mukene bene ma otito lok i nying Rwot, en aye Uria wod pa Cemaya me Kiriat-jearim. En otito lok ikom taun madit man ki rok man i lok marom ki pa Jeremiani. 21Ikare ma rwot Yekoyakim ki twoni lwenye ki rwodi ducu guwinyo loke, ci rwot oteme me wek kineke woko; ento ikare ma Uria owinyo lok man, ci lworo omake omiyo en olwi oringo woko i Ejipt. 22Ma omiyo rwot Yekoyakim ocwalo jo mogo kacel ki Elnatan wod pa Akbor ki jo mukene kacel kwede, oorogi me cito i Ejipt, 23ci gin gumako Uria wa ki i Ejipt gukelo bot rwot Yekoyakim ma oneke woko ci obolo kome i kabedo me yik kama kiyiko iye dano atagu.)

24Ento pien Akikam wod pa Capan ogwoka maber, omiyo pe kimiya icing lwak wek guneka woko.