Jeremia 27

Jeremia otweyo okol i ngute

11

Cutcut inge kare ma dong Jedekia wod pa Yocia odoko rwot me Juda, en aye Rwot oloko kweda, 2kun waca ni ayub del alir woko me tol kacel ki yat rii kweri dyang ci atwegi i nguta. 3Ka Rwot dok otita me cwalo lok bot luker me Edom, Moab, Ammon, Turo ki Cidon, kun wok ki bot lukwenagi ma gubino i Jerucalem kalimo Jedekia rwot me Juda. 4Rwot me mony, ma en Lubanga pa Icrael, otita ni acik lukwena magi me tito bot lukergi ni Rwot dong otyeko waco kuman ni, 5“An aye ma acweyo lobo ki twerona dok ki tekona, wa dano ki lee ducu ma gitye iwi lobo; dong atwero miyogi bot ngat mo keken ma ayero. 6Kombedi dong atyeko miyo lobo magi woko ducu i cing latica Nebukadnejar, rwot me Babilon, dok bene amiye wa lee tim ni gutii bote. 7Rok ducu bitic bote, gibitiyo bot wode ki bot lakware, nio ka kare biromo ma labone dong kibiloyo woko. Ka lacen dong roke bibedo opii, gibitiyo bot rok matego mapol ki luker madito.

8Kace inen rok mo nyo ker mo pe bitic bot Nebukadnejar rwot me Babilon, ma pe gibimine ite loc pa rwot me Babilon calo dyang matye ki okol i ngute, ci abiketo can ikom rok meno kun aneko jone woko ki pala lucwan i lweny, dok abimiyo kec nekogi, ki two gemo bene bipoto ikomgi, nio wang ma amiyo gutum woko ite twero pa Nebukadnejar. Man an Rwot ma awaco. 9Pimeno pe myero wuwiny lok pa lunebiwu, lutyet, lulek lek, lutyet ki ajaa ki lutalgu, ma gibedo ka waco botwu ni, ‘Pe wubidoko opii pa rwot me Babilon.’ 10Gin gitye ka bwolowu abwola, ma adwogine en aye ni abimiyo kikwanyowu woko ki i lobowu giterowu woko kamabor. Abiryemowu woko, ci wubito wutum woko ducu. 11Ento kace rok mo omiine kene ite loc pa rwot me Babilon kun tiyo bote, ci abiweko en dong bibedo i lobone, kun puru iye, dok bene bedo iye, man an Rwot ma awaco.”

12Ci awaco lakit lok acelu bot Jedekia rwot me Juda ni, “Wumiine kenwu ite loc pa rwot me Babilon. Wutii bote kacel ki bot lwake ci wubibedo kwo. 13Pingo i mito ni in kacel ki lutuwu kinekwu woko i lweny, nyo kec onekwu woko, ki two gemo bene opot ikomwu? Man aye gin ma Rwot dong otyeko wacone ma bitime ikom rok ma pe bimiine kene ite loc pa rwot me Babilon. 14Pe myero iwiny lok pa lunebi ma giwaco botwu ni pe wubitiyo bot rwot me Babilon. Gin gitye kabwolowu abwola. 15Rwot kikome owaco ni en gire pe eorogi, gin gitye kaloko lok goba botwu ki nyinge. Dong adwogine en aye ni en biryemowu woko ci wubito wutum woko, wun kacel ki lunebi ma giloko lok goba magi botwuni.”

16Ci awaco bot ajwaki kacel ki lwak ni Rwot owaco kuman ni, “Pe myero wuwiny lok pa lunebi ma gitito botwu ni jami ma gitiyo kwedgi i Ot pa Rwot dong cok kibidwokogi cen ki i Babilon. Lok meno ma gitye katitone botwuni obedo ka lok goba. 17Pe wuwiny lokgi; wutii mewu tic bot rwot me Babilon wek wubed kwo. Pingo omyero kibal taun madit man woko wek odok wi obur? 18Kace inen ni gin lunebi adada, dok kalok ma gititoni obedo lok pa Rwot, ci wek guleg Rwot me mony, ni wek pe oye kikwany jami ma kitiyo kwedgi i Ot pa Rwot ma gudong i Jerucalem ki i ot pa rwot me Juda, wek pe kitergi woko i Babilon.”

19Rwot me mony owaco lok kuman mukemo wirgu, nam, okar mac, ki mukemo jami mukene mayam kitiyo kwedgi i Ot pa Lubanga ma gudong i Jerucalem, 20mayam Nebukadnejar pe okwanyogi oterogi woko, ikare ma en omako Yekonia wod pa Yekoyakim rwot me Juda kacel ki ludito ducu me awora me Juda ki Jerucalem oterogi woko i opii i Babilon. Ci en owaco botgi ni, 21“Wuwiny gin ma an Rwot me mony, Lubanga pa Icrael, atye kawacone mukemo jami ma kitiyo kwedgi i Ot pa Rwot ma kiwekogi i Ot pa Rwot ki i ot pa rwot me Juda ki i Jerucalem. 22Kibikwanyogi kiterogi woko i Babilon nio wang ma an dok atamo pirgi. Ci abicokogi adwokogi cen aketogi kakargi i kabedo man.”