Jeremia 28

Jeremia gin ki lanebi Anania

11

I mwaka acelu, i dwe me abic me mwaka me angwen me loc pa Jedekia rwot me Juda, Anania wod pa Ajur, ma en lanebi ma tugi Gibeon, oloko kweda i Ot pa Rwot. En oloko kweda inyim ajwaki kacel ki lwak 2ni Rwot me mony, Lubanga pa Icrael owaco kuman ni, “Dong atyeko turu twero ki teko me loc pa rwot me Babilon woko. 3Ma nongo mwaka aryo peya otum, abikelo jami ducu mayam kitiyo kwedgi i Ot pa Rwot mayam Nebukadnejar rwot me Babilon okwanyo ki i Ot pa Lubanga otero woko i Babilon, ci adwokogi cen i kabedo man. 4Dok bene abikwanyo Yekonia wod pa Yekoyakim rwot me Juda, kacel ki jo Juda mayam kiterogi i opii i Babilon, ci abidwokogi cen i kabedo man. Pien dong abituru twero ki tek me loc pa rwot me Babilon woko. Man Rwot ma owaco.”

5Ka dok aloko ki lanebi Anania inyim ajwaki kacel ki inyim lwak ducu ma onongo gucung i Ot pa Rwot; 6ci awaco ni, “Amen! Ka Rwot bitimo man ci ber. Rwot myero omii lok ma ibedo ka titoneni obed ada, wek okwany jami ma kitiyo kwedgi i Ot pa Rwot kacel ki jo ma kiterogi i opii i Babilon odwokgi cen i kabedo man. 7Ento kombedi dong wuwiny lok ma awaco botwu ki bot lwak ducu. 8Lunebi ma gukwongo nyimwu ki nyima ikare macon adada, onongo gunyutu ni ikare me anyim lweny bibedo tye, kec bibedo tye, ki two gemo bipoto ikom rok mapol ki ikom ker matego. 9Ma omiyo lanebi mo ma bitito lok kom kuc, ka loke obedo ada, ci kibiniang adada ni Rwot kara aye ma ocwalo lanebi meno ada.”

10Ci lanebi Anania ogonyo rii bao woko ki i nguta, oturugi woko, 11ci oloko lok inyim lwak kun waco ni, “Rwot owaco kuman ni meno aye bene kit ma ebituru kwede okol ma Nebukadnejar otweyo i ngut jo me rok ducu ma nongo mwaka aryo peya otum.” Ci aa gira acito woko.

12Lacen inge kare ma lanebi Anania onongo dong oturu kwede ki rii bao woko ki i ngutani, Rwot owaco bota 13ni acit awac bot Anania ni, “Rwot owaco ni meno itwero turu rii bao kit macalo i turuni, ento abileyo kakargi ki rii nyonyo. 14Rwot me mony, Lubanga pa Icrael, owaco ni, ‘Dong atyeko keto rii nyonyo i ngut jo me rok ducu wek gutii bot Nebukadnejar rwot me Babilon; gin bitic bote, pien dong bene atyeko miyo bote kadi wa lee me tim.’”

15Ci awaco bot lanebi Anania ni, “Anania, winy, Rwot gire pe ocwali, ento in dong imiyo lwak gubedo kageno lok goba ma itito botgi. 16Ma omiyo Rwot owaco ni, ‘Nen, abikwanyi woko ki i lobo. I mwaka man kikome ibito iye woko, pien ibedo katito bot dano ni gujem woko ikoma.’”

17I mwaka meno cut i dwe me abiro, lanebi Anania oto woko.