Jeremia 29

Jeremia ocoyo waraga bot Lujudaya ma gitye i opii i Babilon

11

An Jeremia acoyo waraga bot lutela ducu ma gitye ikin opii, ki bot ajwaki ki lunebi, ki bot lwak ducu mayam Nebukadnejar omakogi ki i Jerucalem ci oterogi woko i opii i Babilon. 2Acoyo waraga man lacen ikare ma onongo dong rwot Yekonia kacel ki mine, jo ma kikologi, rwodi me Juda ki Jerucalem, ludiro tic mapatpat onongo dong gua woko ki i Jerucalem kiterogi woko i opii. 3Amiyo waraga man bot Elaca wod pa Capan gin ki Gemaria wod pa Ilkia, mayam Jedekia rwot me Juda oorogi gucito i Babilon bot Nebukadnejar rwot me Babilon. Waragane onongo loke kwane kit man ni, 4“Rwot me mony, ma en Lubanga pa Icrael, owaco kuman bot jo ducu ma en oweko Nebukadnejar omakogi ki i Jerucalem ci oterogi woko i Babilon ni, 5‘Wuger odi ci wubed dong iye. Wupur poto ci wucam gin ma ocek iye. 6Wunyom mon wek wunywal awobe ki anyira. Wuwek awobewu bene gunyom, wek gin bene gunywal lutino. Myero wunya, welwu omede ma pe odok cen. 7Wutii tic maber pi berbedo me gang kama amiyo kiterowu iye me bedo opii. Wulega pi nying gang meno, pien ka kwo ma i taun madit meno tye maber miyo wun bene wubibedo maber. 8An a Rwot me mony, ma an Lubanga pa Icrael, awaco kit man ni pe wuwek lunebiwu ki lutyet ma gitye ikinwu gubwolwu, dok bene pe wuwiny lok me lek mogo ma gin lekoni, 9pien lok ma gitye katitone botwu ki nyingani meno lok goba; an pe acwalogi gira, man an Rwot ma awaco.’ 102

Rwot owaco kuman ni, ‘Ka mwaka pyere abiro ma kimiyo ki Babilon dong otum, ci an abilimowu, abicobo cikena pirwu ci abikwanyowu adwokowu cen i kabedo man. 11An keken aye angeyo yub ma atye kwede pirwu, man an Rwot ma awaco, yub me berbedo ento pe yub pi gin marac, yub pi kelo botwu kare me anyim ma wutye ki gen pireni. 12Ci wubibino bota wulega, an abiwinyo legawu. 133Wubiyenya ci wubinonga bene, kace onongo wuyenya ki cwinywu ducu. 14Eyo, awaco ni wubinonga ci abidwoko gumwu botwu kun acokowu woko ki i rok ducu ki i kabedo ducu kama yam aryemowu wucito iye, ci abikelowu adwokowu cen i kabedo kama yam akwanyowu ki iye ma kiterowu i opiini.’

15Pien wun dong onongo wuwaco ni, Rwot dong omiyowu lunebi ki i Babilon, 16kong wuwiny lok ma Rwot owaco ikom rwot matye kaloc kun obedo iwi komker pa Daudi, ki dok lok ma okemo jo me taun madit man, ki lutuwu mayam pe gucito kacel kwedwu i opiini. 17Rwot me mony owaco kit man ni, ‘Abikelo lweny, kec ki two gemo, ci abimiyo gibedo calo nyig oduru ma otop ma dong rac adada ma pe kitwero camone. 18Abilubu korgi ki lweny, kec ki two gemo, abimiyo gibedo ginacaya bot jo me rok me wi lobo ducu, gibitic ki nyinggi macalo lok lacen dano, gibibedo gin mamiyo lworo bot dano, makelo jwat matek, ki lok me cac ikin rok ducu kama onongo aryemogi gucito iye. 19Man bitime ikomgi pien gin pe gubedo kaketo cwinygi me lubu lok ma onongo acwalo botgi teretere kun wok ki bot lutica lunebi; ento gukwero winyo loka woko. Man an Rwot ma awaco. 20Wuwiny loka, wun jo ducu mayam kimakowu ki i Jerucalem ka kiterowu woko i opii i Babilon’

21Rwot me mony, Lubanga pa Icrael, owaco lok ma okemo Akab wod pa Kolaya ki Jedekia wod pa Maceya ma gitito lok me goba botwu ki nyingani. En owaco ni ebimiyogi woko i cing Nebukadnejar rwot me Babilon, ci en binekogi woko kamaleng inyimwu. 22Ka inen jo mayam kikwanyogi ki i Jerucalem ci kiterogi i opii i Babilon gimito ceno ngat mo, ci gibiwaco ni, ‘Rwot myero otii kwedi kit macalo en otiyo kwede ki Jedekia gin ki Akab, ma rwot me Babilon obulugi woko makwo ki mac.’ 23Man aye bibedo can ma bipoto ikomgi pien gubedo katimo tim mogo ma pe myero, gutimo abor ki mon pa luwotgi, dok bene gubedo kaloko lok goba ki nyinga ma kun an pe acikogi ni guloki. An aye ma angeyo loke, dok bene atye macalo caden ikomgi. Man Rwot ma owaco.”

Waraga pa Cemaya

24Rwot me mony, Lubanga pa Icrael owaco bota me tito bot Cemaya me Nekelam ni, 25“In i cwalo waraga i nyingi keni bot jo Jerucalem ducu, ki bot Jepania wod pa ajwaka Maceya, ki bot ajwaki mukenegu ducu kun iwaco ni 26Rwot oketo in me bedo ajwaka ma ka ajwaka Yekoyada, wek i bed ladit maloyo Ot pa Rwot kun ineno lupoya ducu ma gitito lok, ci i makgi, i twegi woko ki okol, kun i royo dok i rwako ogul nyonyo i ngutgi. 27Pingo pe i juku Jeremia ma en dano me Anatot matye katito lok botwuni? 28Pien en onongo ocwalo lok botwa i Babilon ma waconi kare me bedowu i opii bibedo dwong; wuger odi ci wubed iye. Wupur poto ci wucam gin ma ocek iye.”

29Ento ka ajwaka Jepania ogamo waraga man, ci okwano inyima, 30ci Rwot dok owaco bota ni, 31“Cwal lok ma okemo Cemaya wod pa Nekelam bot jo ducu ma kiterogi i opii i Babilon kun iwaco botgi ni, ‘Kit macalo Cemaya dong otito lok botwu ma onongo an pe acwalo en, dok bene omiyo dong wuketo genwu i lok me gobani, 32pimeno abiketo can ikom Cemaya wod pa Nekelam kacel ki likwayone. En pe bidong ki ngat mo makwo ki ikom lwak man ma bineno gin maber ma abitimo bot jona, pien en oloko lok ma omiyo dano gujemo woko ikoma. Man an Rwot ma awaco.’”