Jeremia 30

Cike pa Rwot bot jone

1Man lok ma Rwot oloko kweda. 2Rwot ma en Lubanga pa Icrael owaca ni, “Co lok ducu ma abedo kaloko botini i buk, 3pien kare tye kabino ma abidwoko iye gum bot jona jo Icrael ki jo Juda. Abikwanyogi adwokogi cen i lobo mayam amiyo bot kwarigi, gibileyo dong bedo meggi. Man an Rwot ma awaco.”

4Magi gin aye lok ma Rwot oloko ma okemo Icrael ki Juda.

5Rwot owaco kuman ni,

“Awinyo koko ma bango dano,

koko makelo lworo, ento pe makelo kuc.

6Kong ipenye kekeni ci dok itam ni,

laco mono twero nywalo latin?

Pingo kono aneno laco acel acel ma omako pyere ki cinge

calo dako matye ka rem ki nywal?

Pingo wang dano ducu olwal woko?

7Maa do! Nino marac tye kabino,

pe tye nino mo marom kwede;

en aye nino me can bot likwayo pa Yakobo;

kadi bed kumeno kibilarogi ki i can meno.”

8Rwot me mony owaco ni, “Ka nino meno oromo abituru rii bao woko ki i ngutgi dok bene abicodo nyor ma kitweyogi kwede woko; cake ikare meno pe dong gibibedo opii pa lurok matwal. 9Ento gin gibitiyo bot an Rwot Lubangagi, ki bot lakwar Daudi, ma an aye abimiyo botgi me bedo rwotgi. 101

Pe wulwor, wun likwayo pa latica Yakobo;

wun jo Icrael, cwinywu bene pe myero obale woko,

Abilarowu ki i lobo maca matye kama bori,

abilaro likwayowu bene ki i lobo mayam kiterogi iye i opii.

Likwayo pa Yakobo gibidwogo cen ci gibibedo mot ki kuc;

ngat mo pe ma bimiyo gibedo ki lworo.

Man an Rwot ma awaco.

11Abibedo kwedwu pi larowu.

Abijwero jo me rok ducu mayam akeyowu ikin gi ci atyekogi woko liweng;

ento wun pe abityekowu woko.

Abipwodowu maberber pe matye ki kiniga madwong tutwal,

ento pe abiwekowu ma pe aketo can ikomwu.

Man an Rwot ma awaco.”

12Rwot owaco bot jone ni,

“Wang retwu dong pe twero cang,

ma wang bure odet marac.

13Ngat mo pe matwero cung pirwu,

yat mo bene peke me aketa iwang burwu,

wang burwu pe dong cang.

14Jo ma gimarowuni ducu wigi dong owil woko ikomwu;

gin pe dong giparo pirwu wa ki acel.

Pien alwenyo ikomwu macalo wun lukwora;

dok bene aketo can magwar ikomwu labongo kica,

pien balwu dwong,

ki gin marac ma wutimo bene pol.

15Pingo pud wukok pi ret ma wulimo?

Aremwu pe dong twero cang.

Aketo can ikomwu kit man, pien balwu dwong,

ki gin marac ma wutimo bene pol mada.

16Pimeno jo ducu ma otyekowu,

gin bene kibityekogi woko,

lukworwu ducu bene kibimakogi kiterogi woko i opii.

Jo ducu ma unuwu gin bene kibiunugi,

ki jo ducu ma yako jamiwu gin bene kibiyako jamigi woko.

17Pien abimiyo wubedo doki ma komwu yot,

ci abicango wang burwu woko bene,

kadi bed lukworwu gin giwaci,

‘Cion dong odoko gin ma kibolo woko;

ma ngat mo dong pe paro pire.’

Man an Rwot ma awaco.”

18Rwot owaco ni,

“Nen, abidwoko likwayo pa Yakobo cen i lobogi

dok kica bimaka ikom jo me dogola acel acel;

gibigero taun madito acel acel ducu odoco i kabedone macon,

ki ot acel acel bene gibigero kakare.

19Jo ma kumu dong gibiwero wer me pwoc;

gibibedo kadange bene pi yomcwiny.

Abimiyo ginya gidoko pol ma pe welgi jwik,

ci abikelo deyo botgi.

20Lutinogi bibedo pol kit macalo yam gubedo kwede ikare macon,

ki lwakgi bene bicung inyima matek liking;

ci abiketo can ikom jo ducu ma unugi.

21Ngat ma bibedo laker ma loyogi bene bia ki ikin gi,

ngat ma bibedo lalocgi bibedo dano me rokgi kikome.

Ka alwonge, ci en binyiko cok bota;

pien ngat mo pe twero ete me bino cok bota ka pe alwonge.

22Wun wubibedo jona,

ki an abibedo Lubangawu.”

23Kong inen yamo kot pa Rwot! Akemone bedo calo yamo lapiru mager, ma bimwoc woko lituc ki ka wi jo maracu. 24Akemone pe bigik nio wang ma en ocobo tiyo gin ma onongo dong otamo me timone. Ikare ma lacen, inino ma pud tye anyim, jone gibiniang iye maber adada.