Jeremia 31

Dwogo pa jo Icrael paco

1Rwot owaco ni, “Kare tye kabino ma abibedo Lubanga pa jo me dogola ducu pa jo Icrael, ki gin bene gibibedo jona. 2Ceng anyutu kicana bot jo ma gubwot ki i lak to i dye tim. Ikare ma jo Icrael guparo pi nongo yweyo, 3an anyute botgi ki kamabor. Wun jo Icrael kare ducu abedo ka marowu, kitmeno dok pud amede ki nyutu botwu mar mera ma pe loke. 4Abigerowu woko odoco wun jo Icrael, ci wubicung. Dok wubikwanyo ajaa agoyagu ci wubimyelo myel ki yomcwiny madwong. 5Dok bene pud wubipito olok iwi cere me Camaria, dong jo ma pito olok meno gibicamo ma ocekke. 6Ada, kare tye kabino ma lukurpiny gibidange gilwongo lwongo ki iwi cere me lobo Epraim ni, ‘Wubin kany! Wacitu malo i Cion, bot Rwot Lubangawa.’”

7Rwot waco ni,

“Wuwer wer ki dwon malongo ki yomcwiny pi jo pa Yakobo,

wudange matek pien gin rok madit ikin rok ducu.

Wuwer wer me pak kun wuwaco ni,

‘Rwot dong olaro jone,

olaro jo Icrael ducu mayam gudong.’

8Nen, abikelogi woko ki i lobo matye tung kumalo,

abicokogi bene ki kamabor ki i agiki piny.

Lutowang ki lungolo gibibino kacel kwedgi,

mon ma guyac kacel ki mon ma dong gicok nywal;

gibidwogo cen gibedo rok matek.

9Jona gibidwogo cen ki koko,

gibibedo ka lega kun nongo atelogi kwede me dok cen;

abimiyo giwoto ki inget laora kulu ma pii opong iye,

gibilubu yoo atir ma pe gibiyoko tyen gi wa ki acel;

pien atye macalo wego bot jo Icrael,

Epraim aye obedo latin kayo ma akwongo nywalone.”

10Rwot waco kuman, “Wuwiny loka, wun rok ducu,

ci wutit loka kama boco i lobo matye i dog namgu.

An ma akeyo jo Icrael wokoni aye dok abicokogi adwokogi cen,

abigwokogi woko maber kit macalo lakwat gwoko kwede romine.

11Dong atyeko koko jo pa Yakobo woko ki i opii,

alarogi bene ki i cing rok matek ma katogi.

12Gibibino ma giwero wer matek pi yomcwiny iwi got Cion,

mot ma an Rwot amiyogini

biyomo cwinygi mada, en mot me ngano, kongo bwino, ki moo nyig jeituni, romi ki dyangigu.

Gibibedo calo poto ma kionyo iye pii ma oromo kare ducu,

pe gibingeyo cwercwiny dong matwal.

13Anyira bimyelo myel ci cwinygi bedo yom,

awobe ki jo muteggi ducu gibibedo ki yomcwiny madwong.

Abikweyo cwinygi ci aloko kumugi doko yomcwiny,

ci cwercwiny ma gitye kwede bene biloke doko yomcwiny.

14Abimiyo ajwaki gicamo cam mabeco ma bup ma giyeng adada,

dok abityeko miti pa jona woko liweng,

man an Rwot ma awaco.”

Kica omako Rwot ikom jo Icrael

151

Rwot owaca ni,

“Koko tye ka winye i Rama, koko ki kumu madwong.

Lakeri tye ka kok pi lutinone;

en okwero woko ni pe dong kikwe cwinye,

pien lutinone dong gutum woko.

16Wek koko obedi,

duny pig wangi bene woko.

Tici ducu ma itiyo bot lutinoni Lubanga bimiyi pwoc pire;

gibidwogo cen ki i lobo pa lukworwu.

Man an Rwot ma awaco.

17Gen tye pirwu ikare me anyim;

lutinowu gibia gidwogo cen i lobogi kikome.

Man an Rwot ma awaco.

18Awinyo ka jo Epraim tye kakoko ki cwercwiny kun giwaco ni,

‘Rwot, wan wabedo calo dyang ma lapele,

ento dong ipwodowa adada,

ci ipwonyowa me lubu gin ma i mito.

Kwanywa i dwokwa cen,

ci wan bene wabidok cen boti;

pien in i Rwot Lubangawa.

19Onongo waloke wabwoti woko,

ento ingeye cutcut wangut wabedo ki cwiny me dwogo cen.

Ikare ma dong ityeko keto can ikomwa,

wakulu wiwa woko ki cwercwiny me can.

Lewic omakowa mada dok alee otwodowa woko,

pien watimo bal ikare ma onongo pud wan lutino.’

20Epraim, in latina ma amaro adada,

latin ma amaro makato ducu.

Pien kare ducu ka alwongo nyingi,

atamo piri ki mar madit.

Cwinya kute akuta ikomi;

dok abibedo ki kica ikomi bene.

Man an Rwot ma awaco.

21Wuket lanyut ma nyutu botwu wanga yoo;

wugur yat mogo inget yoo ma binyutuwu yoo;

wutam pi yoo gudu ma en yoo ma wulubu ikare ma wubinoni,

Wudwog cen, wun jo Icrael,

wudwog cen i gang ma nene wuwekoni.

22Wubibedo ki akalakala pi kare marom mene,

wun jo ma pe gene?

Pien an Rwot dong aketo jami manyen dok pat i lobo

pat macalo dako aye ma gwoko laco.”

Lonyo ma bibino pi lwak pa Lubanga

23Rwot me mony, Lubanga pa Icrael, owaco kuman ni, “Ka dong adwoko lwak man i lobogi, gin dok gibiwaco ki i lobo Juda ki i taun gi ducu ni,

‘Rwot myero omii gum ikom got maleng me Jerucalem,

kabedo maleng kama en bedo iye.’

24Ci dano gibibedo i Juda ki i taun gi ducu, lupur, lukwat kacel ki romigi bene gibibedo kunu. 25Abimiyo jo ma guol gilimo teko, dok abimiyo jo ducu ma kec dong onyongo komgi woko giyeng ki cam. 26Man bimiyo dano gibiwaco ni, ‘Anino woko ci odiko aco anongo atye maber ma koma yot.’

27An Rwot, dong awaco ni, kare tye kabino ma abipongo lobo Icrael ki Juda woko ki dano kacel ki lee. 28Kit mayam amiyo kare ki lumerogi me putugi, kare me mukugi, kare me turugi, ki kare me tyekogi, ki kare me keto can ikomgi, kitmeno bene abinenoni agwokgi ikare ma apitogi, ki dok ka agerogi wek gudong malo. Man an Rwot ma awaco. 292Ka kare meno oromo, dano pe dok gibimede ka waco ni,

‘Kwariwa gucamo nyig olok mawac,

ento man odingo lak lutino woko.’

30Ento dano acel acel ma bicamo nyig olok mawac lake biding woko; kitmeno dano acel acel bito pi bale en kikome.” 3134

Rwot owaco ni, “Nen, kare tye kabino ma abiketo iye gicike manyen ki jo Icrael ki jo Juda bene. 32Gicike man pe bibedo calo gicike mayam aketo ikin an ki kwarigi ikare ca ma onongo akwanyogi woko ki i Ejipt ki tek me cinga akelogi woko ca kun atelo wigi. Gin guturu gicike ma aketo kwedgi, kadi bed onongo an abedo cwargi. 335Ka kare meno oromo, man aye gicike ma abiketo ki jo Icrael; Abimiyo gibedo ki cika i tamgi, abicoyo bene bedo i cwinygi. An abibedo Lubangagi, ki gin gibibedo jona. 346Ngat mo pe dong bipwonyo lawote, dok ngat mo bene pe biwaco bot omine nyo lutugi ni, ‘Nge Rwot.’ Gin ducu gibingeya, cake ikom jo matino o kwede wa ikom jo madito ma ikin gi. Abiweko balgi, pe dok abibedo ka po ikom gin marac ma gubedo katimone.”

35Rwot miyo ceng ryeny i dyeceng,

dwe ki lakalatwe en miyo giryeny i dyewor.

En rubu pii me nam, ci miyo mor;

nyinge kilwongo ni Rwot me mony.

36Rwot ocike ni Icrael kare ducu bibedo rok,

dong bibedo pi kare ma lac kun lubu kit ma cik ma en eketo i loboni birii kwede.

37Rwot waco ni

kace onongo kitwero pimo pol,

nyo ka kitwero roto te guti me lobo ki piny,

meno keken aye bimiyo akwero jo Icrael

pi gin ducu ma dong gutyeko timo.

38“Nen, kare tye kabino, man Rwot ma owaco, ma taun madit man kibigero odoco pi Rwot cake ki ikom lubele ma kilwongo ni Kananel o kwede wa i dogcel ma kilwongo ni Dogcel ma Ogone. 39Dong tol me pimone kibimiyo cito wa kamabor woto atir o kwede wa i got Gareb, ka bigono dok piny o kwede i Goa. 40Nota kama kicoro iye kom jo ma oto ki bur yugi, ki tim ducu ma inget laora kulu me Kidron nio kwede wa i Dogcel me Aguragura dok kwede yo tung kunyango, ci bibedo gin maleng bot an Rwot. Pe dok kibiputu taun madit man nyo kituru woko matwal.”