Jeremia 32

Jeremia owilo lobo i Anatot

11

Rwot oloko kweda i mwaka me apare me loc pa Jedekia rwot me Juda, ma en aye bene obedo mwaka me apar wiye aboro me loc pa Nebukadnejar rwot me Babilon. 2Ikare meno dul mony pa rwot me Babilon obedo ka lweny ikom Jerucalem, dok kiloro wiya woko idyekal pa lukurpiny matye i gangkal pa rwot me Juda. 3Rwot Jedekia onongo otweya i buc kunu pien gidota ni atyeto lok ni Rwot owaco ni, “Nen, abimiyo taun madit man woko i cing rwot me Babilon, ci en bimayo woko bene doko mere. 4Rwot Jedekia pe bibwot wa ki acel ki i cing jo Kaldaya. Kibimiye woko i cing rwot me Babilon; en binene wang kiwang dok bene bilok kwede atyer kamaleng. 5Kibitero Jedekia woko i Babilon, en bibedo kunu nio wang ma an aye abilime. Kadi bed en obedo ka lweny ikom jo Kaldaya, ento en pe biloyogi. Man an Rwot ma awaco.”

6Rwot owaco bota ni 7Kanamel, ma en wod pa nera Calum, bibino bota kun mito ni awil lobone matye i Anatot, pien an a wate macok kwede adada, dok atye ki twero me wilone. 8Cutcut kit macalo Rwot owaco, omara Kanamel obino bota idyekal pa lukurpiny, ci owaco bota ni awil lobone matye i Anatot i lobo pa Benjamin. Ci angeyo woko ni Rwot aye ma ocika ni atim gin macalo man.

9Ci awilo poto meno ki bot omara Kanamel kun apimo lime woko bene bote ma welle oromo cekel me ryal apar wiye abiro. 10Aketo cinga i waragane ci amwono woko, caden ma guneno obedo tye, ka apimo lime woko ki mijan. 11Ci akwanyo waragane me wilo lobo ma onongo amwono doge woko, ma tito kit kare ma birii kwede ki cik ma myero kilub, ki kopine ma onongo pe kimwono, 12ci amiyo bot Baruk wod pa Neria ma wod pa Maceya. Amiyogi ducu bote inyim Kanamel, inyim caden ma guketo cinggi i waraga me wilo poto ca, ki inyim Lujudaya ducu ma onongo gubedo idyekal. 13Aciko Baruk ki inyimgi ducu kun awaco ni,

14“Rwot me mony, ma Lubanga pa Icrael, owaco ni i kwany waraga man me wil ma kimwono doge woko ki ma pe kimwono dogeni, ci i ketgi i abino ma kicweyo ki lobo, wek kigwokgi gurii pi kare malac. 15Rwot me mony, Lubanga pa Icrael, owaco ni odi, poti ki poto olok pud dok ki biwilo ki i lobo man.”

Lega pa Jeremia

16Lacen ma dong atyeko miyo waraga me wil bot Baruk, ci alego ni, 17“Ai Rwot Lubanga, in aye ma i cweyo polo ki lobo ki tweroni dok ki teki! Pe tye gin mo matek ma in pe i romo tiyone. 18Ibedo kanyutu mar meri ma pe loke bot jo alip ki alip, ento in bene iculu kwor ikom dano, iketo can ikomgi pi bal pa kwarigi. In Lubanga madit dok itye ki twero ducu; nyingi Rwot me mony. 19Ibedo ki yub me aura, dok itiyo gin ma tego ma dano uru; ineno bene gin ducu ma dano tiyo, imiyo mot bot dano acel acel kun lubu kit kwo ma en obedo kwede ki kit gin ma en obedo katimone. 20Yam itiyo tango ki lanyutgu i lobo Ejipt. Pud imede bene katiyogi wa onyo, itiyo i Icrael ki ikin rok mukene ducu, ma omiyo kombedi dong ki ngeyi i kabedo ducu. 21Dong tango ki lanyut ma itiyogu omiyo lukworwa gubedo ki lworo marac, dok itiyo ki tweroni ki teki ci ikelo joni jo Icrael woko ki i lobo Ejipt. 22Imiyo botgi lobo man ma miu dok ceko cam mabup, kit macalo yam ikwongo ni i bimiyo bot kwarigini. 23Ento ikare ma dong gubino gudonyo i lobo man dok gucamo obedo meggi, ci gin pe gulubu gin ma icikogi kwede dok bene pe gulubu pwonyi wa ki acel, bene pe gutiyo gin mo kadi ki acel ikom gin mayam icikogi ni gutiini. Pimeno en aye ma omiyo i kelo can man iketo ikomgi. 24Nen, jo Kaldaya dong gutoro cel lobo gurumu ki taun madit litit wek gima woko, dong bene gitye ka lweny. Pi man lweny, kec ki two gemo biweko taun madit man bipoto woko i cing jo Kaldaya. Gin mayam iloko dong otime, kun in bene itye ma ineno giri. 25Kadi bed in ai Rwot Lubanga, in aye mayam ibedo kawaco bota ni awil poto man ki lim inyim lucaden, kadi bed taun madit dong cok poto woko i cing jo Kaldaya.”

26Cutcut Rwot owaco bota ni, 27“An a Rwot Lubanga pa dano ducu. Tye gin mo mono matek bota ma pe aromo tiyone? 282Pimeno abimiyo taun madit man woko bot rwot Nebukadnejar rwot me Babilon ki jo Kaldaya, ci gin gibimonyo taun madit man gimayo woko. 29Jo Kaldaya ma gitye ka lweny ikom taun madit man gibibino gicwinyo mac ikome, ci gibiwangone woko kacel wa ki odi kama yam kiwango iye odok eceta bot jok Baal iwi otgu, kun gionyo gityer amatagu bot lubanga mukene me ngeto cwinya wek kiniga omaka. 30Cake wacon i acaki me kwogi, jo Icrael ki jo Juda gubedo katiyo gin ma pe yomo cwinya keken; gin jo Icrael gumiyo kiniga omaka pi cal lubanga ma gutiyo ki cingini. 31Taun madit man omiyo kinigana ki akemona obedo kamede woko ameda, cake ikare ma kigero kwede nio wa onyo. Dong atyeko moko me kwanyone woko ki ka wanga, 32pi gin marac ma jo magi gutimo: jo Icrael ki jo Juda, kacel ki lukergi, ki lutela ma meggi, ajwakigi ki lunebigi, jo Juda ki jo Jerucalem. 33Gin guloko ngegi gubwota woko; dok bene kadi bed abedo kapwonyogi teretere ento gin pe guwinyo pwony ma abedo kapwonyogi kwede. 343Guketo cal lubangagi ma en gin me kweri wa i ot ma kilwongo ki nyinga, pi balone woko. 354Gugero wang jogi mapol me woro Baal i nota me Kinom kama gityero iye awobegi ki anyiragi bot jok Molek. Pe awaco botgi ni gutim man, dok bene gin ma kitmeno onongo pe odonyo i tama ni gibitimo gin macalo meno ma bimiyo jo Juda timo bal.”

Cike pi gin maber ma bitime i anyim

36Rwot, ma en Lubanga pa Icrael, owaco lok ma okemo taun madit man kuman ni, “Jeremia, in dong itito bot lwak man ni lweny, kec ki two gemo biweko kimiyo taun madit man woko i cing rwot me Babilon. Kombedi winy lok mukene ma an abiwaco. 37Nen, abicito kacoko lwak man woko ducu ki i lobo ducu kama yam aryemogi gucito iye ikare ma onongo kiniga ki akemo ki akeca omaka ikomgi; abidwokogi i kabedo man, abimiyo gibedo maber dok ki kuc. 38Gin gibibedo jona, ki an bene abibedo Lubangagi. 39Abimiyo gibedo ki cwiny acel ki kit acel, wek gubed kawora matwal, wek gin ki lutinogi ma bilubugi i anyim gubed maber. 40Abiketo gicike ma bedo nakanaka kwedgi, ki ni pe abiloke aweko timo gin maber botgi, dok bene abimiyo gibedo kalwora ki i cwinygi, wek pe guloke gubwota woko. 41Cwinya bibedo yom katimo gin maber botgi, dok abikelogi gibedo i lobo man matwal ki gen madit kun nongo aketogi ki cwinya ducu ki tipuna ducu.

42Kit macalo akelo can man aketo ikom lwak man, pimeno bene abicito kamiyogi jami ducu mabeco mayam acike ni abimiyo botgi. 43Ento kibiwilo poti ki i lobo man ma ceng giwaco ni dong odoko tim aroo kama dano ki lee dong pe gibedo iye, dok bene onong giwaco ni kibimiyo woko i cing jo Kaldaya. 44Dong potti dano gibiwilone ki lim, ki waraga me wilo lobo bene gibiketo iye cing ci gimwono woko maber kun nongo caden gumoko coc me wilone bene. Man bitime i lobo pa Benjamin, ki i kabedo me gangi ducu ma gurumu Jerucalem, ki i taun ducu me Juda, ki i taun me lobo godigodi, atika ne i gangi me Cepela ki i gangi me Negeb. Ci abidwoko gum pa jo man botgi kun adwokogi cen i lobogi kikome. Man an Rwot ma awaco.”