Jeremia 33

Cike mukene pi gin maber ma bitime i anyim

1Rwot dok oloko bota tyen me aryone ikare ma onongo pud kitweya woko i ot buc matye idyekal pa lukurpiny. 2Rwot ma ocweyo lobo, ma omiyo lobo ocung i kabedone kikome, oloko kweda. En ma nyinge kilwongo ni Rwot owaca kuman ni, 3“Lwonga, ci abigamo dogi; abititi pi gin madito dok ma kiuru ma pud peya ingeyo gin mo ikomgi liweng. 4An a Rwot Lubanga pa Icrael, awaco ni odi ma i Jerucalem ki gangkal pa luker me Juda ma kibimukugi kiretogi woko piny me keto lageng me gengo lumerok me donyo kalweny ikom kabedo man. Dong konye pe me cito kalweny ikom cel lobo ma jo Kaldaya gutoroni: 5kadi bed kumeno, jo Kaldaya gitye kabino ka lweny ki ka pongo taun madit man woko ki kom jo ma oto, ma an ki koma aye dong abinekogi pi kinigana kacel ki akemona. An dong aloko ngeya woko ikom taun madit man pi tim ducu maracu ma jo ma bedo iye gutimo.

6Ento abicango taun madit man dok abimiyo jo ma iye gibedo ma komgi yot. Abicango jo ma gibedo iye kun abinyutu botgi kuc madit ma bimiyo gibibedo labongo lworo. 7Abidwoko gum pa jo Juda botgi ki pa jo Icrael, abigerogi odoco kit macalo yam gubedo con. 8Abilonyogi woko maleng ki ikom bal aliigi ki bal mayam gutimo ikoma, ci abiweko bal aliigi ki lok me jemo mayam gujemo kwede ikoma. 9Pimeno Jerucalem bibedo taun madit me yomcwiny, me pak, ki me deyo bota; dok rok ducu ma iwi lobo bilworo, dok komgi bene bimyel, ka onongo guwinyo pi gin maber ma atye katiyone pi jo Jerucalem, ki pi berbedo ma atye kakelone ikom taun madit man.”

10Rwot waco kuman ni, “Dano giwaco ni kabedo man obedo calo tim aroo; dok dano kadi ki lee ma bedo iye peke. Man obedo lok ada ni taun magi me Juda ki yoo me Jerucalem gitye nono; dano nyo lee mo peke ma bedo kunu. Ento i kabedo magi dok wubiwinyo iye 111dwon me yomcwiny ki yomcwiny madwong, dwon anyira ger ki dwon lunyom. Wubiwinyo dano ka giwero wer ka gikelo gityer me pwoc i oda; ma gibiwaci,

‘Wumii pwoc bot Rwot me mony, pien en Rwot ber,

mar mere ma pe loke bedo nakanaka.’

Abimiyo lobo man bedo lobo mulony kit macalo yam onongo tye kwede wacon, man an Rwot ma awaco.”

12Rwot me mony owaco kuman ni, “I lobo man kama obedo calo tim aroo, dok kama kadi dano nyo lee pe bedo iye, ikare me anyim lum dok bibedo tye iye kama lukwat gitero romigi iye kacam. 13I taun ducu me lobo godigodi, i taun me Cepela, ki i taun me Negeb, i lobo pa Benjamin, i kabedo ducu ma orumu Jerucalem, ki i taun me Juda, lukwat dok gibikwano romigi. Man an Rwot ma awaco. 142

Nen, kare tye kabino, en aye kare ma abicobo iye cike mayam aketo ki jo Icrael ki jo Juda. 15Inino meno ki ikare meno abiketo iye lakwar Daudi kikome me bedo rwot. En bibedo jang yat ma bilot ki kit ma atir, ma biloyo loc ki ryeko, dok bitiyo gin matye atir dok kakare i lobo man. 16Ikare ma nongo en tye rwot, jo Juda gibibedo mot labongo lworo mo, ki jo Icrael bene dong gibibedo ki kuc. Gibilwongo taun madit meno ki nying ni, ‘Rwot aye ma Lalarwa.’ 173

An Rwot, dong atyeko cike ni kare ducu dano mo bibedo tye ma en lakwar Daudi ma myero obed rwot me Icrael, 184dok bene kare ducu ajwaki bibedo tye ma gia ki i kaka pa Levi ma gin aye gibicung inyima nakanaka katyero gitum awanga, gityer me moko kwon, ki gitum mukenegu ducu.”

19Rwot dok owaca ni, 20“Bedo tek me turu gicikena ki dyeceng ki dyewor, wek pe omii dyeceng ki dyewor gubin i karegi ma mite kikome, 21kitmeno bene bedo tek me turu gicikena ki latica Daudi, wek pe en obed ki lakware mo ma myero obed rwot, ki dok bene me turu gicikena ki ajwaki ma gua ki i kaka pa Levi ma gin aye gitye katic bota. 22Abimedo wel likwayo pa latica Daudi ki wel ajwaki bene ma gua ki i kaka pa Levi ma gitiyo bota, wek bene kwanogi obed tek kit macalo kwano lakalatwe ma i polo nyo nyig kweyo me dog nam tek kwede.”

23Rwot dok owaca ni, 24“Tika ingeyo kit ma dano giloko kwede ni an dong atyeko kwero Icrael ki Juda woko, gin kaka aryo ma onongo ceng ayerogini? En aye gin ma omiyo gineno jona ki wang me cac dok bene pe gitamo pirgi ni gin rok. 25Ento an, a Rwot, aketo gicikena ki ceng ki dwe, dok bene aketo cik ma tye ka loyo polo ki lobo. 26Dong kit macalo ada atyeko timo man, kitmeno bene abigwoko gicikena ki likwayo pa Yakobo ka dok ki latica Daudi. Kare ki kare abiyero dano ki ikom likwayo pa Daudi me loyo likwayo pa Abraim, Icaka ki Yakobo. Abidwoko gumgi kakare botgi, dok kica bibedo ka maka ikomgi.”