Jeremia 34

Lok pa Jeremia ma oloko bot Jedekia

11

Rwot oloko kweda ikare ma Nebukadnejar rwot me Babilon ki dul monye, ki dul mony pa lurok ducu ki jo me rok ducu mapatpat ma gitye ite loce, onongo gitye ka lweny ikom Jerucalem ki i taun ducu ma gurumu ma cokcok kwede. 2Rwot Lubanga pa Icrael, owaco bota ni acit awac ki Jedekia rwot me Juda ni, “Nen, abimiyo taun madit man woko i cing rwot me Babilon, ci en biwango woko licwic ki mac. 3Pe ibibwot ki i cinge, kibimaki woko ci kibimiyi bote. Ibineno rwot me Babilon ki wangi dok bene ibilok kwede wang ki wang; ci ikare meno kibiteri woko i Babilon. 4Rwot Jedekia, winy gin ma an Rwot atye kawacone mukemo in. Pe kibineki i lweny ki pala lucwan. 5In ibito ki kuc, dok kit macalo gibedo kawango angwece ikare ma kiyiko kwarowu, ma onongo gin luker ma gukwongo nyimwu, kitmeno dano bene gibiwango gin ma ngwece kur piri. Kibikoki kun kiwaco ni, ‘Rwotwa dong oto woko do!’ An a Rwot dong atyeko loko lok man.”

6Cutcut atito lok man bot Jedekia rwot me Juda ki i Jerucalem, 7ikare ma dul mony pa rwot me Babilon tye ka lweny ikom Jerucalem ki ikom taun ducu me Juda mayam kiweko gudong. Lakic ki Ajeka; magi keken aye onongo gubedo taun madito ma kirumu ki cel gogo ma gudong i Juda.

Kitiyo ki yo me bwola ikom opii

8Rwot oloko kweda lacen ikare ma dong rwot Jedekia otyeko keto gicike ki jo ducu ma i Jerucalem me tito pi gonyo opiigi woko. 9Guketo gicike ni dano acel acel bigonyo opiine ma gin jo Ibru, laco kacel ki dako, wek ngat mo pe olok Lajudaya lawote obed opii. 10Ci dano ducu kacel ki lutelagi gumoko gicike meno pi gonyo opiigi woko, pe dok me makogi wek gubed opii tyen me aryo. Gugonyo opiigi woko guweko gucito gire. 11Ento lacen dok gumako opii ma co ki ma mon ci gudwokogi cen kun gimiyogi me dok ite locgi macalo opiigi.

12Ikare meno en aye Rwot, 13Lubanga pa Icrael, owaco bota ni, “Yam aketo gicike ki kwarowu ikare ma akwanyogi ki i lobo Ejipt, ki i ot me can. Awaco botgi ni, 142‘I tum mwaka me abicel dano acel acel myero ogony Laibru lawote mayam kicato bote macalo opii ma dong otyeko tic bote pi mwaka abicel; myero kigonygi woko wek dong pe gutii botgi. Ento kwarowu yam pe guketo cwinygi i loka dok bene pe guciko itgi me winyone. 15Ento ikare ma okato ma cokcoki onongo wun wungut ci wutiyo gin ma tye atir i wanga kun wutito lok me gonyo opiiwu, dano acel acel ki lawote, dok bene wuketo gicike inyima i ot ma kilwongo ki nyingani. 16Ento lacen dok wuloke ci wupyedo nyinga kun dano acel acel dok okwanyo opii ma co ki ma mon ci gudwokogi cen bote, ma onongo nene dong wugonyogi woko macalo mitigi tye, ci wukelogi wuketogi ite loc me opii dok aye.’ 17Pimeno, an Rwot awaco kuman ni, ‘Wun pe wulubu cika me gonyo opiiwu, pe wugonyo jo Ibru wadiwu woko ki i opii. Pimeno, an aye dong atito botwu ni, abigonyowu wek kinekwu woko i lweny, two gemo binekowu ki kec bene binekowu woko. Man an Rwot ma awaco. Abimiyo wudoko gin makelo lworo bot ker ducu matye iwi lobo. 18-19Lutela me Juda ki Jerucalem kacel ki ludito ma giloyo gangkal, ajwaki, ki jo me lobo meno ducu, guketo gicike kweda kun giwoto ki ikin wod twon ma gungolo i dul aryo. Ento guturu gicike ma gin guketo ki inyimani, pe gugwoko gin ducu ma mako gicike man. Kitmeno abitimo ikom jo man gin ma gin gutimo ikom wod twon. 20Abimiyogi woko i cing lukworgi. Abimiyogi woko i cing jo ma mito nekogi, dong komgi ma otoni winyo ki nguu me tim aye ma bicamo. 21Abimiyo Jedekia rwot me Juda kacel ki rwodine i cing lukworgi ma gimito nekogi. Abimiyogi woko bot dul mony pa rwot me Babilon, ma gugiko lweny woko i komwuni. 22Nen, abicikogi, ci gibidwogo cen i taun madit man. Gibilweny ikome, gibimako, ci giwango woko licwic ki mac. Abimiyo taun me Juda ducu loke doko macalo tim aroo kama dano mo pe bedo iye. Man an Rwot ma awaco.’”