Jeremia 35

Jeremia ki jo Rekab

11

Ikare ma Yekoyakim wod pa Yocia onongo obedo rwot me Juda, Rwot oloko kweda ni, 2“Cit i kaka pa jo Rekab ci ilok kwedgi. Ka dong ikelgi i kicika matye i Ot pa Rwot ci imii botgi kongo bwino wek gumat.” 3Ci akwanyo Jajania wod pa Jeremia mukene, wod pa Kabajinia, ki omegine, ki awobene ducu, ki jo Rekab ducu, 4ci akelogi i Ot pa Rwot. Aterogi i kicika pa awobe pa Kanan, wod pa Igdalia, ma en dano pa Lubanga. Kicika man onongo tye cok ki kicika pa rwodi, matye malo ka wi kicika pa Mecaya wod pa Calum, ma en dano ma lakur dogola me Ot pa Rwot. 5Ci aketo kikopo ki abino ma kongo bwino opong iye inyimgi, ka dong awaco botgi ni, “Wumat kongo.”

6Ento gin gudok iye ni, “Wan pe wamato kongo bwino pien Jonadab wod pa Rekab, ma en kwarowa, otito ni wan kacel ki likwayowa ducu pe wa bimato kongo bwino matwal. 7En bene otito botwa ni pe myero wa ger odi, pe wa pur poto, pe bene wapit olok kadi ki wilone ki lim bene pe wa wil. Ocikowa me bedo i kema pi kare me kwowa ducu, wek wabed kamede ki bedo i lobo ma wan wawelo iyeni pi kare malac. 8Wan walubu pwony pa Jonadab wod pa Rekab, ma en obedo kwarowa. Wan kikomwa pe wamato kongo, kadi monwa, awobewa ki anyirawa bene pe gimato. 9Pe wagero odi ma myero wabed iye, pe watye ki poto olok mo, kadi ki poti mukene, kodiwa bene peke; 10wan giwa wabedo i kema. Wan wabedo kalubu kit cik ducu ma kwarowa Jonadab ocikowa kwede. 11Ento ikare ma Nebukadnejar rwot me Babilon obino omonyo kwede lobo man, wamoko tamwa me bino i Jerucalem pi ringo woko ki bot mony pa jo Kaldaya ki Ciria. Meno aye gin ma omiyo kombedi watye kabedo i Jerucalem.”

12Rwot me mony, Lubanga pa Icrael dok owaco bota me cito kawaco bot jo Juda ki Jerucalem ni, 13“An Rwot apenyowu ni pingo wukwero gamo pwonya ki winyo loka? 14Likwayo pa Jonadab ducu gulubu dok gugwoko cik ma en ocikogi kwede, pe gumato kongo bwino, kadi wa onyo pe tye ngat mo ikin gi ma mato kongo, pien gilubu cik ma kwarogi ocikogi kwede. Abedo kalok botwu teretere ento wun pe wuwinyo lok doga. 15Abedo kacwalo botwu lutica lunebi teretere, gin bene gubedo katito botwu ni wuloke wuwek kit yo mewu maraci dok wutii gin matye atir. Gin guciko bene matek ni pe myero wuwor lubanga mogo mukene dok pe wutii botgi, wek pud wumede ki bedo i lobo mayam amiyo botwu ki bot kwarowu. Ento wun pe wuciko itwu dok bene pe wuwinyo loka. 16Likwayo pa Jonadab gire gulubu gin ma kwarogi ocikogi kwede, ento wun pe wulubu loka wa ki acel. 17Pimeno, an Rwot me mony, Lubanga pa Icrael, abikelo can mayam acike pire me keto ikom jo Juda ki Jerucalem. Abitimo man pien wun pe wuwinyo loka ikare ma aloko kwedwu, dok bene ka alwongowu wun pe wugamo doga.”

18Ci awaco ki jo me kaka pa Rekab ni, Rwot me mony, Lubanga pa Icrael, owaco ni, “Wun dong wutyeko lubu cik ma kwarowu Jonadab yam ocikowu kwede; wulubu pwonye woko ducu liweng, dok bene wutiyo gin ducu ma onongo en ocikowu ni wutii. 19Pimeno, omiyo an Rwot me mony, Lubanga pa Icrael, acike ni Jonadab wod pa Rekab kare ducu bibedo ki lakware mo ma laco ma bitic bota.”