Jeremia 36

Baruk okwano buk adola i Ot pa Lubanga

11

I mwaka me angwen me loc pa Yekoyakim wod pa Yocia rwot me Juda, Rwot owaco bota ni, 2“Kwany buk adola ci i coo iye lok ducu ma atito boti mukemo Icrael ki Juda, kacel ki rok ducu. Coo gin ducu ma atito boti tyen mukwongo, ikare ma onongo Yocia aye rwot o kwede wa onyo. 3Gwok nyo jo Juda ka guwinyo pi can ma ayube me kelo ikomgi, miyo gin ducu gibiloke giweko yogi maraci. Ci abiweko balgi ki gin maracu ducu mayam gutimo.”

4Kitmeno alwongo Baruk wod pa Neria, ci atito kore ki kore bot Baruk gin ducu ma onongo Rwot owaco bota, kun Baruk obedo kacoyogi woko liweng i buk adola. 5Ka dong aciko Baruk kun awace ni, “An dong kigenga woko ni pe adony i Ot pa Rwot. 6Ento amitoni i cit kunu ikare mo ma nongo dano tye ka rii kec, ci i kwan lok ma i buk adolani woko matek ki dwon malongo, wek jo ducu ma gitye i Ot pa Rwot guwiny lok ma Rwot onongo owaco bota, en lok ma an atitogi boti ci i coyogi i buk adolani. Myero i kwan lok magi bot jo Juda ducu ma gua ki i gangigi wek guwiny. 7Gwok nyo gibilego lega me bako doggi bot Rwot, ci giloke giweko timo gin marac, pi lok ma Rwot dong oloko ikom lwak man ki kiniga kacel ki akemo mager.” 8Kitmeno Baruk okwano lok pa Rwot i Ot pa Rwot kit macalo acike kwede ni myero en otii.

9I dwe me abongwen i mwaka me abice me loc pa Yekoyakim rwot me Juda, dano gubedo ka rii kec wek Rwot okonygi. Jo ma gubedo ka rii kec onongo obedo jo ma gibedo i Jerucalem kacel ki jo ma gua ki i taun ducu me Juda. 10Ci dano guciko itgi kawinyo lok, ma Baruk kwano, kit lok ducu ma awace ma en ocoyo i buk adola. Baruk otiyo man i Ot pa Rwot i kicika pa Gemaria wod pa Capan ma karan. Kicikane onongo tye cok ki dyekal mamalo, i kabedo ma kidonyo kwede i dog gang Manyen me Ot pa Rwot.

Kikwano buk adola bot luloc

11Mikaya wod pa Gemaria, ma wod pa Capan, owinyo ka Baruk kwano lok ma Rwot owaco ki i buk adola. 12Cutcut en oa ocito i gangkal, ci odonyo i kicika pa karan pa rwot, kama onongo luloc ducu gucoke iye. Elicama, karan, Delaya wod pa Cemaya, Elnatan wod pa Akbor, Gemaria wod pa Capan, Jedekia wod pa Anania ki luloc ducu. 13Ci Mikaya owaco botgi lok ducu ma en owinyo ikare ma Baruk okwano lok ki i buk adola inyim lwak. 14Ci luloc guoro Jekudi wod pa Netania, wod pa Celemia, wod pa Kuci, me waco bot Baruk ni, “Kwany buk adola ma i kwano bot lwak i mak i cingi ci ibin kwede.” Kitmeno Baruk wod pa Neria okwanyo buk adola omako i cinge ci obino kwede botgi. 15Ci guwaco bote ni, “Bed piny i kwan buk meno.” Kitmeno Baruk okwano botgi lok meno. 16Ikare ma dong guwinyo lok magi woko ducu, ngat acel acel oloke bot lawote ki lworo madwong, ci guwaco bot Baruk ni, “Myero wawac lok man woko bot rwot.” 17Ka gupenyo Baruk ni, “Titiwa, lok magi ducu i coyogi ningning? Jeremia aye ma obedo kawacone boti ka in i coyo?” 18Baruk odok iye ni, “Jeremia obedo kawaco lok magi ducu bota ki acel acel, ka acoyogi i buk adola ki kalam bwino.” 19Ci luloc guwaco bot Baruk ni, “In kacel ki Jeremia myero wucit wukane woko, pe wuwek ngat mo onge kama wutye iye.”

Rwot owango buk adola woko

20Lacen luloc gucito guketo buk adola i kicika pa Elicama, ma karan, ka dong gucito i gang pa rwot, ci gutito loke woko ducu bot rwot. 21Cutcut rwot ooro Jekudi me cito ka gamo buk adola. Jekudi ocito okwanyo ki i kicika pa Elicama ka okwano bot rwot kacel ki luloc ducu ma onongo gucung kangete. 22Ikare meno obedo dwe me abongwen ma en kare me cwir, ma rwot onongo tye i gang kale ma en bedo iye i cwir, ci onongo obedo ka oyo mac. 23Ikare ma Jekudi obedo kwano buk adola, ka okwano oo i dul coc me adek nyo me angwen, ci rwot ngolo woko cutcut ki pala matidi ci bolo woko i mac. Obedo katimo man nio ka buk adola owang otum woko ducu. 24Ento ngat mo kadi rwot nyo lutice ma guwinyo lok magi ducu pe gubedo ki lworo, dok bene pe guyeco bongigi me nyutu cwercwinygi. 25Kadi bed Elnatan, Delaya, kacel ki Gemaria gulego rwot ni pe owang buk adolani woko, ento rwot pe oketo cwinye me winyo lokgi kadi ki acel. 26Lacen rwot Yekoyakim ociko wode Jeramel, kacel ki Ceraya wod pa Ajriel, ki Celemia wod pa Abdeel ni gumaka kacel ki Baruk ma karan, ento Rwot Lubanga okanowa woko.

Jeremia dok ocoyo buk adola mukene

27Lacen ma dong rwot otyeko wango buk adola ma awaco loke bot Baruk ka en ocoyoni, Rwot dok ocika 28ni akwany buk adola mukene ka acoo iye lok ducu ma onongo tye i buk adola mukwongo ca ma rwot Yekoyakim dong otyeko wango wokoni. 29Rwot otita me waco bot rwot Yekoyakim ni; “Dong ityeko wango buk adola ca woko, dok bene i penya ni pingo an ocoyo ni rwot me Babilon bibino ada ci tyeko lobo man woko kun neko jo ducu kacel ki lee matye iye. 30Pimeno an Rwot, awaco bot in Yekoyakim rwot me Juda ni, pe tye dano mo ki ikom likwayu ma bibedo rwot. Ka i to komi mutoni kibibolo woko kama lyeto ceng biwango ki i dyeceng ki ngico me pee bijingo woko ki i dyewor. 31Abiketo can ikomi kacel ki likwayi, ki lutici, pi balwu ducu ma wutye katimone. Dok in, kadi ki jo Jerucalem nyo jo Juda, pe wubedo kaketo cwinywu me winyo lok ma abedo kawaco botwu teretere, pimeno abikelo can ma onongo yam dong aciko pire ni aketo ikomwuni.”

32Ci dok akwanyo buk adola mukene ci amiyo bot Baruk karan, ci Baruk ocoyo lok woko ducu ki acel acel kit macalo abedo kawaco. Baruk ocoyo lok ducu ma onongo tye i buk adola mukwongo ma rwot Yekoyakim owango woko ki mac ci. An dok amedo iye lok mapol marom ki lok me wi atii ca.