Jeremia 37

Lega pa Jedekia bot Jeremia

11

Nebukadnejar rwot me Babilon yam oketo Jedekia wod pa Yocia me bedo rwot me Juda ma ka Yekonia wod pa Yekoyakim. 2Ento Jedekia ki lutice, ki lwak bene pe guwinyo lok pa Rwot ma omiyo bota ni atit botgini.

3Rwot Jedekia ocwalo Yekukal wod pa Celemia, ki ajwaka Jepania wod pa Maceya bota, kun guwaca ni, “Myero ileg Rwot Lubangawani pirwa.” 4Ikare meno onongo pud atye ka wire ata ikin dano, adonyo i ot ci akato woko gira kit ma cwinya mito, pien onongo pud peya gitweya i buc. 5Ikare meno bene mony pa Parao oa ki i Ejipt obino; ento ka jo Kaldaya ma onongo gitye karumu Jerucalem guwinyo lok man, ci gin gucako jer woko ki i Jerucalem gudok woko cen ki ngegi.

6Ka dong Rwot, Lubanga pa Icrael, owaco bota ni, 7“Wac bot rwot me Juda ma ocwali me lok kweda ni, ‘Dul mony pa Parao ma onongo bino kakonyini dong bidok woko i lobo Ejipt. 8Ci jo Kaldaya bidwogo cen. Gibibino gilwenyo ikom taun madit man, gimayo woko ka dong giwango woko ki mac. 9An Rwot acikowu matek ni pe myero wubed ka bwole kekenwu kun wutamo ni jo Kaldaya pe bidwogo cen, myero wuniang ni gibidwogo. 10Kadi bed wuloyo dul mony pa jo Kaldaya ma gibino ka lweny i komwuni, ma nongo dong jo mudonge keken en aye jo ma nongo kiketo ret ikomgi ma gibutu i kemagi, jonu bene pud gibiromo a malo ci gibiwango taun madit man woko ki mac.’”

Kimako Jeremia ci kitweye woko i buc

11Dul mony pa jo Kaldaya gudok woko cen ki i Jerucalem ki ngegi pien onongo mony pa Parao dong onyiko cok mada. 12Ci aa ki i Jerucalem acito i lobo pa jo Benjamin kagamo dul lobo ma ki poko bota ki ikin lutuwa. 13Ento ikare ma ao i Dogcel me Benjamin, onongo ladit maloyo acikari tye katic kunu, nyinge kilwongo Irija wod pa Celemia ma wod pa Anania; cutcut omaka woko kun waca ni, “In i tye kalwi woko icito bot jo Kaldaya.” 14Ci an adok iye ni, “Meno lok goba, an pe atye kalwi woko me cito bot jo Kaldaya.” Ento Irija onongo pe twero winyo loka ci omaka otera bot luloc. 15Ci kiniga omako luloc matek ikoma, gugoya ka gutweya kwede woko i buc i ot pa Yonacan ma karan, pien onongo dong kiloko odoko ot buc.

16Kitweya i ot ma obedo bur matye ite ngom, ci kiweko arii kunu pi kare malac. 17Lacen rwot Jedekia ocwalo dano kakela bote, ka kikela, ci en ojola maber. Ci openya ki i ot i mung ni, “Tye lok mo ma Rwot otiti?” Ci agamo ni, “Lok tye.” Dok amedo lok kun awace ni, “Kibimiyi woko i cing rwot me Babilon.”

18Ci awaco bene ki rwot Jedekia ni, “Gin marac ango ma an atimo boti nyo bot lutici kadi ki bot lwak man, ma omiyo itweya woko i buc? 19Gin ango ma otime ikom lunebini mayam gutyeto lok boti ni, rwot me Babilon pe bibino ka lweny ikomi kadi ki ikom lobo man? 20Kombedi dong, ai ladita, alegi iwiny kokona; pe dok i dwoka cen i ot pa Yonacan karan, weko abito woko ki kunu.”

21Pimeno Jedekia omiyo cik ni pe kidwoka i buc ma i ot pa Yonacan, ci gukela guketa me bedo i buc ma idyekal pa lukurpiny, kun en bene oye ni kibed ka miya mugati ma a ki bot jo ma gitedo nino ki nino, nio ka mugati dong otum woko liweng ki i taun madit. Kitmeno an abedo kunu idyekal pa lukurpiny.