Jeremia 38

Jeremia iwang it mutwo

1Ikarenu Cepatia wod pa Matan, Gedalia wod pa Packur, Jukal wod pa Celemia ki Packur wod pa Malkia gubedo kawinyo lok ma abedo kawacone bot lwak ni 2Rwot owaco ni, “Ngat mo ma bidong i taun madit man kibineko woko ki pala lucwan nyo kec bineke woko nyo two gemo aye bipoto ikome ci neke woko. Ento ngat ma bia cito kamine kene bot jo Kaldaya pe kibineke, bibedo kwo; en bilaro kwone ci bedo bote macalo mot me lweny.” 3An bene onongo abedo katito lok bot lwak ni Rwot owaco kuman ni, “Abimiyo taun madit man woko i cing dul mony pa rwot me Babilon, ci en bimako woko.” 4Ci luloc guwaco bot rwot ni, “Laco man myero ki nek woko, pien en miyo cwiny acikari kacel ki lwak ma odong i taun madit man doko lwor, pi lok ma en loko botgini. Dano man pe tye kayenyo yo me miyo kony pi berbedo pa lwak, ento mito kelo can ikomgi keken.” 5Ci rwot Jedekia owaco ni, “Nen, twero tye i cingwu, wutim gin ma wumito ikome; an pe atwero gengowu gira.” 6Ci gumaka gubola woko iwang it pa Malkia, ma en wod pa rwot, ma onongo obedo idyekal pa lukurpiny. Gutweya ki tol gucwala kwede piny iwang it kunu. Pii onongo pe iwang ite, ento coto keken aye onongo odong, ci acako mwony woko i coto.

7Kadi bed kumeno, Ebed-melek Laetiopia, dano ma kikolo, mayam tiyo i gangkal pa rwot, owinyo ni kibola woko iwang it. Ikare meno onongo rwot obedo ki lukikone i Dogcel me Benjamin. 8Ci Ebed-melek oa ki i gangkal pa rwot ocito bot rwot ci owace ni, 9“Ladita, jo magi gutimo gin marac atika. Gubolo Jeremia woko iwang it, kama ageno ni kec bineke woko ki kunu. Cam mo maromo dong pe i gang.” 10Ci rwot omiyo twero bot Ebed-melek Laetiopia me kwanyo jo adek wek gucit kwede kaywaya woko ki iwang it ma peya nongo ato. 11Ci Ebed-melek okwanyo jo meno adek ka ocito kwedgi i ot pa rwot, ci odonyo kama kiketo iye bongo i ot kano jami, ci okwanyo oketoket bongo ma otii ki bongo mogo ma oyec, ci otweyo ki tol ocwalo piny iwang it bota. 12Ci Ebed-melek owaca ni, “Ket oketoket bongo ma oyeci ite yweti ka iket tol ikome.” Ci atimo kitmeno, 13ci guywaya ki tol meno ki iwang it gukela woko kamaleng. Ci amede ki bedo idyekal pa lukurpiny.

Jedekia openyo tam ki bot Jeremia

14Rwot Jedekia ocwalo dano gukela bote ki i dogola me adek me donyo i Ot pa Rwot, ci rwot Jedekia owaco bota ni, “Abipenyi peny acel, dong pimeno pe amito i mung lok mo woko bota.” 15Ci awaco bot Jedekia ni, “Kace atiti lok ada, ci i bineka woko, dok bene kace amiyi tam, ci pe i ibiketo cwinyi iye.” 16Pimeno rwot Jedekia okwonge bota i mung kun waco ni, “Macalo Rwot tye kwoni, ma omiyowa kwo, pe abineki, dok bene pe abimiyi i cing jo ma gimito neki wokoni.”

17Ci awaco bot Jedekia ni Rwot Lubanga me mony, Lubanga pa Icrael owaco kuman ni, “Kace ibimiine keni bot luloc pa rwot me Babilon, ci gibiweki ibedo kwo, ki taun madit man bene pe kibiwango woko ki mac. Ento in kacel ki jo ma i odi wubikwo. 18Ento kace pe ibimiine keni bot luloc pa rwot me Babilon, ci taun madit man kibimiyo woko i cing jo Kaldaya, ci gibiwango woko, pimeno in pe ibibwot ki i cinggi wa ki acel.”

19Ci rwot Jedekia owaco bota ni, “Alworo Lujudaya ma dong gumine woko ken gi bot jo Kaldayani, pien gitwero miya woko i cinggi, ci gibitima ki tim anywar marac.” 20Ci awace ni, “Pe kibimiyi botgi. Kombedi dong ilub lok pa Rwot i gin ducu ma awaci, ci ibibedo maber, dok bene kibibwoti ibedo kwo. 21Ento Rwot dong onyuta ginanyuta iwang lek, gin ma bitime kace i kwero miine woko keni botgi. 22Nen, mon ducu mayam kiweko gudong i gangkal pa rwot me Juda dong kitye katerogi woko bot luloc pa rwot me Babilon. Winy lok ma gitye kawacone ka giwoto gicito kwede ni,

‘Lurem rwot mayam en genogini dong gubwole, dok bene guloyo tame woko,

Dong kombedi kit macalo tyene omwony woko i cotoni,

guloke guweke woko kene.’”

23Ci an dok amede kiwaco ni, “Moni ducu kacel ki lutinoni kibiterogi woko bot jo Kaldaya, ki in bene pe ibibwot ki i cinggi. Rwot me Babilon bimaki woko macalo opii, ki taun madit man bene kibiwango woko ki mac.”

24Jedekia owaco bota ni, “Pe iwek ngat mo onge lok ma waloko, ci pe i bito. 25Kace luloc guwinyo ni aloko kwedi, ka gubino boti guwaci ni, ‘Tit botwa gin ma in iwaco bot rwot ki gin ma rwot owaco boti, pe i mung lok mo botwa pien wan giwa pe wa bineki,’ 26ci i biwaco botgi ni, ‘Akok bot rwot ki mwolo kun abako doga bote ni pe myero odwoka cen i ot pa Yonacan me to kunu.’” 27Ci luloc ducu gua gubino bota gupenya ci an bene adok iye botgi kit macalo rwot opwonya kwede. Ma omiyo guweko lok kweda woko, pien lok ma wabedo kalokoneni ngat mo ma owinyo obedo peke. 281Ci gugwoka idyekal pa lukurpiny nio ka merok omayo Jerucalem.