Jeremia 39

Jerucalem opoto i cing jo Babilon

1I mwaka me abongwen me loc pa Jedekia, rwot me Juda, i dwe me apar en aye Nebukadnejar rwot me Babilon obino kwede ki monye ducu ikom Jerucalem, ci orumu woko. 2I mwaka me apar wiye acel me loc pa rwot Jedekia, i dwe me angwen, ninone abongwen, en aye gumuku kwede cel gogo me taun madit me Jerucalem. 3(Ikare ma dong kimayo Jerucalem woko, ci luloc ducu pa rwot me Babilon gubino gubedo i dogcel ma idyere matye i gangkal: gin aye Nergal-carejer, Camgar-nebo, Carcekim Larabcaric, Nergal-carejer ma Larabmag, ki ludito mukene ducu pa rwot me Babilon.) 4Ikare ma Jedekia rwot me Juda kacel ki acikarine ducu guneno gin matye katime, ci gin guweko gang woko guringo ki i dyewor, kun giwok ki i dog gang ma ikin cel aryo me gang ma wok ki i poto pa rwot; ci gucito gulubu yoo ma dok tung Araba.

5Ento mony pa jo Kaldaya guryemo korgi, ci gumako Jedekia wa i bar me Jeriko. Ikare ma gumake ci gukele bot Nebukadnejar rwot me Babilon i Ribla, ma i lobo Kamat; ci ongole iye kop. 6Ci rwot me Babilon oneko awobe pa Jedekia woko i Ribla ki inyime ma wange neno, dok rwot me Babilon oneko ludito me awora me Judagu woko ducu. 7Ci okolo wang Jedekia oloyo woko, ka dok kitweye ki nyor, ci kitere kwede wa i Babilon. 8Jo Kaldaya guwango ot pa rwot, ki odi pa lwak ducu, ci gumuku kicika cel ma orumu Jerucalem woko. 9Nebujaradan ma ladit pa lugwok rwot yam otero jo ma gudong i gang, ki jo mayam gukobo gigi ken gi bot rwot me Babilon, woko i opii macalo mabuc i Babilon. 10Ento Nebujaradan ladit pa lugwok rwot bene yam oweko lucan mogo ma limgi peke gudong i lobo Juda, ci en omiyogi poto olok ki poti mukene bene ikare meno.

Kigonyo Jeremia

11Nebukadnejar rwot me Babilon omiyo cik mukema kun wok ki bot Nebujaradan, ladit pa lugwok rwot kun waco ni, 12“Tere, ci i gwoke maber, pe i tim gin mo marac ikome, ento tii kwede i yo ducu kit macalo en titi.” 13Ci Nebujaradan ladit pa, lugwok rwot, Nebucajban Larabcaric, Nergal-carejer ma Larabmag, ki ludito madongo ducu pa rwot me Babilon 14gucwalo dano okela ki idyekal pa lukurpiny, ci gumiya bot Gedalia wod pa Akikam, ma wod pa Capan, wek otera paco. Ci omiyo abedo ikin dano.

Gen pi Ebed-melek

15Rwot oloko kweda ikare ma onongo kitweya woko idyekal pa lukurpiny. Owaco bota 16me tito bot Ebed-melek Laetiopia ni Rwot me mony, Lubanga pa Icrael, owaco ni, “Nen, abicobo loka kun aketo can ikom taun madit man, pe abitimo gin mo maber, lok man bicobe inyimi in kikomi inino meno. 17Ento an Rwot abilari, pe kibimiyi i cing jo meno ma itye kalworogini. 18Pien adada an abilari, ma omiyo pe kibineki woko ki pala lucwan, ento ibibedo kwo, ci kwoni bibedo boti macalo mot me lweny, pien iketo geni ducu ikoma, man an Rwot ma awaco.”