Jeremia 40

Jeremia ki jo mudong gubedo bot Gedalia

1Rwot oloko kweda ikare ma dong Nebujaradan, ladit pa lugwok rwot ogonya woko ki i Rama. Onongo yam kitweya woko ki nyor kacel ki jo mapol ma kimakogi ki i Jerucalem ki Juda, ma kiterogi woko i opii i Babilon. 2Ladit pa lugwok rwot okwanya otera woko cen ci owaca ni, “Rwot Lubangani dong otyeko tito pi kit can ma bipoto i kabedo man. 3Rwot dong otimo gin ma nene en owaco ni ebitimoni. Man ducu otime pien lutuwu gutimo bal ikom Rwot dok bene pe guwinyo loke. 4Kombedi dong abigonyo nyor woko ki i cingi ci abiweko ibicito labongo ayela mo. Kace imito wot kacel kweda me cito i Babilon, ci tye itweroni, ci an abigwoki. Kace pe imito cito ci itwero bene bedo giri. Nen loboni ducu tye ene, yer kamo ma itamo ni ber nyo opore me cito ni iye.”

5Ento pe aye me cito kwede, ma omiyo Nebujaradan owaca ni, “Dok cen bot Gedalia wod pa Akikam, ma wod pa Capan, ma nene rwot okete me bedo laloc me taun me Juda ducu. Itwero bedo kacel kwede ikin lwak, nyo itwero giri cito kama itamo ni ber me cito iye.” Ci ladit pa lugwok rwot omiya cam ki mot mogo ka dong oweko an acito gira. 6An acito bot Gedalia wod pa Akikam i Mijpa, ci abedo kacel kwede ikin lwak ma onongo gudong i lobo meno.

Gedalia laloc me Juda

(2 Luk 25:22-24)

71

Ludito mogo ki acikari pa Lujudaya onongo pud gibedo i tim. Guwinyo ni rwot me Babilon otyeko keto Gedalia wod pa Akikam me bedo laloc me lobo, dok oketo en me loyo jo ducu ma gudong; co, mon kacel ki lutino, mayam pe kiterogi i opii i Babilon, ma gin aye onongo jo ma lucan adada i lobo meno. 8Ci Icmael wod pa Netania, Yokanan wod pa Karea, Ceraya wod pa Tanumet, likwayo pa Epai ma jo Netopa, ki Jejania ma Lamaaka gucito kacel ki lwak meggi bot Gedalia i Mijpa. 9Gedalia wod pa Akikam, ma wod pa Capan, okwonge botgi kacel ki lwakgi ducu kun waco ni, “Pe myero wubed ki lworo me tic bot jo Kaldaya. Wubed kunu ci wutii bot rwot me Babilon, ci wubibedo maber ki kuc. 10An gira abibedo i Mijpa kun abedo macalo lawangwu ka jo Kaldaya gubino kany. Ento wun wutwero kano kongo bwino, nyig yat ki moo jeituni, ci wubed kwede i taunwu ma dong yam odok lobowu ma wumayoni.” 11Kitmeno bene, Lujudaya ducu ma onongo yam gitye i lobo Moab, Ammon, Edom ki lobo mukene ducu mayam kiryemogi gucito iye, guwinyo ni rwot me Babilon oweko jo mukene odong i Juda, dok bene en oketo Gedalia wod pa Akikam, ma wod pa Capan me bedo laloc maloyogi. 12Ci Lujudaya ducu guweko lobo kama yam kiryemogi gucito iyeni, ci gucako dwogo cen i Juda. Gubino bot Gedalia i Mijpa, ci gucoko kongo bwino mapol ki nyig yadi me oro madwong adada.

Kineko Gedalia woko

(2 Luk 25:25-26)

13Inge meno, Yokanan ki ludito ducu ma giloyo acikari ma onongo gitye i tim gubino bot Gedalia i Mijpa, 14ci guwace ni, “Tika ingeyo ni Baalic rwot pa jo Ammon otyeko cwalo Icmael wod pa Netania me neki woko?” Ento Gedalia wod pa Akikam pe oye lokgi. 15Ka dong Yokanan oloko ki Gedalia i mung i Mijpa, kun wace ni, “Wek acit anek Icmael wod pa Netania woko, pien ngat mo pe bingeyo lok man. Pingo en mito neki woko, kun miyo Lujudaya ducu ma gurumi woko gibiket woko, dok bene miyo jo mayam gudong i Juda gito woko?”

16Ento Gedalia wod pa Akikam owaco ki Yokanan wod pa Karea ni, “Pe ibitimo gin ma kitmeno, pien itye kaloko lok goba keken ikom Icmael.”