Jeremia 41

11

I dwe me abiro, Icmael wod pa Netania ma wod pa Elicama, ma kinywale i ot ker, ma en ngat acel ikin ludito pa rwot, obino ki jo apar bot Gedalia wod pa Akikam i Mijpa. Ikare ma gitye i Mijpa kacamo cam kacel, 2ci cutcut Icmael ki jo apar ma guwoto kwedeni gua gutongo Gedalia wod pa Akikam, ma wod pa Capan woko ki pala lucwan ci guneke woko. En aye onongo ngat ma rwot me Babilon oketo me bedo laloc me loboni. 3Icmael bene oneko Lujudaya ducu ma onongo gitye kacel ki Gedalia i Mijpa: kadi wa acikari pa jo Kaldaya ma kinongogi kunu.

4Orwone, ma pud peya ngat mo ongeyo pi neko Gedalia, 5jo pyere aboro gua ki i Cekem, Cilo ki i Camaria gubino. Gubino ma gulyelo tikgi woko, guruku bene bongi ma oyecoyec, ma komgi bene gungolo woko. Gin onongo gitye katero gityer me moko kwon ki odok eceta me atyera i Ot pa Rwot. 6Icmael wod pa Netania oa ki i Mijpa obino karwate kwedgi, kun woto ki koko. Ikare ma en rwate kwedgi ci owaco botgi ni, “Wubin wudony bot Gedalia wod pa Akikam.” 7Ikare ma dong gubino, ma gudonyo i dye taun madit, ci Icmael wod pa Netania ki jo ma onongo gitye kacel kwede gunekogi woko, ci gutingo komgi gubolo woko i bur ma ki kwinyo ikom got me lagwok pii.

8Ento onongo tye jo apar ikin gi ma guwaco bot Icmael ni, “Pe i nekwa, wan wa tye ki ngano, kal, moo jeituni, ki moo kic ma kikano i poto.” Ci en ojuke kene pe onekogi ki luremgi ducu. 9Bur meno ma kikwinyo ikom got me lagwok pii ma Icmael obolo iye kom dano ma en onekogini onongo dit dok lac mada. En aye bur lagwok pii ma rwot Aca yam okwinyo me gwoko kwo pa dano ki ikom rwot Baaca me Icrael. Icmael opongo bur lagwok pii meno woko ki kom jo ma en onekogini 10Ci Icmael omako anyira pa rwot ki jo ducu mayam gudong i Mijpa gudoko opiine, gin jo ma Nebujaradan, ladit pa lugwok rwot, yam omiyogi icing Gedalia wod pa Akikam. Icmael wod pa Netania oterogi woko i opii kun giwoto gicito me ngolo kulu pi kato loka tung bot jo Ammon.

11Yokanan kacel ki ludito monye ducu guwinyo pi lok me nek ma Icmael otimoni. 12Ci gucoko jo ma meggi, gucito kwede ka lweny ikom Icmael wod pa Netania. Gubino ka lweny ikome i joro madit matye i Gibeon. 13Ikare ma opii pa Icmael guneno Yokanan kacel ki ludito monye, ci cwinygi obedo yom. 14Kitmeno jo ducu mayam Icmael omakogi macalo opii ki i Mijpa, guloke guringo gudwogo cen, ci gucito bot Yokanan wod pa Karea. 15Ento Icmael wod pa Netania olwi woko ki jo aboro, ci gucito bot jo Ammon.

16Lacen Yokanan wod pa Karea ki ludito monye, gukwanyo dano mayam gudong, ma Icmael wod pa Netania omakogi ki i Mijpa oterogi woko i opii inge neko Gedalia wod pa Akikam: acikari, mon, lutino, ki jo ma kikologi, ma Yokanan odwokogi cen ki i Gibeon. 17Ci gucito gubedo i Gerut Kimam macok ki Beterekem pien onongo gilworo jo Kaldaya. Onongo dong gitye ki tam me cito woko wa i Ejipt 18Gin gubedo ki lworo ni gwok nyo mony pa jo Kaldaya bitimo gin marac pien Icmael onongo oneko Gedalia, wod pa Akikam, ma rwot me Babilon onongo ceng oketo me bedo laloc me lobo.