Jeremia 42

Lwak gupenyo Jeremia me lega pirgi

1Ludito wi mony ducu, kacel ki Yokanan wod pa Karea ki Ajaria wod pa Kocaya, gubino ki lwak dano ma kitgi patpat, jo matino ki jo madito ducu, gubino cok, 2ci guwaco bota ni, “Tim gin ma wan wabako dogwa boti pire! Leg Rwot Lubangawa pirwa. Leg pi wan ducu ma wabwot. Yam onongo wadwong, ento kit macalo i neno, kombedi dong wadong jo manok keken. 3Leg wek Rwot Lubangawa onyut botwa yo ma myero walub ki gin ma myero watim.” 4Ci adok botgi iye ni, “Dong awinyo lokwu; pimeno abilego Rwot Lubangawa pirwu kit macalo onongo wupenya, ci kit gin ducu ma Rwot bidok iye ki wun an abitito botwu. Pe abikano kit gin mo wa ki acel ma pe atito botwu.”

5Ci guwaco bota ni, “Rwot myero obed caden me ada dok ngat ma gene ikomwa me timowa rac kace pe wabilubu lok ducu ma Rwot Lubangani bicwali kwede botwa. 6Kadi bed gin maber nyo marac, wan wabilubu lok pa Rwot Lubangawa ma wacwali boteni. Ka walubu loke ci wabibedo giwa maber.”

Rwot ogamo lega pa Jeremia

7Lacen inge nino apar Rwot oloko kweda. 8Ci alwongo Yokanan wod pa Karea, ki ludito wi mony ducu ma onongo gitye kacel kwede, ki lwak dano ducu, jo matino ki madito. 9Ka dong awaco botgi ni, “Rwot, Lubanga pa Icrael, ma wucwala bote ki lega me bako dogwuni owaco ni, 10‘Kace wumito bedo i lobo man ci abiyubuwu wek wucung matek macalo ot, pe abiretowu woko piny; abipitowu pe abiputuwu woko. Atye ki aremcwiny pi can ma dong aketo ikomwu ca. 11Pe dong wubed ki lworo mo ikom rwot me Babilon. Pe wulwore, pien atye kwedwu; abilarowu dok abikwanyowu woko ki i cinge. 12Pien an lakica, pi man abimiyo en bene kica make ikomwu ci bimiyo wun wubidok cen i lobowu kikome.’ 13Ento wun jo ma wudong i Juda pe myero wukwer winyo lok pa Rwot Lubangawu kun wukwero bene bedo i lobo man woko. 14Pe myero wuwac ni, ‘Pe, wan giwa wabicito wabedo i Ejipt, kama pe wabineno iye lweny mo doki ki wangwa, dok bene pe wabiwinyo koko tum ma kikutu pi lweny, ki kec bene pe binekowa.’ 15Wuwiny lok pa Rwot, wun jo ma wudong i Juda. Rwot me mony, Lubanga pa Icrael, owaco kuman ni, ‘Kace dong wumoko tamwu me cito me bedo i Ejipt, 16ci lweny ma wulworoni binongowu kunu i lobo Ejipt; ki kec bene ma wulworoni bilubuwu kunu, ci wubito woko ki i lobo Ejipt. 17Jo ducu ma dong gumoko tamgi me cito me bedo i Ejipt gibito, i lweny, nyo kec aye ma binekogi, nyo ki two gemo. Pe tye ngat mo ikin gi ma bidong ma kwo, ngat mo bene pe ma bibwot ki i can ma abiketo ikomgi.’

18Rwot me mony, Lubanga pa Icrael, owaco kuman ni, ‘Kit macalo yam atoyo kinigana ki akemona ikom jo ma gibedo i Jerucalem, kitmeno bene abionyo akemona woko ikomwu kace wucito i Ejipt. Wubidoko lok lacen dano, gin makelo lworo madwong, ki gin ma dano gibedo kaloko lok agec ikomgi. Pe dok wubineno kabedo man matwal.’”

19Ci dok amede kun awaco botgi ni, “Rwot dong owaco botwu wun jo ma wudong i Juda ni pe wucit i Ejipt. Myero wunge atikatika ni an dong atyeko cikowu ikare man 20ni wun dong wungak woko ma dong wumito ada ni kwowu orweny woko. Wun wucwala ni acit bot Rwot Lubangawa kun wuwaca ni, ‘Leg Rwot Lubanga pirwa! Tit botwa bene gin ducu ma en owaco ni watii, ci wan bene wabitiyo.’ 21Nen, kombedi dong atito botwu, ento wun wukwero lubu gin ducu ma Rwot Lubangawa oora ni atit botwu. 22Pimeno kombedi myero wunge atikatika ni wubito i lweny, kec binekowu, ki two gemo bene binekowu ki i kabedo ma wumito tutwal me cito iyeni.”