Jeremia 43

Kitero Jeremia woko i Ejipt

1Ikare ma dong atyeko loko lok ducu bot lwak ducu ma gucoke, ma Rwot Lubangagi aye oora me tito botgi, 2ci Ajaria wod pa Kocaya ki Yokanan wod pa Karea, ki jo ducu mayam gin lungala guwaco bota ni, “Itye katito lok goba. Rwot Lubangawa pe ocwali ni itit botwa ni pe myero wucit kabedo i Ejipt.

3Ento Baruk wod pa Neria aye opiyo in ikomwa, wek i miwa i cing jo Kaldaya, wek gunekwa woko, nyo guterwa woko i opii i Babilon.” 4Kitmeno Yokanan wod pa Karea ki ludito wi mony ducu kacel ki lwak ducu pe gulubu lok pa Rwot, me dong i lobo Juda. 51Ento Yokanan wod pa Karea ki ludito wi mony ducu gumako dano ducu ci guterogi woko i Ejipt, kacel ki jo ducu mayam gudwogo ki i rok mapatpat kama yam kiryemogi guket iye ci gudwogo cen kabedo i Juda; 6co, mon, lutino kacel ki anyira pa rwot. Gutero jo ducu mayam Nebujaradan ladit pa lugwok rwot owekogi bot Gedalia wod pa Akikam; ma wod pa Capan; guterowa kacel ki Baruk wod pa Neria. 7Pe gulubu gin ma Rwot ociko, ma omiyo gubino i lobo Ejipt wa i kabedo ma kilwongo ni Tapanec.

8Ki kunu i Tapanec, Rwot owaco bota ni, 9“Kwany gweng madito imak i cingi, ci iyikgi woko ite cementi ma ikin gweng ma kicano ma kidonyo kwede i gangkal pa rwot Parao i Tapanec, yikgi inyim jo Juda ma gin bene gineno. 10Ci i wac botgi ni an Rwot me mony, abikelo latica Nebukadnejar rwot me Babilon, ci abicibo komkere iwi gweng man ma ayikoni, ka dong abiyaro kema me ker woko i wigi. 11Nebukadnejar bibino ci loyo jo Ejipt woko. Jo ma myero guto ki two, two gemo binekogi woko, ki jo ma myero kitergi i opii, kibiterogi woko i opii, ki jo ma myero guto i lweny kibinekogi woko ki pala Lucwan. 12An abimoko mac i odi pa lwak lubanga pa jo Ejipt, ci rwot me Babilon biwango lubangagi woko liweng, nyo bitingone ci cito gire kwede woko. Kit macalo lakwat yero nyuggi ki ikom bongone, i yo acelu bene rwot me Babilon biyero kit jami ducu ki i lobo Ejipt, ka dok bene en bia ki kunu ci cito gire ki loc madit. 13En bimuku wir me got matye i Eliopolic matye i lobo Ejipt ma kiworogini; dok en biwango odi pa lwak lubanga me Ejipt gu woko ducu ki mac.”