Jeremia 44

Jeremia otito lok pa Rwot bot Lujudaya ma gitye i Ejipt

1Rwot oloko kweda lok ma okemo Lujudaya ducu ma gibedo i Ejipt, i taun madito me Migdol, Tapanec, ki Mempic, ki i lobo Patroc. 2Rwot me mony, Lubanga pa Icrael, owaco kuman ni, “Wun kikomwu dong wutyeko neno kit can ducu ma aketo ikom Jerucalem ki ikom taun madito ducu ma i Juda. Kadi wa kombedi gitye macalo wi obur, dok ngat mo pe ma bedo i igi. 3Atimo man pien onongo dano gutimo gin maracu dok bene gungeto cwinya omiyo kiniga omaka. Gubedo kawango odok eceta bot lwak lubanga mogo ma gin kikomgi pe gingeyo, wun bene pe wungeyo dok bene kadi wa kwariwu bene yam pe guworo lwak lubanga macalo meno. 4Abedo kacwalo lutica lunebi botwu teretere, kun gitito botwu ni pe myero wutim gin marac me kwer ma iya daggini. 5Ento wun pe wuwinyo dok pe wuketo cwinywu i lok ma mera. Pe bene wumedo ki weko timo gin marac me wango odok eceta bot lwak lubanga mukenegu wa ki acel. 6Pimeno omiyo aonyo kinigana ki akemona mager woko ikom taun ducu me Juda wa ki ikom yoo ducu ma i Jerucalem. Omiyo gudoko obur kit macalo tye kwede wa onyooni.

7Pimeno an Rwot me mony, Lubanga pa Icrael, kombedi apenyowu gin ango ma omiyo wutimo gin marac madit macalo man ikomwu kekenwu. Wun mono wumito kelo can ikom co ki mon, ikom lutino ki lutino lukere, wek ngat mo obed pe ma bidong ki ikin lutuwu i lobo Juda? 8Pingo wungeto cwinya miyo kiniga maka pi woro cal jogiwu ma wutiyo atiya ki cingwu, ki dok pi wango odok eceta bot lwak lubanga mukenegu i lobo Ejipt, kama dong wubino me bedo iye? Wun mono wutimo man ni wek wuto woko, wek rok ducu ma iwi lobo gulok lok me cac ikomwu, dok bene gutii ki nyingwu macalo gin me ceno dano? 9Wiwu mono dong owil woko ikom gin maracu ma kitimo i taun ducu me Juda ki iwanga yoo me Jerucalem, ma kwariwu gutimo, dok luker me Juda kacel ki mon gi, ki wun bene kacel ki monwu wutimo? 10Ento kadi wa onyo pe wumedo ki mwole kenwu pe wubedo ka woro an, dok bene pe wubedo kalubu cik ma mera wa ki gin ducu ma an aciko ma amiyo botwu ki bot kwariwu.

11Pimeno an Rwot Lubanga me mony, Lubanga pa Icrael, abiketo can ikomwu, abineko jo Juda woko ducu. 12Dong pi jo Juda ma onongo gumoko tamgi me cito me bedo i Ejipt, gin ducu kibinekogi woko, gin ducu cake ikom jo matino o kwede ikom jo madito, gibito i lobo Ejipt, i lweny nyo kec ma binekogi. Gibidoko lok lacen dano, dok gin makelo lworo madwong bot dano; dano bibedo kaloko lok cac ikomgi kun gitiyo ki nyinggi macalo gin me ceno dano. 13Abiketo can ikom jo ma gibedo i Ejipt, kit macalo aketo can ikom Jerucalem ki lweny, kec ki two gemo. 14Pe tye ngat mo ki ikom jo Juda ma gudong ma gubino kabedo i Ejipt ma bibwot dok bedo kwo. Dano mo acel ikin gi pe bidok cen i Juda, kama gitye ka tamo ni myero gidok cen wek gicit gibed iyeni. Ngat mo bene ma bidok cen pe, kono luring ayela mogo manok keken aye gibidok kunu.”

15Lacen jo ducu ma gungeyo ni mon gi gutyero odok eceta bot lwak lubanga mukene, ki mon ma gucung kawinyo loke, ki jo ducu ma gubedo i Patroc i lobo Ejipt, gudok iye bota ni, 16“Wadag winyo lok ma itito botwa i nying Rwot. 17Ento wan wabitiyo gin ducu ma dong watyeko kwongo kwong pire; wabiwango odok eceta bot Rwot ma Dako me Polo kun waonyo gityer amatagu bene bote, kit macalo yam watimo, wan ki kwariwa, lukerwa ki lulocwa, i taun ducu me Juda ki i yoo matye i Jerucalem. Ikare meno onongo watye ki cam madwong, onongo walony, dok bene pe onongo waneno kit can mo. 18Ento ikare ma dong waweko wango odok eceta bot Rwot ma Dako me Polo ki onyo gityer amatagu bote, jami ducu dong ocako remowa woko, ki cako nekowa woko i lweny, ki kec bene onekowa otyekowa woko.”

19Mon gumede ki lokgi kun giwaco ni, “I ada wan giwa wabimede ki tyero gityerwa bot Rwot ma Dako me Polo, kun wawango bote odok eceta, dok waonyo bote gityer me amata, pien ikare ma onongo watedo mugati ma pore ki cale, cogwa onongo guye dok bene guneno gin ma wabedo katiyone.”

20Ci awaco bot lwak ducu, mon kacel ki co ma gudoka iye kit man ni, 21“Odok eceta ma wubedo ka wangone i taun ducu me Juda ki i yoo me Jerucalem, wun ki kwariwu, lukerwu ki lulocwu, kacel ki jo me lobo meno onongo wutamo ni Rwot dong wiye owil woko ikom gin ma wutimoni bo? Onongo wutamo ni Rwot pe ngeyo? 22Ikare man lobowu dong odoko obur labongo dano mo ma bedo iye. Odoko gin makelo lworo madwong bot dano, ma dano gitiyo ki nyinge macalo gin me ceno dano, pien Rwot dong onongo pe twero ciro gin maracu ki gin me kwer ma wubedo katimoni. 23Can man opoto ikomwu kit macalo tye wa onyooni, pien wubedo kawango odok eceta dok wutimo bal ikom Rwot. Pe wubedo kalubu cik ma mere ki gin ducu ma en ocikowu kwede.”

24Ci atito ki lwak ducu, makatone bot mon, gin ma Rwot me mony, Lubanga pa Icrael, onongo owaco bot jo Juda ma gibedo i lobo Ejipt ni, 25“Wun kacel ki monwu wucike acika bot Rwot ma Dako me Polo. Wucike ni wubiwango odok eceta bote, kun bene wuonyo gityer amatagu bote, ci wun giwu wugwoko kwong ma wukwongo, dok wucobogi bene kakare. Pimeno wumok kwongwu wutii bene wucob woko liweng! 26Ento wuwiny lok me cike ma an Rwot dong atyeko ketone kun akwonge ki nyinga madit bot jo Juda ducu ma gibedo i lobo Ejipt; pe dok abimiyo ngat mo kwongo kwong ki nyinga kun waco ni, ‘Ma calo Rwot Lubanga tye kwoni.’ 27Nen, abineno ni guneno can, wek pe gubed maber wa ki acel; jo Juda ducu ma gitye i lobo Ejipt kibinekogi woko i lweny, kec binekogi, nio wang ma guto gutum woko liweng. 28Ento jo manok ki ikinwu gibibwot ki i lak to, gin aye gibia ki i lobo Ejipt gidok i lobo Juda. Ci jo Juda ducu ma gudong ki ikin jo mayam gubino i Ejipt gibingeyo lok pa anga ma obedo me ada, mera nyo meggi. 29An Rwot abinyutu botwu lanyut man ma nyutu ni abiketo can ikomwu i kabedo man, wek wunge ni lok ma aloko me keto can ikomwu bibedo ada. 301Abimiyo Parao Kopra rwot me Ejipt woko i cing lukwore ma gimito neke, kit macalo amiyo Jedekia rwot me Juda woko i cing Nebukadnejar rwot me Babilon, ma onongo obedo lakwore ma omito neke woko.”