Jeremia 45

Cike pa Lubanga bot Baruk

11

I mwaka me angwen me loc pa Yekoyakim wod pa Yocia rwot me Juda, en aye Baruk wod pa Neria ocoyo iye lok ma awaco bote kore ki kore. An onongo awaco bot Baruk ni, 2“Rwot, Lubanga pa Icrael, owaco kuman ni, Baruk, 3in iwaco ni, ‘Can iwiya gira! Rwot dok omedo cwercwiny ikom arem ma atye kwede. Dong aol woko ki cur dok pe alimo yweyo mo wa ki acel!’”

4Pimeno Rwot owaco bota me tito bot Baruk ni, “Abimuku gin mayam agero dok aputu gin mayam apitoni woko. Abitimo man ikom wi lobo kulu. 5Itye kayenyo yo ma wek kiteri maber ce? Pe iyeny. Pien nen, abikelo can ikom dano ducu ma bedo i lobo, ento olo twal ibibwot ki i to i kabedo ducu ma itye kacito iye. An Rwot kikoma aye dong atyeko loko man.”