Jeremia 46

Kiloyo Ejipt i Karkemic

1Rwot oloko kweda lok ma okemo lurok. 21Man aye lok ma en owaco ma okemo Ejipt, Rwot oloko ikom mony pa Parao Neko, rwot me Ejipt, mayam Nebukadnejar rwot me Babilon oloyo i lweny i Karkemic macok ki kulu Euprate i mwaka me angwen me loc pa Yekoyakim wod pa Yocia rwot me Juda, kun waco ni,

3“Ludito me Ejipt gidange ni,

‘Wuruk nyonyo me gengo korwu dok wuyube ki kwotwu bene,

ci wucit i lweny!

4Wutwe kom me bedo iwi aguragura;

wubed iwigi, wun wegi aguragura!

Wucung i tyeng ci wuruk otangwic me nyonyo!

Wupak leb tongwu obed mabit!

Wuruk koti nyonyowu ikomwu!’”

5Rwot penyo ni, “Gin ango mono ma atye kanenoni?

Aneno gitye kaloke gidok woko cen ki lworo madwong,

kun cwinygi bene obale woko.

Twoni lwenygi ducu kiketo ret woko ikomgi,

ci gitye karingo woko oyotoyot; ma pe gineno ngegi,

pien lworo dong oketo komgi woko!

6Jo ma gidwir i ngwec pe gitwero bwot;

ki lulweny matego bene pe gitwero bwot.

Ki tung kumalo inget kulu Euprate giyoke atata ci gipoto woko.

7Man anga matye ka tinge malo calo pii me kulu Nail,

macalo pii ma opong woko libyeny wa i dog geng ma mol amola?

8Ejipt aye tye katinge calo pii me kulu Nail,

calo kulu ma piine opong woko libyeny wa i dog geng.

Ejipt owaco ni, ‘Abitinge aumu lobo woko,

ci abijwero taun madito kun aneko jo ducu ma bedo iye woko.’

9Cok aguragura gucak wot,

ki gadigadi bene gucak lore!

Cwal lulweny gucit gukat anyim:

jo Etiopia ki Put ma gumako kwot,

wegi atum ma ludiro i mako atum

ma gua ki i Lud.”

10Man aye nino pa Rwot Lubanga me mony;

tin dong en biculu kwor,

tin dong en biketo can ikom lukwore.

En binekogi woko ki pala lucwan nio wang ma otyekogi woko liweng,

ma nongo leb palane dong opune woko ki remo keken;

tin en aye Rwot Lubanga me mony tyero lukwore macalo gitum i lobo matye tung kumalo, inget kulu Euprate.

11Wun jo Ejipt, wucit i Gilead,

ci wuyeny yat me cango two!

Yatwugu ducu nen gin ma konye peke;

gin mo matwero cangowu peke.

12Lurok dong guwinyo pi kit lewic ma wutye kwede;

jo ducu dong guwinyo kokowu oromo i lobo woko;

pien lalweny acel acel dong tye kayoke ki lawote,

ci gin ducu gipoto woko i ngom.

Nebukadnejar olwenyo ikom Ejipt

132

Rwot dok oloko kweda ikare ma Nebukadnejar rwot me Babilon bino ka lweny ikom Ejipt, kun waca ni,

14“Tuc lok man i taun ducu me Ejipt,

kun itito i Migdol, Mempic, ki Tapanec ni,

‘Wucung matek, dong wuyube bene me lweny;

gin ducu ma wutye kwede kibibalo woko i lweny!’

15Pingo Apic ma lubangawu dong owekowu opoto woko piny?

Cal twon ma wutiyoni kono pe romo cung pingo?

Pien Rwot obijwere woko lirwat piny yoko poto wa ingom.

16Lwakwu guyoke ci gupoto,

kun dano acel acel waco bot lawote ni,

‘Wot oyotoyot! Wek wadok cen bot lutuwa,

wek wabwot woko ki i lak pala pa lukworwa!’

17Lwong Parao, rwot me Ejipt, ki nying manyen ni,

‘Ngat ma woo tutwal ma oweko gume okato.’

18An a Rwot me mony, an aye Rwot.

An Lubanga makwo,

Calo got Tabor ma wiye bor kato wi godi ducu,

ki got Karmel ma ocung mabor i dognam,

tek pa ngat ma bino ka lweny ikomwu tye kitmeno.

19Wuyube kun wutweyo yecwu

woko me cito i opii, wun jo Ejipt.

Pien Mempic dong bidong nono, bidong wi obur,

ma dano mo peke iye.

20Ejipt nen calo laroya dyang maber mucwe,

ento lwango ma gikayo dyangi ma gua ki tung kumalo gitye ka lweny ikome.

21Kadi acikarine bene ma kipangogi apanga ki lim

gicalo roya mucwe kun gimoo adada gudoko goro ma tekogi peke.

Gin guloke guringo woko kacel, pe gucung,

pien nino me keto can ikomgi onongo dong oromo woko,

en aye bene nino me pwodogi.

22Ejipt tye karingo woko kun kok cur acura calo twol,

pien lukwore gitye kabino ki tek,

ma gibino ka lweny ikome ki latong

calo jo matye katongo yadi.

23Kibitongo yadi me bunganegu woko,

kadi bed onongo bungane pe kiromo kato ki iye,

pien jone gidwong mada ma pe kitwero kwano welgi,

acikarigi pol ma welgi kato wel bonyo woko.

24Kibimiyo lewic bimako jo Ejipt woko,

kibimiyogi woko i cing jo ma gua ki i lobo matye tung kumalo.

Man an Rwot ma awaco.”

25Rwot me mony, Lubanga pa Icrael, owaco ni, “Abiketo can ikom Amon, ma en lubanga me Tebec, kacel ki Ejipt ki lwak lubangane ki lukerne ducu. Abiketo can ikom Parao kacel ki jo ducu ma gigeno en. 26Abimiyogi i cing jo ma mito nekogi, abimiyogi i cing Nebukadnejar rwot me Babilon ki luditone. Ento lacen dano dok gibibedo i Ejipt aye, kit macalo yam gubedo ikare ma okato con. An a Rwot me mony dong aloko.”

Rwot bilaro jone

273

“Pe wulwor, wun likwayo pa latica Yakobo;

wun jo Icrael, cwinywu pe myero obale woko.

Abilarowu ki i lobo ca matye kama bori,

abilaro likwayowu bene ki i lobo mayam kiterowu iye i opii.

Likwayo pa Yakobo gibidwogo cen ci gibedo mot ki kuc;

ngat mo pe dok bimiyo gibedo ki lworo.

28Pe wulwor, wun likwayo pa latica Yakobo,

man an Rwot ma awaco, pien atye kwedwu.

Abijwero jo me rok ducu atyekogi woko,

ki kama yam aryemowu wuket iye,

ento pe abityekowu woko liweng.

Pe abiwekowu ma pe aketo can ikomwu;

abipwodowu ma berber pe ki kiniga tutwal.

Man an Rwot ma awaco.”