Jeremia 47

Lok pa Rwot ma okemo jo Piliciti

11

Ma pud peya Parao olwenyo ikom Gaja, Rwot oloko kweda lok ma okemo jo Piliciti.

2Rwot owaco kuman ni,

“Nen, pii otinge yo tung kumalo,

bimol calo kulu ma opong woko libyeny ma piine mol calo lalele.

Bimwonyo lobo woko calo pii aluka ki gin ducu matye iye,

taun madito ducu kacel ki jo ma bedo i igi.

Dano gibidange matek,

ki jo ducu ma gibedo i lobo gibikok.

3Gibiwinyo obot tyen aguragura,

ki mor pa gadigadi lweny,

ki koko pa lawala me gadigadi.

Lunyodo pe dong gibiloke me neno lutinogi;

dong cinggi bene nongo okwe woko.

4Pien kare dong oo me tyeko jo Piliciti woko,

wek kijuk kit lukony ducu

ma pud gudong i taun me Turo ki Cidon.

An Rwot kikoma aye ma abityeko Lupiliciti,

gin jo ducu ma gua gubino ki i dog nam me Kaptor.

5Cwercwiny madit dong obino bot jo Gaja,

ki jo Acikelon guto gutum woko.

Wun jo Anak ma odong wubikumu pi kare marom mene?

6Wun Piliciti wudange ni, ‘Pala lucwan pa Rwot!

Ibibedo ka jwerowa woko pi kare marom mene?

Rwake kekeni i akurani, wek iywe, ibed mot!’

7Ento loki biywe maber ningning?

Ma kun an Rwot dong atyeko miyo tic woko bot pala lucwan me atiyani?

Atyeko cikone pi lweny ikom jo Acikelon

ki ikom jo ma gibedo i lobo matye i dog nam.”