Jeremia 48

Kibibalo Moab woko

11

Man aye lok ma Rwot me mony, Lubanga pa Icrael, owaco ikom Moab ni,

“Can iwi jo Nebo,

pien taun gi dong kijwero woko odong nono!

Kiriataim dong kimako woko,

cel gogone mategogu ducu dong kimukugi woko piny,

ki jone dong kiketo lewic iwigi matek;

2deyo pa Moab dong orwenyo woko matwal.

Lumerok tye kapiro lok me timo gin marac ikom Moab i Kecbon, ni,

‘Wek watyek rok me Moab woko.’

In taun me Madmen bene ibiling woko litik;

dul mony biwot kun cito ka lweny ikomi.

3Jo Koronaim gitye kadange ni,

‘Lobowa dong odong woko nono! dano ducu dong kinekogi woko liweng!’

4Dong kijwero Moab woko;

lutinone gitye kakok.

5Winy kit ma gikok kwede matek,

kun giito cere me Lukit;

gikok pi neno kit macalo lobo dong kibalo kwede woko,

ki i yoo ma dok piny i Koronaim.

6Gin giwaco ni,

‘Wuring oyot! Wuring, wular kwowu!

Wuring calo kana me tim!’

7Wun jo Moab, yam wugeno cel gogowu ki lonyowu,

ento kombedi dong kibiterowu woko;

ki Kemoc ma lubangawuni

kibitero kacel kwedwu i opii,

kacel ki ajwakine ki rwodine ducu.

8Lamerok ma gibalo taun madit gibibino ikom taun ducu,

ma pe tye taun mo ma bibwot;

nota kacel ki bar bene kibibalogi woko liweng,

kit macalo an Rwot dong atyeko lokoneni.

9Wuket gweng lyel i Moab,

pien dong kibijwero woko.

Taun gi ducu kibiweko dong obur,

dano mo pe ma bibedo kunu dok aye.”

10(Kicen dano ma pe tiyo tic pa Rwot ki cwinye ducu! Kicen ngat ma pe neko dano ki pala lucwane!)

Kijwero taun madito ducu me Moab woko

11Rwot owaco ni, “Moab yam obedo mot maber, dok bene yam pe kitero jone i opii. Moab obedo calo kongo bwino ma kiweko ni ocek mot, ma pe kiyelo, dok pe kionyo woko ki i opoko matye iyeni i i opoko mukene. Mite bene pe obale, bile mere mamit kit macalo yam tye kwede con.

12Pimeno, nen, kare tye kabino, ma abicwalo dano gionyo Moab woko calo kionyo kongo bwino. Kibionyo kongo bwinone woko piny, ci kineko opokone kingido woko matinotino. 13Man bimiyo lewic mako jo Moab pi Kemoc ma lubangagi, kit macalo lewic yam omako jo Icrael pi Betel, ma en lubanga ma onongo yam gigeno tutwali.

14Wun jo Moab, pingo wun wuete kawaco ni wun cogi oteka lweny,

wutamoni wun lulweny ma cwinywu tek dok wuloyo lweny?

15Kijwero Moab woko liweng ki taun gi;

awobene mabeco ma kiyerogi ayera kinekogi kityekogi woko.

An Rwot, Rwot me mony, aye ma awaco man.

16Can ma bio ikom Moab dong tye cok,

kare me tyekone woko dong tye kabino oyotoyot.

17Wukum pi rok meno, wun jo ma wubedo cok kangete,

wun ducu ma wungeyo ywekane.

Wuwac ni, ‘Dong kituru twero matek me loce woko do!

Deyone ki teke dong pe matwal.’

18Wun jo ma wubedo i Dibon,

wulor woko ki i kabedowu me deyo wubin woko piny,

ci wubed i ngom i apwa!

Pien lamuk Moab dong obino ikomwu,

omuku cel gogone mategogu ducu woko wuweko odong obur.

19Wun jo ma wubedo i Aroer,

wucung inget yoo kong wukur;

wupeny co ki mon ma gitye kalwi gicito woko

wek gutit botwu gin ma otime.

20Ci gibidok iye botwu ni, ‘Moab dong otyeko poto;

wukok pire, dong kityeko keto lewic woko iwiye.

Tit lok man inget kulu Amon

ni Moab dong kijwero woko, iye odong nono!’

21Ngolo kop dong obino ikom taun madito matye i apyel; ma gin aye, Kolon, Jakaja, Mepat, 22Dibon, Nebo, Bet-diblataim, 23Kiriataim, Bet-gamul, Bet-meon, 24Keriot, Bojra ki taun ducu me lobo Moab matye kamabor ki matye kamacok. 25Moab dong ki nginyo adada, tekone bene kityeko woko. Man an Rwot ma awaco.”

Kibimiyo lewic mako Moab

26Rwot owaco ni, “Wumii Moab omat mat wek omer woko, pien dong ojemo woko ikoma. Moab bibedo kangene i ngoke kekene, ci dano gibinyere kun gicaye. 27In Moab kong i po kit macalo ibedo kacayo kwede jo Icrael. Itamo ni onongo gin gubedo lukwo omiyo itimogi maraci? Pien ikare ducu ma iloko pirgi nongo i yengo wii ayenga.

28Wun jo ma wubedo i Moab myero wuwek taunwu woko! Wucit wubed ikin got ma obar. Wubed calo akuri magero ode i kor got ma ocule. 29Moab luwake tutwal! Dong watyeko winyo kit wake, nyate, ki bwola ma dano gitye kwede i cwinygi kun gitamo pirgi ken gi. 30An Rwot, angeyo cacgi. Dok nyategi bene obedo gin me bwolo, kadi gin ma gitiyo ducu bene obedo gin me bwolo. 31Pimeno, abikok pi Moab, kun akumu pi jo Moab ducu. Abikumu bene pi jo Kir-kerec. 32Abikok pi jo Cibma makato ma akok pi jo Jajer. In i taun madit me Cibma ibedo calo yat olok ma jange boco ongolo nam oo wa loka tungcel, ma ocito oo wa i Jajer. Ento nyig yadiwu me oro ki nyig olokwu dong kibalo woko. 33Yomcwiny ki yomic madwong mayam dano gitye kwede dong kikwanyo woko ki i lobo Moab ma onongo ceko cami. Ajuku kongo bwino woko omiyo pe mol ki i bur kama ginyono nyig olok; pe tye ngat mo ma nyono nyig olok kun dange pi yomcwiny.

34Jo Kecbon ki Eleale gitye ka dange ma dwon gi winye kamabor wa i Jakaj; jo matye i Joar bene winyo dwon gi, dok bene winye kamabor wa i Koronaim ki i Eglat-celiciya. Pii me Nimrim bene dong otyeko two woko liweng. 35Abijuku jo Moab pe dok gibityero gitum ki wango odok eceta iwang jogi bot lubangagi. An Rwot, dong aloko man. 36Ma omiyo atye ka kumu i cwinya pi Moab ki pi jo Kir-kerec calo dano matye kakutu nyamulere ki wer lyel, pien lonyo ki jami ducu mayam gulimo dong orwenyo woko matwal. 37Dano acel acel olyelo wiye dok onyaro yer tike woko pi kwero cola. Cinggi ducu kingolo bedo bur, dok dano acel acel tye oruku bongo cola ipyere. 38Iwi odi ducu matye i Moab ki i dye taun gi ducu iwinyo koko keken, pe gin mo mukene mapat. Dong atyeko neko Moab woko macalo agulu ma ngat mo pe paro pire. An Rwot dong aloko. 39Nen kit ma kibalo kwede Moab! Winy kit ma jone gikok kwede! Nen kit ma kikelo kwede lewic ikom Moab! Moab dong odoko gin ayeta, gin makelo lworo madwong bot rok ducu ma gurume.”

Moab pe twero bwot

40Rwot dong otyeko cike woko ni tye rok mo ma bituk oyotoyot bino lyane piny ikom Moab calo ocur ma oyaro bwome woko. 41En owaco ni, “Taun ducu kacel ki cel gogo ducu ki bimakogi woko. Inino meno cwiny lulweny me Moab bipong ki lworo calo dako matye ka rem ki nywal. 42Kibijwero Moab woko dong pe bibedo rok matwal, pien dong onongo ojemo woko ikoma. 43Gin makelo lworo madwong, bur ki owic dong tye kakuruwu wun jo Moab. An Rwot, dong aloko. 44Ngat mo ma bitemo ni ering gin man makelo lworo madwongi bipoto i bur, ki ngat ma bia ki i bur kati woko bimoko i owic, pien dong atyeko keto kare me keto can ikom jo Moab. An Rwot, dong aloko. 45Luring ayela ma gigoro gitye kayenyo kagwoke i taun madit me Kecbon. Ento Kecbon, ma en aye taun madit mayam rwot Cikon obedo iye, dong tye kawang ki mac. Mac dong otyeko wango kacungu pa jo Moab ki wi godigi ma boco mayam lulweny me Moab gimaroni. 46Can iwiwu, wun jo Moab! Dong kityeko neko jo mayam giworo Kemoc woko, dok awobegi ki anyiragi bene dong kiterogi woko i opii. 47Ento ikare matye anyim, abidwoko gum pa Moab bote kakare. Man lok pa Rwot kikome.” Kop ma kingolo ikom Moab ogik kany.