Jeremia 49

Kop ma Rwot ongolo ikom jo Ammon

11

Man aye lok ma Rwot owaco ma okemo jo Ammon. En openyo ni, “Jo Icrael gitye kwene? Gin mono pe gitye ki laleyo mo ma myero ocung ikom lobogi? Pingo guweko jo ma giworo Molek gukwanyo dul lobo ma i kaka pa Gad dok gudoko lubedo i taun gi? 2Pimeno, nen, nino tye kabino, en kare ma abimiyo jo me Raba winyo dwon me koko me lweny, ci taun madit pa jo Ammon kibiweko dong obur ki gangine ducu bene kibiwangogi woko ki mac. Lacen jo Icrael dong bimayo lobogi woko ki i cing jo mayam gumayo woko ki botgi ca. An Rwot, dong aloko. 3Wukok atika, wun jo Kecbon! Pien Ai ma taunwu dong kijwero woko, iye odong nono! Wukok ki kumu madit atika, wun anyira Raba! Wuruk bongo cola ci wubed kakumu.

Wubed kangwec atata ki iwi celgu. Molek ma lubangawuni kibitero woko i opii, kacel ki ajwakine ki luloce bene. 4Pingo wun jo ma pe wugeneni wutye kanyate pi tekowu? Pingo wugeno tekwu kun wuwaco ni ngat mo pe ma bitwero bino ka lweny ikomwu? 5Nen, abikelo gin mamiyo lworo madwong makowu ki i kabedo ducu. Wun ducu kibiryemowu woko. Dano acel acel biringo laro kwone, ngat mo bene bibedo pe ma bicoko luring ayela dwokogi cen kacel.

6Ento lacen abidwoko gum pa jo Ammon botgi doki. An Rwot, dong aloko.”

Kop ma Rwot ongolo ikom Edom

72

Man aye gin ma Rwot me mony owaco ma okemo Edom ni, “Ryeko me ngolo kop maber mono dong orweny woko ki bot jo Teman? Lumii tamgi dong mono pe twero tito botgi gin ma myero kitim? Ryekogi mono dong orywenyo woko liweng? 8Wun jo Dedan, wuloke wuring woko! Wucit wukane woko kamatut! Abineko likwayo pa Ecau woko, pien kare dong oo ma myero aket iye can ikomgi. 9Ka dano gubino kapwono olok, ci giweko mogo iwi yate; dok bene ka lukwo gubino idyewor, giyako jami ma oromo kit ma gimito keken. 10Ento ajwero likwayo pa Ecau woko adada, dok ajwero kabedogi ma onongo gukane iye abalo woko, man miyo dong pe gibikane matwal. Jo Edom ki wadigi ki luwotgi ducu dong kinekogi woko, ngat mo pe odong. 11Wuwek lutino kicwu ma wegigi peke bota, an abigwokogi. Mon towu ducu gibigeno an.

12Kace onongo jo ma pe myero kiket can ikomgini gumato gin matye i kikopo me can, dong wutamo ni wun wubibwot ma pe kong nongo kiketo can ikomwu? Pe gire, myero kong wumat gin matye i kikopo me can! 13An dong atyeko kwongo kwong woko ki nyinga kekena ni taun madit me Bojra bidoko gin marac ma dano uru, dok tim aroo ma iye odong nono; dano gibiloko lok agec ikome kun gitiyo ki nyinge macalo gin me ceno dano. Gangi ma i ngetegu ducu bidoko wi obur matwal. An Rwot, dong aloko.”

14Ci awaco ni, “Anongo lok ma oa ki bot Rwot. En ooro lakwena me tito bot rok ducu ni, ‘Wucok dul monywu ducu kacel wubin ka lweny ikom Edom! Wuyube pi lweny! 15Rwot bimiyo rokwu bedo goro, dok dano gibicayowu mada. 16Wake ma wubedo kwede obwolowu mere nono. Ngat mo pe ma lworowu kit macalo wutamo ni kilworowuni. Wubedo ikin got ma obar, malo wa iwi got mabor; ento kadi bed wuger odiwu malo calo ocur ma ogero ode malo, Rwot bikelowu woko ki kunu wa piny. Man lok pa Rwot kikome.”

17Rwot owaco ni, “Can marac kit man bipoto ikom Edom ma bimiyo jo ma gikato ki ka kenyo gibedo ki ur, dok lworo makogi marac pi gin ducu ma guneno ma dong otyeko time ikom Edom. 183Kit gin acel ma otime ikom Codom ki Gomora ikare ma gin ki taun gi ma cokcok kwedgi kityekogi woko bitime bene ikom Edom. Ngat mo ma bibedo kunu pe bibedo tye, kadi bed pi kare mo manok keken. An Rwot, dong aloko. 19Nen, abibino macalo labwor ma bino i dye olet romi kun a ki i bunga ma yadine gucule woko liking matye i dog kulu Jordan, abimiyo jo Edom giringo woko ki i lobogi, ka dong lacen dano mo ma ayero ni obed latela aye biloyo rok meno. Anga ma kitwero poro ki an? Anga matwero ette me pyem kweda? Kit laloc ango mono matwero cung inyima? 20Pimeno, dong wuwiny kit yub ma an Rwot, dong atyeko yubune ikom jo Edom, ki gin ma dong ayube me timone ikom jo ma bedo i taun madit me Teman. Kadi bed wa lutinogi kibiywayogi woko, ci bimiyo dano ducu gibedo ki ur matek ikom can meno ma opoto ikomgini. 21Ka Edom opoto ci more bimiyo lobo yenge, ki koko odurugi bene biwinye kamabor wa i Nam Makwar. 22Nen, lamerok bibino lwenyo ikom Bojra calo ocur ma tuk ki malo i pol kun lyane piny ma nongo oyaro bwome woko. Inino meno lulweny me Edom cwinygi bibedo ki lworo calo cwiny dako matye karem ki nywal.”

Kop ma Rwot ongolo ikom Damaciko

234

Man aye lok ma Rwot oloko ma okemo Damaciko ni, “Jo ma i taun madito me Kamat ki Arpad alee dong otwodogi woko, pien guwinyo lok marac, ci cwinygi dong tye ma ongabe angaba ki lworo, calo nam ma twage, ma pe twero limo yweyo mo wa ki acel. 24Jo Damaciko ducu dong gudoko goro, dong guloke me ringo woko ki lworo madwong. Gitye ki arem me cwercwiny madwong calo dako matye karem ki nywal. 25Taun madit mayam oywek ma onongo yomcwiny dwong iyeni dong kibalo woko iye odong nono. 26Inino meno awobe kacel ki acikari ducu ki binekogi woko i dye taun madit. An Rwot me mony, dong aloko. 27Abimoko mac ikom odi madongo me Damaciko, ci abiwango gangkal pa Benadad woko.”

Kop ma kingolo ikom kaka me Kedar ki ker me Kajor

28Man aye lok ma kitito ikom kaka me Kedar ki ker ducu me Kajor mayam Nebukadnejar rwot me Babilon olwenyo ikomgi ci oloyogi wokoni, Rwot owaco kuman ni, “A icit ka lweny ikom jo Kedar, ci inek jo me kaka matye kunyangoni woko. 29Yak kemagi, ki romigi, ki bongo kicika me kemagi wa ki jami ducu matye i kemagi. Yak kinagagi kun itito bot lwak ni, ‘Lworo madwong dong oromo i lobo ducu!’

30Wun jo Kajor, acikowu ni myero wuring wukane woko kamabor. Pien Nebukadnejar rwot me Babilon dong otyeko yubu yub me timo gin marac ikomwu, kun waco ni dong bene etyeko piro lok woko ikomwu.

31Wua wubin, wucit ka lweny ikom rok mayam bedo ki kuc labongo ayelayela mo! Taun gi madit pe tye ki dogcel kadi wa rii me lorone bene peke, pimeno tye kene, ngat mo ma gwoko bene peke.

32Kinagagi kacel ki dyangigi kibiyako woko! Abikeyo jo ma nyaro yer wigi dong ma cegoni woko i kabedo ducu, dok bene abikelo can madit ki i kabedo ducu aketo ikomgi. Man an Rwot ma awaco. 33Kajor bidoko tim aroo matwal, i kabedo ma too keken aye bedo iye. Ngat mo pe bibedo kunu, dok ngat mo bene pe bicito kunu me bedo iye.”

Kop ma kigolo ikom Elam

34Cutcut i acaki me loc pa Jedekia rwot me Juda, Rwot oloko kweda lok ma mako lobo Elam. 35Rwot me mony owaca kuman ni, “Abineko wegi atum ma gumiyo lobo Elam odoko mateki woko ducu liweng. 36Abimiyo yamo a ki i twok piny ducu ci bikodo ikom Elam kun keyo jone woko ki i kabedo ducu, nio wang ma lobo mo pe bidong ma luring ayelagi bibedo ma pe gularo i iye. 37Abimiyo jo Elam gibibedo ki lworo ikom lukworgi ma mito nekogi wokoni. Abikelo gin marac ikomgi pi kinigana madit dok abicwalo mony ikomgi nio ka kityekogi woko liweng. 38Abineko luker ki rwodi pa jo Elam woko, ci abicibo komkera woko kunu. Man an Rwot ma awaco. 39Ento lacen abidwoko gum pa jo Elam botgi doki. Man an Rwot ma awaco.”