Jeremia 50

Lok ma kitito ikom Babilon

11

Man aye lok ma Rwot oloko bota ikom Babilon ma en aye lobo pa jo Kaldaya ni,

2“Wutuc lok man bot rok ducu dok wutit pire bene.

Wuting bendera malo kamaleng ci wutit lok man.

Pe wugwok lok man obed macalo lok me mung,

ento wuwac ni, ‘Babilon dong opoto!

Bel ma lubangane dong lewic omako woko.

Merodak bene cwinye obale woko.

Cal lubanganegu ducu dong lewic omakogi woko,

ki cal jogine dong ki nginyo woko!’

3Rok ma oa ki i lobo matye yo tung kumalo obino ka lweny ikom Babilon, bibalo lobo miyo doko tim aroo. Dano ki lee gibiringo woko, dong ngat mo ma bibedo kunu bibedo peke.”

Dwogo pa jo Icrael i lobogi

4Rwot owaco ni, “Ka kare meno oo jo Icrael ki jo Juda gibibino ki koko, kun giyenyo an Rwot Lubangagi. 5Gibipenyo pi yoo ma cito i Cion, ci gibicito gikemo kunu atir. Ci gibiketo gicike ma bedo nakanaka ki Rwot ma pe gibiturune, dok wigi bene pe biwil iye.

6Jona dong gitye macalo romi ma gurwenyo woko, ma lukwatgi aye oweko gurwenyo woko ki iwi godi. Gubedo kawot ki ikom got man kun gicito ikom got mukene, ma wigi owil woko kama dwolgi tye iye. 7Jo ducu ma onongogi onekogi woko. Lukworgi dong guwaco ni, ‘Gin gubalo ikom Rwot, piman gin ma watimo ikomgini pe gin mo marac. Kwarigi yam guketo gen gi ikom Rwot, ci gin kikomgi onongo bene myero gubed lugen ikome.’ 82

Wun jo Icrael wuring woko ki i Babilon! Wuwek lobo pa jo Kaldaya! Wubed dong jo mukwongo me weko lobo macalo nyok dyel ma telo nyim dyegi! 9Nen, abitugu lwak pa rok ma gitego ma gitye yo tung kumalo, ci abimiyo gibino ka lweny ikom Babilon. Gibirye woko i tyeng pi lweny ikom Babilon ci gibimako woko. Gibicelo atero macalo lulweny ma gikwiri ma pe gicelo aterogi piny nono. 10Kibiyako lobo pa jo Kaldaya; jo ma biyako bene gibiyako gin ducu ma igi mito, man an Rwot ma awaco.

Poto pa Babilon

11Wun jo Babilon dong wuyako roka woko. Kadi bed cwinywu yom, kun wuwake macalo laroya dyang ma camo lum, nyo macalo twon aguragura ma bwaro, 12gangwu dong bipong ki lewic dok ki cac madit. Lobo Babilon ma en aye minwu dong biloke doko rok mo matidi adada ikin rok ducu; bidoko lobo mutwo dok tim aroo ma pii pe iye. 13Pi kinigana, ngat mo pe ma bibedo i Babilon; lobo man ducu bidoko obur ma iye odong nongo. Jo ducu ma gibikato ki inget Babilon gibibedo ki ur madit kun gibijwat pi gin man ma otimeni.

14Wun wegi atum, wucung i tyeng pi lweny ikom Babilon, ci wurum woko. Wucel aterowu ducu ikom Babilon, pien dong otyeko timo bal woko ikoma, an Rwot. 15Wudange ki woo me lweny kun wurumu kwede ki taun madit man woko. Babilon kombedi dong omiine woko kene. Cele ducu dong kimuku kireto woko piny. Man an Rwot aye atye kaculu kwor ikom jo Babilon. Pimeno wucul kwor ikomgi, wutimgi kit macalo yam gin gutimo kwede jo mukeneni. 16Pe wuwek jo ma coyo kodi obed tye i Babilon, ki jo ma gimako pala me kayo kac bene gubed peke. Larok mo keken ma bedo kunu bibedo ki lworo ikom mony matye ka lweny ci bimiyo dok cen i lobone kikome.

Dwogo pa jo Icrael i lobogi

17Jo Icrael gubedo calo romi ma labwor dwaro ci oryemogi oketogi woko ata. Mukwongo rwot me Aciria yam olwenyo ikomgi, ka dok Nebukadnejar rwot me Babilon omwodo cogogi woko. 18Pimeno, an Rwot me mony, Lubanga pa Icrael, abiketo can ikom rwot Nebukadnejar ki lobone, kit macalo yam aketo kwede can ikom rwot me Aciriani. 19Abidwoko jo Icrael woko cen i lobogi. Gibibedo kacamo cam ma cek iwi got Karmel ki i dul lobo me Bacan, dok bene gibicamo gin ducu ma igi mito ma ocek iwi cere i lobo Epraim ki Gilead. 20Ka kare meno oromo, ci pe kibinongo bal mo i Icrael, kadi ki tim maracu bene pe kibinongo i Juda, pien dong abitimo kica bot jo ma aweko gibedo kunu. Man an Rwot ma awaco.”

Kop ma Rwot ongolo ikom Babilon

21Rwot waco kuman ni, “Wucit wulweny ikom jo Merataim, ki Pekod. Wunekgi wutyekgi woko liweng. Dok wutii gin ducu ma acikowu. 22Woo me lweny dong tye kawinye i lobo dok lobo bene dong kibalo woko marac adada. 23Babilon dong ogoyo lobo woko piny ki nyol, ento koni nyol meno dong ongide woko matinotino. Rok ducu gitye ki ur madit pi gin ma dong otime ikom Babilon. 24Babilon, dong ityeko moko woko i owic ma aciko piri, kun pe onongo ingeyo. Kinongi dong imoko woko pien onongo ipyem kweda. 25Dong ayabo kabedo kama akano iye jami lwenya, akwanyogi akelogi woko ki kiniga, pien an Rwot Lubanga me mony, atye ki tic ma myero atii i lobo Babilon. 26Wubin wucak lweny ikome i kabedo ducu; wuyab derone wokogu ducu. Wucan jami ma kiyakoni wek odure lipim calo ngano ma kiduru. Wujwer lobone woko ni rwatrwat! Pe wuwek gin mo odong iye kadi ki acel. 27Wunek twonigi woko ducu! Wunekgi woko liweng. Can iwi jo Babilon, pien karegi dong oromo. Kare dong oo me keto can ikomgi!

28(Luring ayela ma gin jo ma gubwot ki i Babilon gubino i Cion, dok gutito kit macalo Rwot Lubangawa oculu kwede kwor pi gin mayam jo Babilon otimo ikom ot ma mere.) 293

Wulwong wegi atum me lweny ikom Babilon. Wucwal jo ducu ma gingeyo telo atum ki celo atero gucit. Wurum gang woko, pe wuwek ngat mo obwot. Wucul kwor ikome pi gin ducu mayam en otimo, dok bene wutim en kit macalo yam en otimo kwede jo mukeneni, pien en yam oete ikoma ki wake madit, an a Rwot ngat Maleng pa Icrael. 30Pimeno awobegi kibinekogi woko i dye taun madit, ki acikarine bene kibinekogi kityekogi woko inino meno. Man an Rwot ma awaco.

31Nen, atye ki lok ikomwu wun jo ma luwake, man Rwot me mony ma owaco; pien ninowu dong oo, en aye kare ma abiketo iye can ikomwu. 32Rok ma lawakeni biyoke ci poto woko, dong ngat mo ma bikonyone me ilone malo bibedo peke. Abicwinyo gangiwu woko ducu ki mac, dok gin ducu ma orumu gangi kibibalo woko liweng.”

33Rwot me mony owaco kuman ni, “Kitye ka unu jo Icrael ki jo Juda matek mada. Jo ma dong gumakogi macalo opii gitye kagwokogi adada, ma pe giye ni gucit wa ki acel. 34Ento ngat ma kokogini tek, nyinge Rwot me mony. En kikome aye ma dong bipido lokgi, dok bikelo kuc i lobo, ento bikelo can ikom jo Babilon.”

35Rwot waco ni,

“Kinek jo Babilon! Kinek jo Kaldaya woko!

Kinek rwodine ki luryekone ducu woko.

36Kinek lutyet ma lugoba,

ma gin cogi luming mogo ma pe twereni.

Kinek lulwenye,

myero kinekgi kityekgi woko.

37Wunek aguragurane dok wubal gadigadi lwenye wutyek woko!

Wunek jo me dul mony pa lurok ma kiwilogi ki lim me bino ka lweny;

dong gibidoko goro calo mon.

Wubal lonyonegu woko ducu,

wuyak jamigi woko liweng.

38Wek kot pe ocwer i lobone,

wek piine otwo woko liweng!

Babilon aye lobo ma opong ki cal jogi mapol adada,

omiyo jo ma worogi gudoko calo lupoya. 394

Pimeno lee me tim gibibedo kacel ki lalur ki udu i Babilon, dano dong pe bibedo kunu matwal, dok bene dano pe dong bibedo iye pi kare pa yalwak ducu. 405Kit gin acelu bitime ikom Babilon, mayam otime ikom Codom ki Gomorani, ki ikom taun pa luwotgi ma orumu ka ngetgi ma Lubanga otyekogi. Dano mo pe bibedo kunu, dok ngat mo bene pe bibedo iye macalo welo. Man an Rwot ma awaco.

41Nen, lwak me rok moni tye kabino kun gia ki i lobo matye yo tung kumalo;

rok matek ki luker mapol matye kamabor mada gitye kayube pi lweny.

42Dong gumako atumgi ki tonggi woko liking;

giger adada, pe gitye ki kica mo wa ki acel;

woogi winye calo nam matye kamor.

Guringo ki aguragura,

ma gurye woko calo jo ma dong kuru lweny akura,

ikomwu, wun jo Babilon!

43Rwot me Babilon bene dong otyeko winyo lok ikomgi,

ci cinge bene dong okwe woko ma pe dong twero timo gin mo;

remcwiny madwong dong oketo kome woko,

calo arem pa dako matye karem ki nywal.

44Nen, abibino macalo labwor i olet romi kun aa ki i bunga me Jordan ma yate ocule liking, ci abimiyo jo Babilon giringo woko ki i lobogi. Dong lacen dano mo ma ayero ni obed latela aye biloyo rok meno. Anga mono ma kitwero poro ki an? Anga matwero ete me pyem kweda? Kit laloc ango mono matwero cung inyima? 45Pimeno, dong wuwiny kit yub ma an Rwot, dong atyeko yubune ikom jo Babilon, ki gin ma dong ayube me timone ikom lobo pa jo Kaldaya. Kadi wa lutinogi kibiywayogi woko, ci bimiyo dano ducu gibedo ki ur matek ikom can meno ma opoto ikomgini. 46Ka Babilon opoto, ci more bimiyo lobo yenge, ki koko oduru ma kigoyo pire bene biwinye wa ikin rok mukene ducu.”