Jeremia 51

Kop ma Rwot ongolo ikom Babilon

1Rwot owaco kuman ni, “Abikelo gin ma neko piny ikom Babilon ki ikom jo Kaldaya. 2Abicwalo lurok kapyeto Babilon calo cung kal ma kipyeto ma yamo kolo tero woko. Ka nino me can man obino ci kibilwenyo ikom dano i kabedo ducu, ci biweko lobo dong nono. 3Pe wumii kare ki jo Babilon me celo aterogi nyo me ruku koti nyonyogi me lweny. Pe wubwot awobegi makwo. Wutyek dul monygi woko liweng. 4Kibiketo ret ikomgi ci gibito i dye yoo me taun gi madito. 5An Rwot Lubanga me mony, pe abwoto jo Icrael ki jo Juda, kadi bed onongo gutimo bal ikoma, an ngat Maleng me Icrael. 6Wuring woko ki i Babilon! Wuring wular kwowu! Pe myero kinekwu woko pi bal me Babilon. Pien man en aye kare me culu kwora ki me keto can ikom Babilon ma oporo gin ma en otimo. 71Babilon onongo obedo macalo kikopo jabu i cinga, ma omiyo lobo ducu omer. Rok ducu gumato kongo bwinone, ci gudoko lupoya woko. 8Babilon dong opoto woko oyotoyot, kun kijwero woko liweng. Wukok pire! Wukel yat wuket iwang rete, gwok nyo bimiyo en cang. 92Lurok ma onongo gibedo kunu guwaco ni, ‘Watemo konyo Babilon ki yat wek ocang, ento onongo dong pe twero lare. Wabwote, wek wacitu wadoku cen paco. Lubanga dong otyeko keto can ikom Babilon ki teke ducu, ci ojwero obalo woko adada.’”

10Rwot owaco ni, “Jona gidange ni, ‘Rwot dong onyutu ni lokwa tye atir. Wubin wacitu watitu bot jo ma bedo i Cion gin ma Rwot Lubangawa dong otyeko timoneni.’”

11Rwot dong otugu cwiny luker pa jo Medi woko, pien en dong oyube me tyeko Babilon woko. Man aye kit macalo en biculu kwede kwor pi Ot mere ma kimuku kireto woko pinyi.

Ludito wi mony dong giwaco bot acikari ni, “Wupak leb aterowu! Wumak kwotwu i cingwu! 12Wutwe bendera ocung ma nyutu lweny ikom cel me Babilon. Wucuk cwiny lukurpiny wek pe gubed lwor! Wupok lukurpiny woko i kabedo mapatpat. Wumii jo mukane woko gukii piny!”

Rwot dong otyeko timo gin mayam en oyube ni ebitimo, gin mayam en oloko ni ebitimo ikom jo ma gibedo i Babilon. 133Babilon tye ki kulu madwong ki lonyo mabup, ento karene dong otum, ci oweko tol uci me kwone dong kingolo woko. 14Rwot me mony dong okwonge ki nyinge kekene ni ebikelo lwak dano mapol calo bonyo ka lweny ikom Babilon, ka dong gibidange ki dwon me woo me loyo lweny.

Wer me pako Lubanga

15Rwot oketo lobo ki twerone;

dok ocibo lobo ocung matek pi ryekone,

ki pi ryeko matut ma en tye kwede omiyo oyaro polo woko.

16Ikare ma dwone mor, ci pii twage matek ki i polo,

dok miyo lupuu duny kun a ki agiki lobo.

En miyo lutkot wil ka kot cwer,

dok miyo yamo kodo kun a ki i ot kano jamine.

17Ka dano guneno man, ci gin ducu gidoko luming ma wigi oding;

lewic mako latet jabu pi cal joke ma en otiyo,

pien cal jogine ducu pe lubanga me ada,

dok bene pe gitye ki kit kwo mo i igi.

18Konygi peke, kitiyogi ci myero kicaagi acaya keken;

ikare ma Rwot bibino kaketo can ikomgi gibito gitum woko.

19Lubanga pa Yakobo pe obedo calo cal jogi magi;

pien en aye ngat ma ocweyo jami ducu,

dok bene en oyero jo Icrael wek gubed jone kikome.

Nyinge Rwot me mony.

Nyono pa Rwot

20Rwot owaco ni,

“Babilon, in ibedo nyonona, ki jami lwenya.

Atiyo kwedi me nginyo rok ducu woko

atiyo kwedi me tyero ker woko ducu,

21atiyo kwedi me neko aguragura ki jo ma ringo kwedgi kun anyotogi woko,

atiyo kwedi me turu gadigadi lweny kacel ki jo ma ngweco kwedgi atyeko woko,

22atiyo kwedi me neko co wa ki mon,

me neko co ma otii wa ki awobegu,

me neko awobe wa ki anyira,

23atiyo kwedi me nyoto lukwat ki romigi woko ni nginyinginyi,

atiyo kwedi me neko lupur wa ki twoni ma gipuru kwede,

atiyo kwedi me neko luloc wa ki ludito wi mony woko ducu.

Pwod ma kibiketo ikom Babilon

24Wubineno gin me culu kwor ma abitimo ikom Babilon ki ikom jo kaldaya ducu pi gin marac ma gutimo ikom Cion. 25In Babilon, ibedo calo got ma obalo lobo woko, ento an Rwot aye lakwori. Abimaki woko licwic, ci arudi woko i ngom, ci abiweki i dong i buru calo got ma owang. 26Pe gibikwanyo gweng mo ki ikomi wa ki acel me tic kwede pi gedo doki, kadi me twok ot nyo me te guti me ot. Ibidoko dong tim aroo matwal. Man an Rwot ma awaco.

27Wugur bendera ocung i ngom pi lweny! Wukut tum wek rok ducu guwiny! Dong wulwong rok woko ducu pi lweny ikom Babilon! Wuwac ki ker me, Ararat, Mini, ki Acikenaj, wek gubin gulweny ikome. Wuket ladit maloyo wi mony ducu me lweny ikome. Wukel aguragura bene mapol macalo lwak bonyo ma core. 28Wuyub rok ducu, luker pa jo Medi, luloc me lobo ki ludito ma konyogi, ki lobo ducu matye ite locgi me lweny ikom Babilon. 29Lobo tye kayenge dok jo ma iye gitye kakayo lakgi ki arem madwong, pien Rwot dong tye kacobo gin ma en oyubu. En biloko Babilon doko tim aroo, kama dano mo pe bedo iye. 30Lulweny matego me Babilon dong gugiko lweny woko, ci gubedo i cel gogogi labongo keru mo. Tekcwinygi dong otum woko, dong gudoko calo mon. Dogcel me taun gi madit ducu dong kituru woko; dok odigu ducu dong kicwinyo woko ki mac tye kawang. 31Luor giringo teretere me rwate ki luwotgi, kun gicito katito bot rwot me Babilon ni dogcel ducu me taun gi madit dong kituru woko ki i kabedo ducu. 32Lukworgi gumako mel ki yeya me ngolo kulu woko dok gucwinyo lum bene ki mac. Acikari me Babilon ducu dong lworo omakogi woko. 33Lukworgi cok jwerogi woko piny ci binyonogi woko ki tyen gi calo bel matye i laro moyo.” Man an Rwot me mony, Lubanga pa Icrael, aye ma awaco.

34Nebukadnejar rwot me Babilon ongolo Jerucalem ci ocamo woko;

ci onginyo woko kicikici.

En oweko taun madit odong woko ma iye nono calo i agulu;

ci omwonyo woko calo min kulu.

Okwanyo gin ma iye mito,

ci obolo gin mukene mudonge woko.

35Wek jo Cion guwac ni,

“Alii myero obed iwi Babilon gire,

pi tim bwami ma gutimo ikomwa!”

Wek jo Jerucalem guwac ni,

“Alii myero obed iwi jo Kaldaya gire

pi danowa ma kinekogi!”

Rwot bikonyo jo Icrael

36Pimeno Rwot owaco bot jo me Jerucalem kuman ni, “Abipido lokwu, dok abiculu kwor pirwu bene. Abimiyo pii me nam me Babilon two woko, ki wang itte bene ducu amiyo two woko. 37Babilon dong bidoko odur ma obake lipim iwi obur kama too me tim gibedo iye. Bibedo kabedo marac mamiyo lworo, ngat mo pe ma bibedo kunu wa ki acel, dong jo ducu ma gibinene gibijwat mada ikom kabedo man ma odong nono labongo ngat mo ma bedo iye. 38Jo Babilon ducu gibikok calo labwor, dok gibingur calo lutino labwor. 39Ka gin jo ma owor, ci abitedo karama pirgi. Abimiyo gimato mat gimer woko ci cwinygi bedo mayom. Dong gibinino woko, ento pe gibico wa ki acel. 40Abiterogi woko macalo lutino romi, macalo nyogi dyegi nyo nyogi romi. Man an Rwot ma awaco.

Can ma bipoto ikom Babilon

41Babilon ma en aye taun madit ma wi lobo kulu pakoni, dong kimako woko! Babilon dong odoko gin makelo lworo marac bot rok ducu! 42Nam dong ocore woko limuk ikom Babilon, ci biamwonyine ma mor oume woko lipuk. 43Taun gi madito ducu dong odoko gin ma ki uru makelo lworo marac, dok tye macalo tim aroo ma pii pe iye, kama dano mo pe bedo iye dok pe bene giwoto iye. 44Abiketo can ikom Bel, ma en lubanga me Babilon, dok abimiyo en ngoko jami mayam en omwonyogu woko ducu ki doge. Rok ducu pe dok gibicito kawore kit mayam con.

Cel me Babilon dong opoto woko. Wun jo Icrael wuring woko ki kunu! 45Wuring woko wun jo Icrael wek wular kwowu ki ikom kiniga mager pa Rwot. 46Pe myero cwinywu obale woko, dok pe wubed ki lworo pi lok magi ma wuwinyoni. Mwaka ki mwaka lok mapatpat winye ci ket i kabedo ducu, lok me tim gero i lobo, ki dok lok ikom rwot mo matye ka lweny ki rwot lawote mukene. 47Pimeno, kare tye kabino, en kare ma abitic kwede ikom cal jogi me Babilon. Lobo Babilon kulu bipong ki lewic madwong, ki jone ducu kibinekogi woko. 484Gin ducu matye iwi lobo ki i polo gibibedo ki yomcwiny kun giwero wer, kace Babilon opoto i cing jo ma gubino ki i lobo matye tung kumalo katyekone woko. 495Babilon aye ma okelo to ikom dano ducu ma bedo iwi lobo; kombedi dong Babilon bipoto, pien omiyo jo Icrael mapol ata guto.”

Lok pa Lubanga bot jo Icrael ma gitye i Babilon

50Rwot waco bot jone ma gitye i Babilon ni, “Wun dong wubwot ki i lak to! Kombedi dong wucit, pe dok wukur gin mo! Kadi bed wutye kamabor ki paco myero wutam pira, an a Rwotwu, ki wiwu bene myero opo pi Jerucalem. 51Wun wuwaco ni, ‘Lewic omakowa pien wawinyo lok me cac ma gicayowa kwede; wadoko dong jo ma goro atika, pien lurok dong gubino i kabedo maleng ma i Ot pa Rwot.’ 52Pimeno awaco ni kare tye kabino, en kare ma abitic kwede ikom jogi me Babilon, jo ma kiketo ret ikomgi gibibedo kacur i kabedo mapol i lobone ducu. 53Kadi onongo Babilon oito malo wa i pol pi gero gang me cel gogone kunu, kono onongo pud acwalo dano aye me cito katyeke woko. An Rwot dong aloko.

Can ma pud tye ka mede ikom Babilon

54Wuwiny dwon me koko matye i Babilon, wuwiny ka dano gidange pi can ma dong opoto i lobo pa jo Kaldaya.

55Dong abijwero Babilon woko, kun amiyo teke bene tum woko ci biling mot. Mony tye karune bino oyotoyot calo pii biamwonyi ma mor, gibino ka lweny ikome ki woo matek.

56Gin dong gubino woko kaketo can ikom Babilon, ma gimako lulwenye woko, ki atumgi bene kituru dok kingido woko matinotino.

An a Rwot Lubanga ma aketo can ikom dano pi bal, dok abiculu kwor ikom Babilon aketo can pi bal ma jone gutimo.

57Abimiyo rwodine gimer woko,

wa ki jone maryekgu, luloc me lobo, ki ludito wi mony ducu, ki lulweny.

Gibinino woko, ka gin gunino ento pe dok gibico wa ki acel.

An Rwot dong aloko, an a Rwot me mony.

58Cel me Babilon malaci kibimuku kireto woko wa ingom,

ki dog gange ma kigero wa maloni ducu kibiwango woko ki mac.

Tic ma lurok gutiyo bene ducu obedo me nono;

gin ma rok ducu guyele iye katiyo tice matek dong mac owango woko.

Man lok pa an Rwot me mony kikome.”

Kicwalo lok pa Jeremia i Babilon

59Ceraya wod pa Neria ma wod pa Maceya, yam obedo ngat ma gwoko rwot Jedekia. I mwaka me angwen me loc pa Jedekia rwot me Juda, Ceraya onongo tye kacito i Babilon kacel ki rwot Jedekia, ci atite kit lok mogo ma myero en owot kwede. 60Acoyo i buk lok kom can ma bipoto ikom Babilon, ki lok mukenegu ducu ma kicoyo ma okemo Babilon. 61An awaco bot Ceraya ni, “Ka io i Babilon nen ni i kwano lok magi ducu kit macalo acoyo bot lwak. 62Ci myero ileg ni, ‘Ai Rwot, yam onongo iwaco ni i bijwero kabedo man woko, wek pe gin makwo obed iye, dano nyo kadi lee, ci dong bibedo calo tim aroo matwal.’ 636Ka dong ityeko kwano buk man bot lwak, ci i twe gweng ikome, ka dong i bol kwede woko i dye kulu Euprate, 64kun iwaco ni, ‘Man aye kit macalo Babilon bimwony kwede woko, ma pe dong bikati woko matwal, pi can ma abikelo ma abiketo ikome.’” Lok pa Jeremia ma en oloko ogik kany.