Jeremia 52

Poto pa Jerucalem

(2 Luk 24:18—25:7)

1Jedekia ocamo ker ma mwaka me dite tye pyere aryo wiye acel, ci obedo kaloc i Jerucalem pi mwaka apar wiye acel. Nying mine Kamutal, nya pa Jeremia me Libna. 2En obedo katiyo gin manen marac iwang Rwot, kun lubu kit gin ducu mayam Yekoyakim otiyo. 3Pi kiniga ma omako Rwot, ka kare oromo, ci omiyo Rwot obayo Jerucalem ki Juda woko ki inyime.

Jedekia ocako jemo woko ikom rwot me Babilon. 41I mwaka me abongwen me loce, i dwe me apar, inino dwe apar, en aye Nebukadnejar rwot me Babilon obino kwede ki monye ducu ikom Jerucalem, ci orumu taun madit woko, ka dok gutoro cel lobo orumu woko dyere. 5Kitmeno gurumu taun madit nio wa i mwaka me apar wiye acel me loc pa rwot Jedekia. 6Ikom nino dwe abongwen me dwe me angwen ma onongo kec dong odoko marac adada i Jerucalem, man bene omiyo cam pe dok onen pi lwak. 72Ka gumuku cel me taun madit woko, ci lulweny pa Jedekia ducu gumol guringo ki i dyewor, kun giwok ki i dog gang ma ikin cel aryo me Jerucalem, ma inget poto pa rwot, kadi onongo jo Kaldaya gurumu taun maditi woko. Gucito gulubu yoo ma dok tung Araba. 8Ento mony pa jo Kaldaya guryemo kor rwot Jedekia, ci gumake woko i bar me Jeriko; ci monye guket woko ducu ki ikome. 9Ka gumako rwot, ci gukele bot rwot me Babilon i Ribla, kama ongole iye kop. 10Rwot me Babilon ocako neko awobe pa Jedekia woko ki inyime ma wange neno, dok bene oneko luloc me Juda woko ducu ki i Ribla. 113 En okolo wang Jedekia oloyo woko ka omiyo kitweye ki nyor, ci kitere kwede wa i Babilon, ci kikete i buc nio wa inino me tone.

Kiwango Ot pa Lubanga woko

(2 Luk 25:8-17)

12I dwe me abic, ikom nino dwe apar, ma en aye mwaka me apar wiye abongwen me loc pa rwot Nebukadnejar, ma rwot me Babilon, en aye Nebujaradan ma ladit pa lugwok rwot, ma latic pa rwot me Babilon, obino kwede i Jerucalem. 134 Ci owango Ot pa Rwot woko, gangkal pa rwot, ki odi madito ducu matye i Jerucalem. 14Ci mony pa jo Kaldaya ducu, mayam gitye kacel ki ladit pa lugwok rwot, gumuku kicika cel ma orumu Jerucalem woko. 15Ki lwak mayam gudong i taun madit, ki jo mayam gukobo gigi ken gi bot rwot me Babilon, kacel ki lwak mayam gudong ducu, Nebujaradan ma ladit pa lugwok rwot oterogi woko i opii. 16Ento en oweko jo mogo ma gin lucan adada gudong i lobo wek gubed lugwok poto olok ki lupur ki kweri dyang. 175

Jo Kaldaya guturu wir mola ci gungido woko, ka dok gutongo lutino gadigadi, ki lagwok pii me nyonyo bronze mayam gitye i Ot pa Rwot, ka gutero molane woko wa i Babilon. 18Gutero lwak agulu ducu ki akwaya; latok buru, magac, becen, atabo me odok eceta, ki jami me mola ducu mayam kitiyo kwedgi i Ot pa Rwot. 19Gutero jami ducu mayam onongo kiyubu ki jabu wa ki ma kiyubu ki ryal: atabo matino ki weer me wango mac, ki atabo me liyo gityer amata, agulu lagwok buru, okar mac, weer ma kiwango ki angwece wa ki weer me gityer amata. 20Lok ma dok ikom wir aryoni, ki nam acel, ki lutino gadigadi ducu mayam Solomon otiyogi pi Ot pa Rwot, pek me mola ma oa ki ikom jami magi ducu dwong ma pe pime.

21Bor pa wir acel acel onongo romo puti pyere aryo wiye abiro, ka kipimo kor wir ki tol ci dite oromo puti apar wiye aboro. Iye onongo twolo, kome ducu kinong maromo nyig cing angwen. 22Iwiye yam kiketo iye lalukana me mola, kun lalukana bore romo puti abiro ki nucu. Ikom lalukana onongo kiketo iye obwo ki cal nyig okwer pomegranat, ma gin ducu kitiyogi ki mola ma girumu lalukana dyere. Wir me aryo bene rom ki lawote, kun tye ki cal nyig pomegranat. 23Cal pomegranat onongo romo pyere abongwen wiye abicel ki tung kungeye; cal pomegranat ducu oromo miya acel ma orumu obwo ma kitiyo orumu woko ducu.

Kitero Lujudaya i Babilon

(2 Luk 25:18-21,27-30)

24Nebujaradan bene otero Ceraya ma ajwaka madit, ki Jepania ajwaka me aryone, ki lukur dogola me Ot pa Rwot gin adek. 25Ka dok okwanyo ladit maloyo lumony ki i dye gang, ki lumemba abiro mamiyo tam ki rwot ma onongogi i dye taun madit; ki karan pa ladit me mony, mayam coyo lok me lweny; ki jo pyere abicel ma ikin wegi lobo ma kinonogi i dye taun madit man. 26Nebujaradan, ladit pa lugwok rwot omakogi, oterogi wa i Ribla bot rwot me Babilon. 27Ci rwot me Babilon onekogi woko ducu ki i Ribla ma i lobo Kamat. Kitmeno kikwanyo jo Juda woko ki i lobogi ci kiterogi woko i opii.

28Man aye wel dano mayam Nebukadnejar omako otero woko i opii: i mwaka me abiro en otero Lujudaya maromo alip adek ki pyere aryo wiye adek. 29I mwaka me apar wiye aboro me loce en okwanyo dano maromo miya aboro ki pyere adek wiye aryo ki i Jerucalem oterogi woko i opii. 30I mwaka me pyere aryo wiye adek me loc pa Nebukadnejar, Nebujaradan ladit pa lugwok rwot otero Lujudaya maromo dano miya abiro ki pyere angwen wiye abic i opii. Wel dano ducu ma kiterogi i opii dong oribe oromo alip angwen ki miya abicel.

31Ikare me mwaka pyere adek wiye abirone nia ma kitero kwede Yekoyakin rwot me Juda i opii, i dwe me apar wiye aryo, ikom nino dwe pyere aryo wiye abic, en aye Evil-merodak, rwot me Babilon, otimo kica ki Yekoyakin rwot me Juda, ogonye woko ki i buc i mwaka ma en ocamo iye ker. 32Evil-merodak obedo kalok kwede mot maber, oketo en obedo ikom madit makato ducu ki ikin kom pa luker mayam gibedo kwede i Babilon. 33Kitmeno aye kiweko Yekoyakin olunyu bongo me buc mere woko, ci obedo ka cam iwi meja pa rwot jwijwi, pi kare me kwone ducu. 34Pi nino ducu me kwone, kun rwot dok obedo kamiye lim me tic kwede jwijwi, wek en okonye kwede.