پیدائش

پیدائش

پیش لفظ

لفظ پیدائش دا مطلب ہے ”اصل۔“ ایہ کتاب کائنات دی تخلیق، اِنسانی نسل دی ابتدا تے دُنیا ءچ گُناہ تے مُصیبتاں دے شروع دے بارے ءچ ڈسیندی ہے۔ تے ایہ وی جو خُدا جیہڑا دُنیا دا خالق تے مالک ہے، اُوں ابرہام نال کیتے ہوئے عہد دے وسیلے نال انساناں کیتے نجات دا منصوبہ بنڑایا۔ اِیں کتاب کُوں ڈُو حصیاں ءچ ونڈیا ونج سگدے۔

پہلے حصے یعنی باب 1-11 ءچ دُنیا دی تخلیق تے اِنسانی نسل دی اِبتدائی تاریخ دے بارے ءچ بیان ہے۔ اِیندے ءچ آدم تے حوا، قائن تے ہابل، نُوح دے زمانے دے سیلاب تے بابل دے بُرج دے واقعات شامل ہِن۔

ڈُوجھے حصے یعنی باب 12-50 ءچ بنی اِسرائیل دے پِیُو ڈاڈا دی تاریخ ہے۔ سبھ تُوں پہلے ابرہام ہے جیہڑا آپنڑے اِیمان تے خُدا دی فرمانبرداری کیتے قابلِ ذِکر ہے۔ وَل اُوندے پوتر اِضحاق، پوترے یعقوب (جیہڑا اِسرائیل وی اکھویندے) تے یعقوب دے بارہاں پوتراں دیاں کہانڑیاں ہِن، جیہڑے اِسرائیل دے بارہاں قبیلیاں دے بانی ہِن۔ زیادہ تفصیل اُوندے پوتر یُوسف دی زندگی تے اُوں کال دے بارے ءچ ہے جِیندے سببّوں یعقوب تے اُوندے بئے پوتر آپنڑے خانداناں نال مِصر ءچ راہوݨ کیتے آئے ہَن۔

بے شک ایہ کتاب لوکاں دے بارے ءچ کہانڑیاں بیان کریندی ہے پر اِیندے ءچ سبھ تُوں خاص گالھ ایہ ہے جو خُدا اِنسان کیتے کیا کُجھ کیتے۔ خُدا دُنیا کُوں کامل بنڑایا تے جڈاں ساڈے گُناہ دے سببّوں اِیندے ءچ خرابی آئی تاں وَل وی خُدا اِنسان نال محبت کرݨ نہ چھوڑیا۔ او بدکاراں دی عدالت کر تے اُنہاں کُوں سزا ڈیندے پر آپنڑے وفادار لوکاں دی راہنمائی تے مدد کریندے۔ ایہ کتاب لوکاں دے اِیمان کُوں ودھاوݨ تے زندہ رکھنڑ کیتے لِکھی گئی ہے۔