پیدائش 26

اِضحاق تے رِبقہ جرار ءچ

1اُوں مُلک ءچ ولا کال پے گِیا، جِینویں ابرہام دے دور ءچ وی پِیا ہا۔ اِیں واسطے اِضحاق جرار شہر دو گِیا، جیندے اُتے فِلِستیاں دے بادشاہ ابی مَلک دی حکُومت ہئی۔ 2رب العالمین اِضحاق اُتے ظاہر تھی تے آکھیا، ”مِصر نہ وَنج پر اُوں مُلک ءچ رہ جیہڑا مَیں تیکُوں ڈکھیندا ہاں۔ 3تُوں اِیں مُلک ءچ کُجھ دیر کیتے رہ۔ مَیں تیڈے نال ہوساں تے تیکُوں برکت ڈیساں۔ کیوں جو مَیں ایہ سارا علاقہ تیکُوں تے تیڈی اولاد کُوں ڈیساں تے او عہد پُورا کریساں جیہڑا مَیں قَسم کھا تے تیڈے پِیُو ابرہام نال کیتا ہا۔ 4مَیں تیکُوں اِتنی اولاد ڈیساں جتنے اسمان اُتے تارے ہِن تے مَیں ایہ سارے مُلک تیڈی نسل کُوں ڈے ڈیساں۔ تیڈی نسل دے سببّوں دُنیا دیاں سبھ قوماں برکت پیسن۔ 5ایہ برکت اِیں واسطے مِلسی کیوں جو ابرہام میڈی گالھ منّی تے میڈیاں نصیحتاں، میڈے حُکماں، میڈے قانُوناں تے ہدایتاں اُتے ٹُردا ریہا۔“

6وَل اِضحاق جرار ءچ راہوݨ لگا۔ 7جِیں ویلے اُتھوں دے مرداں رِبقہ دے بارے ءچ پُچھیا تاں اِضحاق آکھیا، ”ایہ میڈی بھینڑ ہے۔“ او اُنہاں کُوں ایہ ڈساوݨ تُوں ڈردا ہا جو ایہ میڈی ذال ہے کیوں جو اُوں ایہ سوچیا جو رِبقہ بہُوں سوہنڑی ہے تے جے اِنہاں کُوں پتہ لگ گِیا جو رِبقہ میڈی ذال ہے تاں او اُونکُوں حاصل کرݨ کیتے میکُوں قتل کر ڈیسن۔

8جِیں ویلے اُونکُوں اُتھاں راہندے ہوئے بہُوں ڈینہہ لنگھ گئے تاں ہِک ڈینہہ فِلِستیاں دے بادشاہ ابی مَلک آپنڑی کِھڑکی ءچوں ڈِٹھا جو اِضحاق آپنڑی ذال نال پیار کریندا پئے۔ 9اُوں اِضحاق کُوں سڈ تے آکھیا، ”او تاں تیڈی ذال ہے۔ تُوں کیوں آکھے جو او میڈی بھینڑ ہے؟“

اِضحاق جواب ڈِتا، ”مَیں سوچیا جو کوئی میکُوں اُوندے سببّوں قتل نہ کر ڈیوے۔“

10ابی مَلک آکھیا، ”تَیں ساڈے نال کیا کیتے؟ جے کوئی تیڈی ذال نال ہم بستر تھی ویندا تاں تُوں ساڈی ساری قوم کُوں قصوروار بنڑا ڈیندا؟“ 11وَل ابی مَلک سارے لوکاں کُوں خبردار کیتا جو ”جے کوئی اِیں بندے یا اِیندی ذال کُوں ہتھ وی لاوے تاں او مار ڈِتا ویسی۔“

اِضحاق دا فِلِستیاں نال جھیڑا

12اِضحاق اُوں علاقے ءچ رَڑھ واہی کیتی تے اُوں سال اُونکُوں سو گُنا پھل مِلیا کیوں جو رب العالمین اُونکُوں برکت ڈِتی ہئی۔ 13او دولت مند تھی گِیا تے ترقی کریندے کریندے بہُوں وڈا بندہ بنڑ گِیا۔ 14اُوندے کولھ اِتنیاں بھیڈ بکریاں، گائیں، ڈاند تے غُلام ہَن جو فِلِستی اُوندے تُوں سڑن لگ پئے۔ 15تے اِینویں تھیّا جو اُنہاں او سارے کُھوہ مِٹی نال بھر تے بند کر ڈِتے جیہڑے اُوندے پِیُو ابرہام دے نوکراں اُوندے زمانے ءچ کھٹے ہَن۔

16آخر کار ابی مَلک اِضحاق کُوں آکھیا، ”تُوں کہیں بئی جاہ تے وَنج رہ، کیوں جو تُوں ساڈے تُوں زیادہ زورآور تھی گئیں۔“

17وَل اِضحاق اُتھوں روانہ تھی تے جرار دی وادی ءچ آپنڑے ڈیرے لا گِھدے۔ 18اُتھاں فِلِستیاں ابرہام دے مرݨ تُوں بعد سارے کُھوہاں کُوں مِٹی نال بھر ڈِتا ہا۔ اِضحاق اُنہاں کُوں ولا کھٹوایا تے اُنہاں دے اُوہو ناں رکھے جیہڑے اُوندے پِیُو رکھے ہَن۔

19اِضحاق دے نوکراں کُوں وادی ءچ کُھوہ کھٹیندے کھٹیندے پانڑی دا چشمہ مِل گِیا۔ 20پر جرار دے آجڑیاں اِضحاق دے آجڑیاں نال جھیڑا کیتا تے آکھیا، ”ایہ پانڑی ساڈا ہے“ اِیں کیتے اُوں اُوں کُھوہ دا ناں عِسق1 رکھیا۔ 21اِضحاق دے نوکراں ہِک بِیا کُھوہ کھٹ گِھدا پر اُوندے اُتے وی جھیڑا تھیّا۔ اِیں کیتے اُوں اُوندا ناں سِتنہ2 رکھیا۔ 22اُتھوں وَنج تے اُوں ہِک تریجھا کُھوہ کھٹوایا۔ اِیندے اُتے کوئی جھیڑا نہ تھیّا، اِیں سانگے اُوں اُوندا ناں رحوبوت3 رکھیا تے آکھیا، ”رب العالمین ساکُوں کُھلی جاہ ڈِتی ہے تے ہُنڑ اساں اِیں مُلک ءچ ودھسُوں۔“

23اُتھوں اِضحاق بیرسبع دو گِیا۔ 24اُوں رات رب العالمین اُوندے اُتے ظاہر تھیّا تے آکھیا، ”مَیں تیڈے پِیُو ابرہام دا خُدا ہاں۔ نہ ڈر، کیوں جو مَیں تیڈے نال ہاں۔ مَیں تیکُوں برکت ڈیساں تے آپنڑے خادم ابرہام دی خاطر تیڈی نسل کُوں ودھیساں۔“

25اُتھاں اِضحاق قُربان گاہ بنڑائی تے رب العالمین دا ناں گِھن تے عبادت کیتی۔ اِضحاق آپنڑا ڈیرہ اُتھائیں لایا تے اُتھاں اُوندے نوکراں ہِک کُھوہ کھٹیا۔

ابی مَلک دے نال عہد

26ہِک ڈینہہ ابی مَلک آپنڑے دوست اخوزت تے آپنڑے سپہ سالار فِیکل کُوں نال گِھن تے جرار تُوں اُوندے کولھ آیا۔ 27اِضحاق پُچھیا، ”تُساں میڈے کولھ کیوں آئے ہیوے؟ تُساں تاں میڈے تُوں نفرت کریندے ہیوے تے میکُوں آپنڑے ءچوں کڈھ ڈِتا ہئی۔“

28اُنہاں جواب ڈِتا، ”ساکُوں پتہ لگ گئے جو رب العالمین تیڈے نال ہے۔ اِیں کیتے اساں سوچے جو ساڈا تیڈے نال معاہدہ ہوونڑا چاہیدے۔ اساں قَسم کھا تے ہِک بئے نال عہد کرُوں 29جو جِینویں اساں تیکُوں نُقصان نئیں پُچایا بلکہ تیڈے نال چنگا سلوک کیتے تے تیکُوں سلامتی نال رُخصت کیتے، اِینویں ای تُوں وی ساکُوں نُقصان نہ پُچاویں۔ کیوں جو ہُنڑ رب العالمین تیکُوں برکت ڈِتی ہے۔“

30اِضحاق اُنہاں دی دعوت کیتی تے اُنہاں کھادا پِیتا۔ 31وَل صُبح سویلے اُٹھی تے اُنہاں ہِک ڈُوجھے دے سامنڑے قَسم کھادی۔ اِیندے بعد اِضحاق اُنہاں کُوں رُخصت کیتا تے او سلامتی نال چلے گئے۔

32اُوں ڈینہہ اِضحاق دے نوکر آئے تے اُونکُوں اُوں کُھوہ دے بارے ءچ خبر ڈِتی جیہڑا اُنہاں کھٹیا ہا تے آکھیا، ”ساکُوں پانڑی مِل گئے۔“ 33اُوں کُھوہ دا ناں سبع4 رکھیا۔ اِیں پارُوں اَج تئیں اُوں شہر دا ناں بیرسبع ہے۔

عیسو دیاں غیر قوم ذالیں

34جِیں ویلے عیسو چالیہہ (40) سال دا ہا تاں اُوں ڈُو حِتّی عورتاں نال شادی کیتی۔ بیری حِتّی دی دِھی یہودِتھ نال تے ایلون حِتّی دی دِھی بشامتھ نال۔ 35ایہ عورتاں اِضحاق تے رِبقہ کیتے وڈے ڈُکھ دا سبب بنڑیاں۔