پیدائش 25

ابرہام دی بئی اولاد

1ابرہام ہِک بئی شادی کیتی۔ اِیں ذال دا ناں قطُورہ ہا۔ 2قطُورہ دے چِھی پوتر، زِمران، یُقسان، مِدان، مِدیان، اِسباق تے سُوخ جمّے۔ 3یُقسان دے ڈُو پوتر سبا تے ددان ہَن۔ اسُوری، لطوسی تے لُومی ددان دی اولاد ہَن۔ 4مِدیان دے پوتر عیفہ، عِفر، حنُوک، ابیداع تے اِلدعا ہَن۔ ایہ سارے قطُورہ دی اولاد ہَن۔

5ابرہام آپنڑی ساری جائیداد اِضحاق کُوں ڈے ڈِتی۔ 6پر آپنڑی موت تُوں پہلے اُوں آپنڑیاں ڈُوجھیاں ذالاں دے پوتراں کُوں تحفے ڈے تے آپنڑے پوتر اِضحاق تُوں دُور مشرق دو بھیج ڈِتا۔

ابرہام دی موت

7ابرہام ہِک سو پنجھتر (175) سال دی عُمر ءچ فوت تھیّا۔ 8او بہُوں بُڈھا تے لمبی زندگی گُزار تے فوت تھیّا تے آپنڑے پِیُو ڈاڈے نال وَنج مِلیا۔ 9-10اُوندے پوتراں اِضحاق تے اِسمٰعیل اُونکُوں مکفیلہ دی غار ءچ دفن کیتا، جیہڑی مَمرے دے مشرق ءچ ہے۔ ایہ اُوہو غار ہئی، جِینکُوں ابرہام کھیت سمیت حِتّی بندے عِفرون بِن صُحر تُوں مُل گِھدا ہا۔ ابرہام تے اُوندی ذال سارہ ڈوہائیں کُوں اُوندے ءچ دفن کیتا گِیا۔

11ابرہام دی موت تُوں بعد خُدا اِضحاق کُوں برکت ڈِتی۔ اُوں ویلے اِضحاق بیرلحی روئی دے کولھ راہندا ہا۔

اِسمٰعیل دی اولاد

12ابرہام دا پوتر اِسمٰعیل جیہڑا سارہ دی مِصری کنیز ہاجرہ تُوں جمیا ہا، اُوندا شجرہ ایہ ہے۔

13اِسمٰعیل دے پوتراں دے ناں وڈے تُوں گِھن تے چھوٹے تئیں ایہ ہِن: نبایوت، قِیدار، اَدبِئیل، مِبسام، 14مِشماع، دُومہ، مسّا، 15حدد، تَیما، یطُور، نفِیس تے قِدمہ۔

16ایہ پوتر بارہاں قبیلیاں دے سردار بنڑ گئے تے اُنہاں دیاں وستیاں تے ڈیریاں دے ناں اُنہاں دے ناواں اُتے پے گئے۔ 17اِسمٰعیل ہِک سو ستتریح (137) سال دا ہا جِیں ویلے او فوت تھی تے آپنڑے پِیُو ڈاڈے نال وَنج مِلیا۔ 18اُوندی اولاد اُوں علاقے ءچ آباد ہئی جیہڑا حوِیلہ تے شور دے وچال ہے تے جیہڑا مِصر دے مشرق ءچ اسُور دو ہے۔ ایہ سارے آپنڑے بِھرانواں دے سامنڑے راہندے ہَن۔

عیسو تے یعقُوب دی پیدائش

19ایہ ابرہام دے پوتر اِضحاق دا بیان ہے۔

20اِضحاق چالیہہ (40) سال دا ہا جِیں ویلے اُوندی شادی رِبقہ نال تھئی۔ رِبقہ لابن دی بھینڑ تے بیتوایل دی دِھی ہئی۔ بیتوایل ارامی ہا تے فدّان ارام ءچ راہندا ہا۔ 21رِبقہ بے اولاد ہئی اِیں واسطے اِضحاق آپنڑی ذال کیتے دُعا کیتی، تے رب العالمین اُوندی سُنڑ گِھدی تے رِبقہ حاملہ تھی گئی۔ 22اُوندے پیٹ ءچ بال ہِک بئے نال زور ازمائی کرݨ لگے۔ وَل او رب العالمین تُوں پُچھنڑ لگی جو ”ایہ میڈے نال کیوں تھیندا پئے؟“

23رب العالمین اُونکُوں آکھیا،

”تیڈے پیٹ ءچ ڈُو قوماں ہِن،

او تیڈے ءچوں نِکل تے ہِک بئے تُوں اَنج تھی ویسن۔

اِنہاں ءچوں ہِک قوم ڈُوجھی کنُوں زیادہ طاقتور ہوسی

تے وڈا چھوٹے دی خدمت کریسی۔“

24جِیں ویلے پیدائش دا ویلا آیا تاں جاڑے پوتر جمّے۔ 25پہلا بال رَتّا جِیہا ہا تے اِینویں لگدا ہا جو او گھاٹے والاں دا کوٹ پاتی پئے۔ اِیں کیتے اُوندا ناں عیسو1 رکھیا گِیا۔ 26اِیندے بعد ڈُوجھا پوتر جمیا۔ او عیسو دی کُھری پکڑی پِیا ہا، اِیں کیتے اُوندا ناں یعقُوب2 رکھیا گِیا۔ اِنہاں دی پیدایش دے ویلے اِضحاق سَٹھ (60) سال دا ہا۔

27چھوہر جوان تھئے تاں عیسو ماہر شکاری بنڑ گِیا تے کُھلے میدان ءچ خوش راہندا ہا۔ اُوندے مُقابلے ءچ یعقُوب ٹھڈے مزاج دا ہا تے ڈیرے ءچ راہوݨ پسند کریندا ہا۔ 28اِضحاق عیسو کُوں پیار کریندا ہا، کیوں جو او عیسو دے شکار دا گوشت کھاندا ہا، پر رِبقہ یعقُوب کُوں پیار کریندی ہئی۔

29ہِک ڈینہہ یعقُوب بھاجی پکیندا پِیا ہا، جو عیسو تھکیا ترُوٹیا جنگل تُوں آیا۔ 30اُوں آکھیا، ”مَیں بُکھ تُوں مردا پِیا ہاں۔ میکُوں جلدی جلدی اِیں رتّی بھاجی ءچوں کُجھ کھاوݨ کیتے ڈے۔“ اِیں کیتے اُوندا ناں بعد ءچ ادُوم3 پے گِیا۔

31یعقُوب جواب ڈِتا، ”ٹھیک ہے، پر پہلے میکُوں پلوٹھے دا حق ویچ ڈے۔“

32عیسو آکھیا، ”مَیں تاں بُکھ تُوں مردا پِیا ہاں، پلوٹھے دا حق میڈے کئیں کم دا؟“

33یعقُوب جواب ڈِتا، ”پہلے قَسم کھا۔“ اِیندے تے عیسو قَسم کھا تے پلوٹھے دا حق اُونکُوں ویچ ڈِتا۔

34وَل یعقُوب اُونکُوں کُجھ روٹی تے بھاجی ڈے ڈِتی تے عیسو اُونکُوں کھادا پِیتا تے وَل اُٹھی تے لگا گِیا۔ اِینویں اُوں پلوٹھے دے حق کُوں ناچیز سمجھیا۔