پیدائش 27

اِضحاق یعقُوب کُوں برکت ڈیندے

1جِیں ویلے اِضحاق بُڈھا تھی گِیا تے اُوندے اکھیں کمزور تھی گئیاں تاں اُوں آپنڑے وڈے پوتر کُوں سڈ تے آکھیا، ”پوتر!“

عیسو جواب ڈِتا، ”جی مَیں حاضر ہاں۔“

2اِضحاق آکھیا، ”مَیں بُڈھا تھی گِیا ہاں تے کہیں ویلے وی مر سگدا ہاں۔ 3اِیں واسطے آپنڑا تِیر کمان گِھن تے جنگل دو لگا وَنج تے میڈے کیتے کہیں جانور دا شکار کر آ۔ 4اُونکُوں تیار کر تے اِیہو جِیہا لذیذ کھانڑا پکا جیہڑا میکُوں پسند ہے تے میڈے کولھ گِھن آ تاں جو مَیں او کھانڑا کھا تے مرݨ تُوں پہلے تیکُوں برکت ڈیواں۔“

5رِبقہ، عیسو نال اِضحاق دی گالھ مُہاڑ سُنڑدی پئی ہئی۔ جِیں ویلے عیسو جنگل ءچ شکار کرݨ کیتے گِیا 6تاں اُوں یعقُوب کُوں آکھیا، ”مَیں تیڈے پِیُو کُوں عیسو نال گالھ کریندے سُنڑے جو 7’میڈے کیتے کہیں جانور دا شکار کر تے گِھن آ۔ اُونکُوں تیار کر تے میڈے کیتے لذیذ کھانڑا پکا۔ مَیں ایہ کھانڑا کھا تے مرݨ تُوں پہلے تیکُوں رب العالمین دے سامنڑے برکت ڈیوݨ چاہندا ہاں۔‘ 8ہُنڑ میڈا پوتر میڈی گالھ سُنڑ تے جیہڑی گالھ مَیں تیکُوں ڈسیندی ہاں، اُوہو کر۔ 9وَنج تے اِجڑ ءچوں بکریاں دے ڈُو چنگے چنگے لیلے گِھن آ۔ مَیں اُوہو لذیذ کھانڑا پکیساں جیہڑا تیڈے پِیُو کُوں پسند ہے۔ 10وَل تُوں ایہ کھانڑا اُوندے کولھ گِھن ونجیں تاں جو او اُونکُوں کھا تے مرݨ تُوں پہلے تیکُوں برکت ڈیوے۔“

11پر یعقُوب آپنڑی ماء رِبقہ کُوں آکھیا، ”تُوں جانڑدی ہیں جو میڈے بِھرا عیسو دے جِسم اُتے گھاٹے وال ہِن پر میڈا جِسم صاف ہے۔ 12کِتھائیں میکُوں ہتھ لاوݨ نال ابّے کُوں پتہ نہ لگ ونجے جو مَیں اُونکُوں دوکھا ڈیندا پِیا ہاں۔ وَل میڈے اُتے برکت نئیں بلکہ لعنت آسی۔“

13اُوندی ماء آکھیا، ”پوتر! تیڈے اُتے آوݨ آلی لعنت میڈے اُتے آوے، بس تُوں میڈی گالھ مَن۔ وَنج بکریاں ءچوں او لیلے گِھن آ۔“

14وَل او گِیا تے لیلیاں کُوں آپنڑی ماء کولھ گِھن آیا۔ رِبقہ اِیہو جِیہا لذیذ کھانڑا پکایا جیہڑا یعقُوب دے پِیُو کُوں بہُوں پسند ہا۔ 15رِبقہ دے گھر ءچ اُوندے وڈے پوتر عیسو دے کُجھ چنگے کپڑے ہَن۔ اُوں اُنہاں ءچوں چُنڑ تے ہِک آپنڑے چھوٹے پوتر کُوں پوا ڈِتا۔ 16تے بکری دے لیلیاں دیاں کَھلاں اُوندے ہتھاں تے گِچی اُتے جِتھاں وال نہ ہَن ولھیٹ ڈِتیاں۔ 17وَل اُوں آپنڑے پوتر یعقُوب کُوں روٹی تے او لذیذ کھانڑا ڈِتا جیہڑا اُوں پکایا ہا۔

18یعقُوب آپنڑے پِیُو دے کولھ وَنج تے آکھیا، ”ابّا جی۔“

اِضحاق آکھیا، ”جی پوتر تُوں کوݨ ہیں؟“

19اُوں آکھیا، ”مَیں تُہاڈا پلوٹھا عیسو ہاں۔ مَیں اُوہو کیتے جیہڑا تُساں میکُوں آکھیا ہا۔ ہُنڑ ذرا اُٹھی تے باہو تے میڈے شکار دا کھانڑا کھاؤ، تاں جو بعد ءچ تُساں میکُوں برکت ڈیؤ۔“

20اِضحاق پُچھیا، ”پوتر ایہ شکار تیکُوں اِتنی جلدی کِینویں مِل گئے؟“

اُوں جواب ڈِتا ”رب العالمین تُہاڈا خُدا اُونکُوں میڈے سامنڑے گِھن آئے۔“

21اِضحاق آکھیا، ”پوتر میڈے کولھ آ تاں جو مَیں تیکُوں ہتھ لا تے ڈیکھاں جو تُوں سچ مُچ میڈا پوتر عیسو ہیں یا نئیں۔“ 22یعقُوب آپنڑے پِیُو دے کولھ آیا۔ اِضحاق اُونکُوں ہتھ لا تے آکھیا، ”تیڈی اواز تاں یعقُوب آلی ہے پر تیڈے ہتھ عیسو آلے ہِن۔“ 23اِینویں اُوں اُونکُوں نہ سُنجانڑیا کیوں جو یعقُوب دے ہتھاں اُتے عیسو دے ہتھاں آلی کار وال ہَن۔ اِیں واسطے اُوں یعقُوب کُوں برکت ڈے ڈِتی۔ 24اِضحاق ولا پُچھیا، ”کیا تُوں سچ مُچ میڈا پوتر عیسو ہیں؟“

یعقُوب جواب ڈِتا، ”جیا مَیں اُوہو ہاں۔“

25وَل اِضحاق آکھیا، ”شکار دا کھانڑا میڈے کولھ گِھن آ، او کھاوݨ تُوں بعد مَیں تیکُوں برکت ڈیساں۔“ یعقُوب کھانڑا تے انگُور دا رَس گِھن آیا۔ اِضحاق کھانڑا کھادا تے انگُور دا رَس پِیتا۔ 26وَل اِضحاق آکھیا، ”پوتر! میڈے کولھ آ تے میکُوں چُم۔“ 27یعقُوب کولھ آ تے اُونکُوں چُمیا۔ اِضحاق اُوندے کپڑیاں دی خوشبو سُنگھ تے اُونکُوں برکت ڈِتی۔ اُوں آکھیا، ”میڈے پوتر دی خوشبو اُوں رَڑھ دی خوشبو آلی کار ہے، جِینکُوں رب العالمین برکت ڈِتی ہووے۔

28خُدا تیکُوں اسمان دی تریل تے زمین دی زرخیزی ڈیوے۔

او تیکُوں انگُور دا بہُوں زیادہ رَس تے ڈھگ اناج ڈیوے۔

29قوماں تیڈی خدمت کرݨ تے اُمتاں تیڈے سامنڑے جُھک ونجنڑ۔

تُوں آپنڑے بِھرانواں دا حُکمران بنڑے،

تے تیڈی ماء دی اولاد تیڈے سامنڑے گوڈے ٹیکے۔

جیہڑا تیڈے اُتے لعنت کرے او خود لعنتی ہووے۔

تے جیہڑا تیکُوں برکت دی دُعا ڈیوے، او خود برکت پاوے۔“

عیسو اِضحاق تُوں برکت منگدے

30جِیں ویلے اِضحاق یعقُوب کُوں برکت ڈِتی تے یعقُوب آپنڑے پِیُو اِضحاق کولُھوں حالی نِکلیا ای ہا تاں اُوندا بِھرا عیسو شکار گِھن تے آ گِیا۔ 31او لذیذ کھانڑا پکا تے آپنڑے پِیُو دے کولھ گِھن آیا۔ اُوں آکھیا، ”ابّا جی اُٹھو، میڈے شکار دا کھانڑا کھاؤ تاں جو تُساں میکُوں برکت ڈیؤ۔“

32اِضحاق پُچھیا، ”تُوں کوݨ ہیں؟“

اُوں جواب ڈِتا، ”مَیں تُہاڈا پلوٹھا پوتر عیسو ہاں۔“

33اِضحاق گھبرا تے زور نال کمبنڑ لگا تے پُچھیا، ”وَل او کوݨ ہا، جیہڑا شکار کر تے میڈے کولھ گِھن آیا ہا؟ تیڈے آوݨ تُوں ذرا پہلے مَیں اُوں شکار دا کھانڑا کھا تے اُوں بندے کُوں برکت ڈے ڈِتی، تے مُبارک وی اُوہو ہوسی۔“

34ایہ سُنڑ تے عیسو دھاڑاں مار تے چیخنڑ لگا، ”ابّا سئیں، میکُوں وی برکت ڈیؤ، میکُوں وی۔“

35پر اِضحاق جواب ڈِتا، ”تیڈے بِھرا آ تے میکُوں دوکھا ڈِتے۔ اُوں تیڈی برکت کَھس گِھدی ہے۔“

36عیسو آکھیا، ”اُوندا ناں یعقُوب ٹھیک ای رکھیا گِیا ہے، کیوں جو اُوں میکُوں ڈُوجھی پھیری دوکھا ڈِتے۔ پہلاں اُوں میڈے تُوں پلوٹھے دا حق کَھس گِھدے تے ہُنڑ میڈی برکت وی گِھن گئے۔ کیا ہُنڑ تُساں میڈے کیتے کوئی برکت بچا نئیں رکھی؟“

37اِضحاق آکھیا، ”مَیں اُونکُوں تیڈا حُکمران تے اُوندے سارے بِھرانواں کُوں اُوندا خادم بنڑا ڈِتے۔ مَیں اُونکُوں اناج تے انگُور دا رَس ڈِتے۔ میڈے پوتر! ہُنڑ مَیں تیکُوں کیہڑی چیز ڈیواں؟“

38پر عیسو آکھنڑ لگا، ”ابّا، کیا تُہاڈے کولھ صرف اِیہو برکت ہئی؟ ابّا میکُوں وی برکت ڈیؤ، میکُوں وی۔“ تے او دھاڑاں مار تے رووݨ لگا۔

39وَل اِضحاق آکھیا،

”تُوں زمین دی زرخیزی

تے اسمان دی تریل تُوں محروم راہسیں۔

40تُوں آپنڑی تلوار دے سہارے زندہ راہسیں

تے آپنڑے بِھرا دی خدمت کریسیں،

پر ہِک ڈینہہ تُوں تنگ تھی تے

اُوندی پنجالی آپنڑی گردن تُوں لہا سٹیسیں۔“

یعقُوب دی ہجرت

41پِیُو دی اِیں برکت پارُوں عیسو یعقُوب دا دُشمنڑ بنڑ گِیا۔ اُوں دل ءچ آکھیا، ”او ڈینہہ نیڑے آ گئے ہِن جِیں ویلے ابّا مر ویسی تے اساں اُوندا ماتم کریسوں۔ وَل مَیں آپنڑے بِھرا کُوں مار سٹیساں۔“

42جِیں ویلے رِبقہ کُوں آپنڑے وڈے پوتر عیسو دے اِیں اِرادے دا پتہ لگیا تاں اُوں یعقُوب کُوں سڈ تے آکھیا، ”سُنڑ! تیڈا بِھرا تیکُوں قتل کر تے بدلہ گِھننڑ چاہندے۔ 43پوتر ہُنڑ میڈی گالھ مَن، تے اُٹھی تے حاران شہر ءچ میڈے بِھرا لابن دے کولھ بھج وَنج۔ 44اُتھاں کُجھ ڈینہہ ٹِکیا راہویں، جِیں ویلے تئیں تیڈے بِھرا دی کاوڑ لہہ نہ ونجے۔ 45جِیں ویلے اُوندی کاوڑ لہہ ویسی تے او تیڈے ولُوں اُوندے نال کیتے گئے سلوک کُوں بُھل ویسی تاں مَیں تیکُوں سڈوا گِھنساں۔ مَیں ہِکو ڈینہہ تُساں ڈوہائیں کُوں کیوں ونجا ڈیواں؟“

46وَل رِبقہ اِضحاق نال گالھ کیتی، ”مَیں عیسو دیاں حِتّی ذالاں دے پارُوں آپنڑی زندگی تُوں تنگ ہاں۔ جے یعقُوب وی اِیں مُلک دیاں عورتاں ءچوں کہیں کُوں پرنا گِھنے تاں چنگا ہے جو مَیں اِیں تُوں پہلے ای مر وَنجاں۔“