پیدائش 40

قیدیاں دے خواب

1کُجھ عرصے تُوں بعد اِینویں تھیّا جو مِصر دے بادشاہ دے سردار ساقی تے شاہی بیکری دے سردار، آپنڑے مالک دے مُجرم تھئے۔ 2فرعون ڈوہائیں افسراں اُتے کوڑیج پِیا۔ 3اُوں ڈوہائیں کُوں اُوں قید خانے ءچ سَٹ ڈِتا جیہڑا شاہی پہرے داراں دے سردار دے گھر ءچ ہا جیندے ءچ یُوسف وی قید ہا۔ 4پہرے داراں دے سردار اُنہاں کُوں یُوسف دے حوالے کیتا تاں جو او اُنہاں دی خدمت کرے۔ او ہِک مُدت تئیں اُتھاں نظر بند ریہے۔

5ہِک رات بادشاہ دے سردار ساقی تے شاہی بیکری دے سردار خواب ڈِٹھا۔ ڈوہائیں دے خواب اَنج اَنج ہَن تے اُنہاں دے مطلب وی اَنج اَنج ہَن۔ 6جِیں ویلے یُوسف سویلے اُنہاں دے کولھ آیا تاں او پریشان نظر آئے۔ 7یُوسف اُنہاں تُوں پُچھیا، ”اَج تُساں ایڈے پریشان کیوں نظر آندے ہیوے؟“

8اُنہاں جواب ڈِتا، ”اساں ڈوہائیں خواب ڈِٹھے، پر ساکُوں اُنہاں دا مطلب سمجھاوݨ آلا کوئی نئیں۔“

یُوسف آکھیا، ”خواباں دا مطلب سمجھاونڑا تاں خُدا دی قُدرت ہے۔ ذرا میکُوں آپنڑے خواب سُنڑاؤ۔“

9سردار ساقی آپنڑا خواب یُوسف کُوں سُنڑایا جو، ”مَیں خواب ءچ آپنڑے سامنڑے انگُور دی وَل ڈِٹھی۔ 10اُوندیاں ترے ٹاہنڑیاں ہَن۔ اُونکُوں پتر لگے، ڈوڈیاں نِکل آئیاں تے اُوندے انگُوراں دے گُچھے پک گئے۔ 11میڈے ہتھ ءچ بادشاہ دا پیالہ ہا تے مَیں انگُوراں کُوں پَٹ تے بادشاہ کیتے پیالے ءچ رَس بنڑایا۔ وَل مَیں پیالہ بادشاہ دے ہتھ ءچ ڈِتا۔“

12یُوسف آکھیا، ”ترے ٹاہنڑیاں تُوں مُراد ترے ڈینہہ ہِن۔ 13ترے ڈینہہ تُوں بعد فرعون تیکُوں بحال کر ڈیسی تے تیکُوں پہلے آلی ذمہ داری ولا مِل ویسی۔ پہلے آلی کار تُوں سردار ساقی دی حیثیت نال بادشاہ دے ہتھ ءچ پیالہ ڈیسیں۔ 14پر جِیں ویلے تُوں بحال تھی ونجیں تاں میکُوں یاد کریں۔ مہربانی کر تے بادشاہ دے سامنڑے میڈا ذِکر کریں، تاں جو مَیں اِتُھوں رِہا تھی وَنجاں۔ 15کیوں جو لوک میکُوں عبرانیاں دے مُلک ءچوں اغوا کر تے اِتھاں گِھن آئے ہِن۔ تے اِتھاں وی میڈے تُوں کوئی ایجھا کم نئیں تھیّا جو میکُوں اِیں قید خانے ءچ سٹیا ونجے۔“

16جِیں ویلے شاہی بیکری دے سردار ڈِٹھا جو سردار ساقی دے خواب دا چنگا مطلب نِکلے تاں اُوں یُوسف کُوں آکھیا، ”میڈا خواب وی سُنڑ۔ میڈے سر اُتے روٹی دیاں ترے ٹوکریاں ہَن۔ 17سبھ تُوں اُتلی ٹوکری ءچ او سبھ چیزاں ہَن جیہڑیاں بادشاہ کیتے بنڑائیاں ویندیاں ہَن۔ پر پکھی آ تے اُنہاں کُوں اُوں ٹوکری ءچوں کھادی ویندے ہَن، جیہڑی میڈے سر اُتے ہئی۔“

18یُوسف آکھیا، ”ترے ٹوکریاں تُوں مُراد ترے ڈینہہ ہِن۔ 19ترے ڈینہاں تُوں بعد فرعون تیڈا سر کٹوا تے تیکُوں درخت نال ٹنگوا ڈیسی۔ پکھی تیڈی لاش کُوں کھا ویسن۔“

20ترے ڈینہاں بعد بادشاہ دی سالگرہ ہئی۔ اُوں آپنڑے سارے افسراں دی دعوت کیتی۔ اِیں موقعے تے اُوں حُکم ڈِتا جو سردار ساقی تے شاہی بیکری دے سردار کُوں جیل ءچوں کڈھ تے پیش کرو۔ 21سردار ساقی کُوں اُوندی پہلے آلی ذمہ داری ڈے ڈِتی گئی تے او ولا فرعون کُوں پیالہ ڈیوݨ لگا۔ 22پر شاہی بیکری دے سردار کُوں سزائے موت ڈے تے درخت نال ٹنگ ڈِتا گِیا۔ سبھ کُجھ اُونویں ای تھیّا جِینویں یُوسف ڈسایا ہا۔

23پر سردار ساقی یُوسف کُوں یاد نہ کیتا بلکہ اُونکُوں بُھل گِیا۔