پیدائش 16

ہاجرہ تے اِسمٰعیل

1ہُنڑ تئیں ابرام دی ذال سارئی دا کوئی بال نہ جمیا ہا۔ اُوں ہِک مِصری کنیز رکھی ہئی جِیندا ناں ہاجرہ ہا۔ 2اِیں واسطے ہِک ڈینہہ سارئی ابرام کُوں آکھیا، ”رب العالمین میکُوں اولاد نئیں ڈِتی، اِیں کیتے تُساں میڈی کنیز دے کولھ ونجو۔ تھی سگدے جو میکُوں اُوندے ذریعے بال مِل ونجنڑ۔“

ابرام سارئی دی گالھ مَن گِھدی۔ 3تے سارئی آپنڑی مِصری کنیز ہاجرہ آپنڑے پئے کُوں ڈے ڈِتی تاں جو او اُوندی ذال بنڑے۔ اُوں ویلے ابرام کُوں کنعان ءچ راہندے ہوئے ڈاہ سال تھی گئے ہَن۔ 4ابرام ہاجرہ دے کولھ گِیا تاں او حاملہ تھی گئی۔ جِیں ویلے ہاجرہ کُوں ایہ پتہ لگیا تاں او آپنڑی مالکنڑ کُوں حقیر سمجھنڑ لگی۔ 5وَل سارئی ابرام کُوں آکھیا، ”جیہڑا ظلم میڈے اُتے تھیندا پئے، اُوندے ذمے دار تُساں ہیوے۔ مَیں آپ اِینکُوں تُہاڈے حوالے کیتا ہا، پر ہُنڑ جِیں ویلے اِینکُوں پتہ لگے جو او حاملہ ہے تاں او میکُوں حقیر سمجھنڑ لگ پئی ہے۔ رب العالمین تُہاڈے تے میڈے وچال اِنصاف کرے۔“

6ابرام جواب ڈِتا ”ڈیکھ ایہ تیڈی کنیز ہے، تیڈے تابع ہے، تیڈا جو دل آکھے اِیندے نال کر۔“

اِیں تُوں بعد سارئی ہاجرہ نال ایجھا بُرا سلوک کرݨ لگی جو او بھج گئی۔ 7ہاجرہ رب دے فرشتے کُوں بیابان دے اُوں چشمے کولھ مِلی جیہڑا شور دی راہ ءچ ہے۔ 8اُوں آکھیا، ”سارئی دی کنیز ہاجرہ، تُوں کِتھوں آندی پئی ہیں تے کِتھاں ویندی پئی ہیں؟“

ہاجرہ جواب ڈِتا، ”مَیں آپنڑی مالکنڑ سارئی تُوں بھج آئی ہاں۔“

9رب دے فرشتے اُونکُوں آکھیا، ”آپنڑی مالکنڑ کولھ واپس لگی وَنج تے اُوندی تابعداری کر۔ 10مَیں تیڈی اولاد اِتنی ودھیساں جو اُونکُوں کوئی گِنڑ نہ سگسی۔“

11وَل رب دے فرشتے آکھیا، ”تُوں حاملہ ہیں تے تیڈا ہِک پوتر جمسی۔ تُوں اُوندا ناں اِسمٰعیل1 رکھیں، کیوں جو رب العالمین مُصیبت ءچ تیڈی اواز سُنڑی۔ 12او جنگلی گڈھاں آلی کار ازاد ہوسی، اُوندا ہتھ ہر ہِک دے خلاف تے ہر ہِک دا ہتھ اُوندے خلاف ہوسی۔ وَل وی او آپنڑے سبھ بِھرانواں دے سامنڑے آباد راہسی۔“

13رب العالمین دے اُوندے نال کلام کرݨ تُوں بعد ہاجرہ رب دا ناں ”تُوں ڈیکھنڑ آلا خُدا ہیں2“ رکھیا۔ کیوں جو اُوں آکھیا، ”اِتھاں مَیں آپنڑے ڈیکھنڑ آلے کُوں ڈِٹھے۔“ 14اِیں کیتے اُوں جاہ دے کُھوہ دا ناں ”بیرلحی روئی3“ پے گِیا۔ او قادِس تے برِد دے وچال ہے۔

15ہاجرہ واپس گئی تے اُوندے پوتر جمیا، ابرام اُوندا ناں اِسمٰعیل رکھیا۔ 16اُوں ویلے ابرام چِھیاسی (86) سال دا ہا۔