پیدائش 17

عہد دا نشان : ختنہ

1جِیں ویلے ابرام نِنانوے (99) سال دا ہا تاں رب العالمین اُوندے اُتے ظاہر تھیّا۔ اُوں آکھیا، ”مَیں قُدرت آلا خُدا ہاں۔ میڈے حضُور ٹُردا رہ تے بے اِلزام رہ۔ 2مَیں تیڈے نال آپنڑا عہد بدھیساں تے تیڈی اولاد کُوں بہُوں زیادہ ودھیساں۔“

3اِیں تے ابرام مُنہ دے بھار ڈھٹھا تے خُدا اُونکُوں آکھیا، 4”میڈا تیڈے نال ایہ عہد ہے جو تُوں بہُوں قوماں دا پِیُو ہوسیں۔ 5ہُنڑ کنُوں تُوں ابرام نہ اکھویسیں بلکہ تیڈا ناں ابرہام1 ہوسی، کیوں جو مَیں تیکُوں بہُوں قوماں دا پِیُو بنڑا ڈِتے۔ 6مَیں تیکُوں بہُوں ودھیساں تے قوماں تیڈی نسل ءچوں ہوسن تے بادشاہ تیڈی اولاد ءچوں نِکلسن۔

7مَیں تیڈے تے تیڈی اولاد دے نال آپنڑا عہد نسل در نسل قائم رکھیساں۔ ہِک ہمیشاں راہوݨ آلا عہد جیندے مطابق مَیں تیڈا تے تیڈی اولاد دا خُدا ہوساں2۔ 8تُوں اِیں ویلے کنعان ءچ پردیسی ہیں۔ پر ایہ پُورا مُلک مَیں تیکُوں تے تیڈی اولاد کُوں ڈیندا ہاں۔ ایہ ہمیشاں تئیں اُنہاں دا ای راہسی تے مَیں اُنہاں دا خُدا ہوساں۔“

9خُدا ابرہام کُوں ایہ وی آکھیا، ”تیکُوں تے تیڈی اولاد کُوں نسل در نسل میڈے عہد دیاں شرطاں پُوریاں کرنڑیاں پوسن۔ 10اُوں عہد دی ہِک شرط ایہ ہے جو ہر ہِک مرد دا ختنہ کیتا ونجے۔ 11آپنڑا ختنہ کراؤ۔ ایہ ساڈے آپس دے عہد دا ظاہری نشان ہوسی۔ 12لازم ہے جو تُوں تے تیڈی اولاد نسل در نسل آپنڑے ہر ہِک پوتر دا اٹھویں ڈینہہ ختنہ کراوے۔ ایہ اصُول اُوندے کیتے وی ہے جیہڑا تیڈا رشتہ دار نئیں پر تیڈے گھر ءچ راہندے، بھانویں او گھر ءچ جمیا ہویا غُلام ہووے یا کہیں غیر کنُوں مُل گِھدا گِیا ہووے۔ 13گھر دے ہر ہِک مرد دا ختنہ کرݨ لازم ہے، بھانویں او گھر ءچ جمیا ہووے یا کہیں غیر کنُوں مُل گِھدا گِیا ہووے۔ ایہ تُہاڈے جسم اُتے اِیں گالھ دا نشان ہوسی جو میڈا عہد تُہاڈے نال ہمیشاں تئیں قائم راہسی۔ 14جیہڑے مرد دا ختنہ نہ تھیّا ہوسی، اُونکُوں اُوندی قوم ءچوں کڈھ ڈِتا ویسی کیوں جو اُوں میڈے عہد کُوں تروڑے۔“

15خُدا ابرہام کُوں ایہ وی آکھیا جو ”اگُوں تے تُوں آپنڑی ذال سارئی کُوں سارئی نہ آکھیں بلکہ ہُنڑ تُوں اُوندا ناں سارہ3 ہوسی۔ 16مَیں اُونکُوں برکت ڈیساں تے تیکُوں اُوندے ءچوں پوتر ڈیساں۔ مَیں اُونکُوں اِتُھوں تئیں برکت ڈیساں جو اِیندے ءچوں قوماں بلکہ قوماں دے بادشاہ نِکلسن۔“

17ابرہام مُنہ دے بھار ڈھٹھا، پر اندرُوں اندرُوں کِھل پِیا تے سوچیا، ”کیا سو (100) سال دے بُڈھے دا بال جم سگدے؟ تے سارہ دا بال کِینویں جم سگدے؟ اُوندی عُمر تاں نوّے (90) سال ہے۔“ 18اُوں خُدا کُوں آکھیا، ”ہا، اِسمٰعیل ای تیڈے حضُور حیاتی آلا ہووے۔“

19خُدا آکھیا، ”بےشک تیڈی ذال سارہ دے پوتر جمسی، تُوں اُوندا ناں اِضحاق4 رکھیں۔ مَیں اُوندے تے اُوندی اولاد دے نال ابدی عہد بدھیساں۔ 20مَیں اِسمٰعیل دے بارے ءچ وی تیڈی درخاست پُوری کریساں۔ مَیں اُونکُوں وی برکت ڈے تے پھلنڑ پُھلنڑ ڈیساں تے اُوندی اولاد بہُوں زیادہ ودھیساں۔ او بارہاں سرداراں دا پِیُو ہوسی تے مَیں اُوندے ءچوں ہِک وڈی قوم بنڑیساں۔ 21پر میڈا عہد اِضحاق دے نال ہوسی جیہڑا پُورے ہِک سال بعد سارہ ءچوں جمسی۔“

22خُدا ابرہام نال گالھ مُکائی تے او اُتھوں واپس اسمان اُتے چلیا گِیا۔

23اُونہئی ڈینہہ ابرہام خُدا دا حُکم پُورا کیتا۔ اُوں گھر دے ہر مرد دا ختنہ کروایا۔ آپنڑے پوتر اِسمٰعیل دا وی تے اُنہاں دا وی جیہڑے اُوندے گھر ءچ راہندے ہَن، بھانویں اُوندے رشتہ دار نہ ہَن، بھانویں او اُوندے گھر ءچ جمّے ہَن تے بھانویں مُل گِھدے گئے ہَن۔ 24ابرہام نِنانوے (99) سال دا ہا جِیں ویلے اُوندا ختنہ تھیّا۔ 25جِیں ویلے اُوندے پوتر اِسمٰعیل دا ختنہ تھیّا تاں او تیرہاں (13) سال دا ہا۔ 26ڈوہائیں دا ختنہ ہِکو ڈینہہ تھیّا۔ 27اِیندے نال گھر دے باقی سبھ مرداں دا ختنہ تھیّا، بھانویں او اُوندے گھر ءچ جمّے ہَن یا کہیں غیر تُوں مُل گِھدے گئے ہَن۔