پیدائش 14

ابرام لُوط کُوں چُھڑویندے

1وَل سنعار دے بادشاہ اَمرافل، الاسر دے بادشاہ اریوک، عیلام دے بادشاہ کِدرلاعمر تے جوئیم دے بادشاہ تِدعال، 2کنعان دے پنج بادشاہاں یعنی سدُوم دے بادشاہ برَع، عمُورہ دے بادشاہ بِرشع، اَدمہ دے بادشاہ سنیاب، ضبوئِیم دے بادشاہ شمیبر تے بالع یعنی ضُغر دے بادشاہ نال جنگ کیتی۔

3کنعان دے ایہ پنج بادشاہ آپنڑیاں آپنڑیاں فوجاں سمیت سدیم دی وادی ءچ کٹھے تھئے جِتھاں ہُنڑ بحیرہ مُردار ہے۔ 4کِدرلاعمر بارہاں سالاں تئیں اُنہاں اُتے راج کیتا، پر تیرہویں سال او باغی تھی گئے۔

5ہُنڑ چوڈھویں سال ءچ کِدرلاعمر تے اُوندے نال دے بادشاہ جنگ کرݨ آئے۔ پہلے اُنہاں عستارات قرنیم ءچ رفائیمیاں کُوں، ہام ءچ زوزیاں کُوں، سوِی قریتائِم ءچ اَیمیمیاں کُوں، 6تے حوریاں کُوں اُنہاں دے پہاڑی علاقے شعِیر ءچ شکست ڈِتی۔ اِینویں او ایل فاران تئیں پُج گئے جیہڑا بیابان دے نیڑے ہے۔ 7وَل او شمال دو واپس آئے تے عین مصفات یعنی قادِس پُجے۔ اُنہاں عمالیقیاں دے پُورے علاقے کُوں تباہ کر ڈِتا تے حَصَصون تمر ءچ آباد امورِیاں کُوں وی شکست ڈِتی۔

8اُوں ویلے سدُوم، عمُورہ، اَدمہ، ضبوئِیم تے بالع یعنی ضُغر دے بادشاہ اُنہاں نال لڑن کیتے سدیم دی وادی ءچ کٹھے تھئے۔ 9اِنہاں پنج بادشاہاں عیلام دے بادشاہ کِدرلاعمر، جوئیم دے بادشاہ تِدعال، سنعار دے بادشاہ اَمرافل تے الاسر دے بادشاہ اریوک دا مُقابلہ کیتا یعنی اُنہاں پنج بادشاہاں دا مُقابلہ اِنہاں چار بادشاہاں کیتا۔ 10اِیں وادی ءچ لُک دے بہُوں سارے کھڈے ہَن۔ جِیں ویلے باغی بادشاہ ہر تے بھجنڑ لگے تاں سدُوم تے عمُورہ دے بادشاہ اِنہاں کھڈیاں ءچ ڈھے پئے پر باقی بچ تے پہاڑی علاقے دو فرار تھی گئے۔ 11جیتنڑ آلے بادشاہ سدُوم تے عمُورہ دا سارا مال تے ساریاں کھاوݨ آلیاں چیزاں لُٹ تے واپس چلے گئے۔ 12ابرام دا بھتریجا لُوط سدُوم ءچ راہندا ہا، اِیں کیتے او اُونکُوں وی اُوندی جائیداد سمیت نال گِھن گئے۔

13پر بچ ونجنڑ آلیاں ءچوں ہِک بندے ابرام عبرانی دے کولھ آ تے اُونکُوں سبھ کُجھ ڈسا ڈِتا۔ اُوں ویلے ابرام مَمرے دے وڈے درختاں دے کولھ راہندا ہا۔ مَمرے اموری ہا۔ اُوں تے اُوندے بِھرانواں اِسکال تے عانیر ابرام نال مدد کرݨ دا عہد بدھیا ہا۔ 14جِیں ویلے ابرام کُوں پتہ لگیا جو اُوندے بھتریجے لُوط کُوں قیدی بنڑا گِھدا گئے تاں اُوں آپنڑے گھر دے سبھ جنگ لڑن دے قابل غُلاماں کُوں کٹھا کر تے دان تئیں دُشمنڑ دا پِچھا کیتا۔ اُوندے نال ترے سو اٹھارہاں (318) بندے ہَن۔ 15اُتھاں اُوں آپنڑے بندیاں کُوں گروپاں ءچ وَنڈ تے رات دے ویلے دُشمنڑ اُتے حملہ کیتا۔ دُشمنڑ ہر تے بھجیا تے ابرام دمشق دے شمال ءچ خوبہ تئیں اُوندا پِچھا کیتا۔ 16او اُنہاں تُوں لُٹیا ہویا سارا مال واپس گِھن آیا، تے لُوط، اُوندی جائیداد، سبھ عورتاں تے بئے قیدی وی دُشمنڑ دے قبضے تُوں واپس گِھن آیا۔

مَلک صِدق، سالم دا بادشاہ

17جِیں ویلے ابرام کِدرلاعمر تے اُوندے نال دے بادشاہاں تُوں جِت تے واپس پُجیا تاں سدُوم دا بادشاہ اُوندے اِستقبال کیتے سوِی دی وادی ءچ آیا۔ اِینکُوں اَجکل بادشاہ دی وادی آکھیا ویندے۔ 18سالم دا بادشاہ ملک صِدق وی آپنڑے نال روٹی تے انگُور دا رَس گِھن آیا۔ مَلک صِدق خُدا تعالیٰ دا کاہِن ہا۔ 19اُوں ابرام کُوں برکت ڈے تے آکھیا، ”ابرام اُتے خُدا تعالیٰ دی برکت ہووے جیہڑا اسمان تے زمین دا خالق ہے۔ 20خُدا تعالیٰ دی تعریف ہووے جئیں تیڈے دُشمنڑاں کُوں تیڈے ہتھ ءچ کر ڈِتے۔“ ابرام مَلک ِ صِدق کُوں سارے مال دا ڈاہواں حصہ ڈِتا۔

21وَل سدُوم دے بادشاہ ابرام کُوں آکھیا، ”میکُوں میڈے لوک واپس کر ڈے تے باقی چیزاں آپنڑے کولھ رکھ گِھن۔“

22پر ابرام اُونکُوں جواب ڈِتا، ”مَیں رب العالمین خُدا تعالیٰ دی قَسم کھادی ہے جیہڑا اسمان تے زمین دا خالق ہے 23جو مَیں اُوندے ءچوں کُجھ نہ گِھنساں جیہڑا تیڈا ہے، بھانویں او دھاگا یا جُتی دا تسمہ ای کیوں نہ ہووے، تاں جو تُوں کڈھائیں آکھ نہ سگیں جو ’مَیں ابرام کُوں امیر بنڑا ڈِتے۔‘ 24اُوں روٹی دے سِوا جیہڑی میڈے بندیاں رستے ءچ کھادی ہے، مَیں کُجھ نہ گِھنساں۔ پر میڈے ساتھی عانیر، اِسکال تے مَمرے ضرور آپنڑا حصہ گِھن گِھننڑ۔“