پیدائش 7

سیلاب دا آغاز

1وَل رب العالمین نُوح کُوں آکھیا، ”آپنڑے گھر آلیاں دے نال کشتی ءچ چلیا وَنج، کیوں جو اِیں زمانے دے لوکاں ءچ مَیں تیکُوں ای نیک ڈِٹھے۔ 2ہر قِسم دے حلال جانوراں ءچوں سَت سَت جوڑے یعنی نَر تے مادی تے حرام جانوراں ءچوں ہِک ہِک جوڑا یعنی نَر تے مادی نال گِھن ونجیں۔ 3اِینویں ای ہر قِسم دے پکھیاں ءچوں سَت سَت جوڑے یعنی نَر تے مادی وی نال گِھن ونجیں تاں جو دُنیا ءچ اُنہاں دیاں نسلاں بچیاں راہوݨ۔ 4سَت ڈینہہ بعد مَیں چالیہہ ڈینہہ تے چالیہہ رات مینہ وسیساں۔ اِیندے نال مَیں سارے جانداراں کُوں زمین تُوں مِٹا ڈیساں جِنہاں کُوں مَیں بنڑائے۔“

5نُوح اُونویں ای کیتا جِینویں رب العالمین اُونکُوں حُکم ڈِتا ہا۔ 6جِیں ویلے سیلاب زمین اُتے آیا تاں نُوح چِھی سو (600) سال دا ہا۔

7سیلاب تُوں بچنڑ کیتے نُوح آپنڑی ذال، آپنڑے پوتراں تے آپنڑیاں نُوہاں دے نال کشتی ءچ سوار تھیّا۔ 8حلال تے حرام1 حیوان، پکھی تے زمین اُتے ریڑھن آلے جانور وی جوڑا جوڑا تھی تے 9یعنی نَر تے مادی نُوح دے کولھ کشتی ءچ آئے، جِینویں خُدا نُوح کُوں حُکم ڈِتا ہا۔ 10سَت ڈینہہ بعد سیلاب دا پانڑی زمین اُتے آ گِیا۔

11ایہ سبھ کُجھ اُوں ویلے تھیّا جِیں ویلے نُوح چِھی سو (600) سال دا ہا۔ ڈُوجھے مہینے دے ستارہویں ڈینہہ زمین دیاں ڈُونگھائیاں ءچوں سارے چشمے پُھٹ پئے تے اسمان دے دَر کُھل گئے۔ 12چالیہہ ڈینہہ تے چالیہہ رات تئیں مینہ وسدا ریہا۔ 13جیہڑے ڈینہہ مینہ وسنڑ شروع تھیّا تاں نُوح آپنڑی ذال، آپنڑے پوتر سم، حام تے یافت تے نُوہاں نال کشتی ءچ داخل تھی گِیا، 14تے اُنہاں دے نال ہر قِسم دے جنگلی جانور، ڈھورڈنگر، ریڑھن آلے جانور، پکھی تے چِڑیاں ہَن۔ 15ہر قِسم دے جاندار جوڑا جوڑا تھی تے نُوح دے کولھ کشتی ءچ آئے۔ 16جیہڑے کشتی ءچ آئے ہَن او نَر تے مادی ہَن جِینویں خُدا نُوح کُوں حُکم ڈِتا ہا۔ وَل رب العالمین دَر بند کر ڈِتا۔

17سیلاب چالیہہ ڈینہہ تئیں زمین اُتے ریہا۔ پانڑی چڑھیا تے اُوں کشتی کُوں زمین تُوں اُتے چا ڈِتا۔ 18پانڑی چڑھدا گِیا تے بہُوں ودھ گِیا تے کشتی اُوندے اُتے ترݨ لگی۔ 19آخر کار پانڑی اِتنا زیادہ تھی گِیا جو سارے اُچے پہاڑ وی اُوندے ءچ لُک گئے، 20بلکہ پانڑی سبھ تُوں اُچی چوٹی تُوں وی وِیہہ (20) فُٹ اُچا تھی گِیا۔ 21زمین اُتے راہوݨ آلی ہر مخلوق یعنی پکھی، ڈھورڈنگر، جنگلی جانور، سارے جاندار جیہڑے زمین اُتے رِیڑھدے ہَن تے سبھ اِنسان مر گئے۔ 22زمین اُتے ساہ گِھننڑ آلا ہر جاندار مر گِیا۔ 23اِینویں خُدا ہر جاندار یعنی اِنسان، حیوان، زمین اُتے ریڑھن آلے جانور تے پکھی سبھ کُوں مُکا ڈِتا۔ صرف نُوح تے کشتی ءچ سوار اُوندے ساتھی بچ گئے۔

24پانڑی ڈیڈھ سو (150) ڈینہہ تئیں زمین اُتے چڑھدا ریہا۔