پیدائش 22

ابرہام دی ازمائش

1کُجھ عرصے بعد خُدا ابرہام کُوں ازمایا۔ خُدا اُونکُوں آکھیا، ”ابرہام!“

اُوں جواب ڈِتا، ”جی مَیں حاضر ہاں۔“

2خُدا آکھیا، ”آپنڑے کلھے1 پوتر اِضحاق کُوں جِینکُوں تُوں پیار کریندیں، نال گِھن تے موریاہ دے علاقے ءچ وَ نج۔ اُتھاں مَیں تیکُوں ہِک پہاڑ ڈیکھیساں، اُوندے اُتے آپنڑے پوتر کُوں ساڑے ونجنڑ آلی قُربانی2 دے طور تے قُربان کر ڈیویں۔“

3ابرہام صُبح سویلے اُٹھیا تے آپنڑے کھوتے اُتے کاٹھی سٹی۔ اُوں آپنڑے نال ڈُو نوکراں تے آپنڑے پوتر اِضحاق کُوں گِھدا۔ وَل او قُربانی کُوں ساڑݨ کیتے لکڑ کپ تے اُوں جاہ دو ٹُر پِیا جیہڑی خُدا اُونکُوں ڈسائی ہئی۔ 4تریجھے ڈینہہ قُربانی دی جاہ ابرہام کُوں دُور تُوں نظر آئی۔ 5اُوں نوکراں کُوں آکھیا، ”تُساں اِتھائیں کھوتے کولھ کھڑو۔ مَیں چھوہر دے نال اُتھاں وَنج تے عبادت کریساں۔ وَل اساں تُہاڈے کولھ واپس ہٹ آسُوں۔“

6ابرہام قُربانی کُوں ساڑݨ کیتے لکڑیں اِضحاق دے مونڈھیاں اُتے رکھ ڈِتیاں۔ اُوں بھاہ بالنڑ کیتے انگاریاں آلا تھاں تے کاتی چا گِھدی۔ ڈوہائیں ٹُر پئے۔ 7اِضحاق بولیا، ”ابّا!“

ابرہام آکھیا، ”جی پوتر۔“

”ابّا بھاہ تے لکڑیں تاں ساڈے کولھ ہِن پر قُربانی کیتے لیلا کِتھاں ہے؟“

8ابرہام جواب ڈِتا، ”پوتر، قُربانی کیتے لیلا خُدا آپ ڈیسی۔“ او اگُوں ودھ گئے۔

9ٹُردے ٹُردے او اُوں جاہ وَنج پُجے جیہڑی خُدا اُوندے اُتے ظاہر کیتی ہئی۔ ابرہام اُتھاں قُربان گاہ بنڑائی تے اُوندے اُتے ترتیب نال لکڑیں رکھ ڈِتیاں۔ وَل اُوں آپنڑے پوتر اِضحاق کُوں بَدھ تے لکڑیں اُتے لِٹا ڈِتا 10تے کاتی پکڑ گِھدی تاں جو آپنڑے پوتر کُوں ذبح کرے۔ 11عین اُوں ویلے رب دے فرشتے اسمان تُوں اُونکُوں اواز ڈِتی ”ابرہام! ابرہام!“

ابرہام جواب ڈِتا ”جی مَیں حاضر ہاں۔“

12فرشتے آکھیا، ”آپنڑے پوتر اُتے ہتھ نہ چلا۔ اُونکُوں کُجھ نہ آکھ۔ ہُنڑ میکُوں پتہ لگ گئے جو تیڈے دل ءچ خُدا دا خوف ہے، کیوں جو تُوں آپنڑا کلھا پوتر وی میکُوں ڈیوݨ تُوں اِنکار نئیں کیتا۔“

13اچانک ابرہام کُوں ہِک چھترا نظر آیا جیندے سینگ گھاٹے جھاڑیاں ءچ پھسے ہوئے ہَن۔ ابرہام اُونکُوں وَنج تے پکڑ گِھدا تے اُونکُوں ذبح کر تے آپنڑے پوتر دی جاہ ساڑے ونجنڑ آلی قُربانی دے طور تے قُربان کر ڈِتا۔ 14اُوں، اُوں جاہ دا ناں ”رب ڈیسی3“ رکھیا۔ اِیں کیتے اَج تئیں آکھیا ویندے، ”رب العالمین دے پہاڑ اُتے ڈِتا ویندے۔“

15رب دے فرشتے ہِک پھیری ولا اواز ڈے تے اُوندے نال گالھ کیتی جو 16”رب العالمین فرمیندے، کیوں جو تَیں ایہ کیتے تے آپنڑا کلھا پوتر وی میکُوں ڈیوݨ تُوں اِنکار نئیں کیتا، اِیں کیتے میڈی ذات دی قَسم 17مَیں تیکُوں ضرور برکت ڈیساں تے تیڈی اولاد کُوں اسمان دے تاریاں تے سمندر دی ریت آلی کار ودھیساں۔ تیڈی اولاد آپنڑے دُشمنڑاں دے شہراں اُتے قبضہ کریسی۔ 18کیوں جو تَیں میڈی سُنڑی، اِیں کیتے تیڈی اولاد دے وسیلے دُنیا دیاں سبھ قوماں برکت پیسن۔“

19اِیندے بعد ابرہام آپنڑے نوکراں کولھ وَل آیا تے او کٹھے بیرسبع وَل آئے۔ تے ابرہام اُتھاں راہندا ریہا۔

ابرہام دے بِھرا نحُور دی نسل

20اِنہاں گالھیں دے بعد ابرہام کُوں اِطلاع مِلی جو ”تیڈے بِھرا نحُور دی ذال مِلکاہ دے وی پوتر جمّے ہِن۔“ 21اُوندے پلیٹھی دے پوتر عُوض دے بعد بُوز، قمُوایل جیہڑا ارام دا پِیُو ہا، 22کسد، حزُو، فِلداس، اِدلاف تے بتیوایل جمّے ہَن۔ 23مِلکاہ تے نحُور دے ایہ اَٹھ پوتر جمّے۔ بیتوایل، رِبقہ دا پِیُو ہا۔ 24نحور دی حرم4 دا ناں رُومہ ہا۔ اُوندے وی پوتر جمّے جِنہاں دے ناں طِبخ، جاحم، تخص تے معکہ ہَن۔