پیدائش 23

سارہ دی موت

1سارہ ہِک سو ستاوِیہہ (127) سال زندہ ریہی۔ 2وَل او کنعان مُلک دے شہر حبرون ءچ فوت تھئی جیہڑا اُوں زمانے ءچ قریت اربع اکھویندا ہا، تے ابرہام سارہ کیتے رووݨ تے ماتم کرݨ اُتھاں گِیا۔ 3وَل ابرہام میّت دے کولُھوں اُٹھیا تے بنی حِت کُوں آکھیا، 4”مَیں تُہاڈے وچال پردیسی ہاں، میکُوں قبر کیتے جاہ ڈیؤ تاں جو مَیں آپنڑی ذال کُوں دفن کر سگاں۔“

5بنی حِت جواب ڈِتا، 6”آقا، ساڈی گالھ سُنڑو! تُساں ساڈے ءچ وڈے سردار ہیوے، آپنڑی ذال کُوں ساڈی کہیں چنگی قبر ءچ دفن کر گِھنو۔ ساڈے ءچوں کوئی تُہاکُوں قبر ڈیوݨ تُوں اِنکار نہ کریسی۔“

7ابرہام اُٹھیا تے مُلک دے لوکاں یعنی بنی حِت دے سامنڑے ادب نال جُھک گِیا۔ 8اُوں آکھیا، ”جے تُساں اِیندے کیتے راضی ہیوے جو مَیں آپنڑی ذال کُوں اِتھاں دفن کر گِھناں تاں صُحر دے پوتر عِفرون کُوں میڈی سفارش کرو 9جو او میکُوں مکفیلہ دی غار مُل ڈے ڈیوے جیہڑی اُوندی ہے تے اُوندے کھیت دے بنّے اُتے ہے۔ مَیں اُوندا پُورا مُل بھرݨ کُوں تیار ہاں تاں جو تُہاڈے وچال راہندے ہوئے میڈے کولھ قبر کیتے جاہ وی ہووے۔“

10عِفرون بنی حِت دی مجلس ءچ موجود ہا۔ اُوں شہر دے پھاٹک اُتے کٹھے تھئے ہوئے بنی حِت دے سامنڑے ابرہام کُوں جواب ڈِتا، 11”نہ میڈے آقا، میڈی گالھ سُنڑو۔ مَیں تُہاکُوں ایہ کھیت تے اُوندے ءچ موجود غار وی ڈیندا ہاں۔ اِتھاں کھڑے سبھ لوک میڈے گواہ ہِن۔ مَیں ایہ تُہاکُوں ڈیندا ہاں، آپنڑی ذال کُوں دفن کر گِھنو۔“

12ابرہام ولا لوکاں دے سامنڑے ادب نال جُھک گِیا۔ 13اُوں ساریاں دے سامنڑے عِفرون کُوں آکھیا، ”مہربانی کر تے میڈی گالھ اُتے غور کرو، مَیں کھیت دی پُوری قیمت ڈیساں۔ اِینکُوں قبول کرو تاں جو مَیں اُتھاں آپنڑی ذال کُوں دفن کر سگاں۔“

14عِفرون جواب ڈِتا، 15”میڈے آقا، میڈی گالھ سُنڑو۔ اِیں زمین دی قیمت تاں صرف چاندی دے چار سو سِکے ہِن۔ تُہاڈے تے میڈے کیتے ایہ قیمت کیا ہے؟ تُساں آپنڑی ذال کُوں دفن کرو۔“

16ابرہام عِفرون دی مُنہ منگی قیمت مَن گِھدی تے ساریاں دے سامنڑے چاندی دے چار سو سِکے تول تے عِفرون کُوں ڈے ڈِتے۔ ابرہام اُوں زمانے ءچ اِستعمال تھیوݨ آلے مقرر وٹے اِستعمال کیتے۔ 17اِینویں مکفیلہ ءچ عِفرون دی زمین ابرہام دی جائیداد بنڑ گئی۔ ایہ زمین مَمرے دے مشرق ءچ ہئی۔ اُوندے ءچ کھیت، کھیت دا غار تے کھیت دی حدود ءچ موجود سارے درخت شامل ہَن۔ 18شہر دے پھاٹک اُتے موجود بنی حِت دی پُوری جماعت زمین دے اِنتقال دی تصدیق کیتی۔ 19وَل ابرہام آپنڑی ذال سارہ کُوں مُلک کنعان دے اُوں غار ءچ دفن کیتا جیہڑی مَمرے یعنی حبرون دے مشرق ءچ واقع مکفیلہ دے کھیت ءچ ہئی۔ 20اِیں طریقے نال ایہ کھیت تے اُوندی غار بنی حِت تُوں ابرہام دی ملکیت بنڑ گئی تاں جو اُوندے کولھ قبر کیتے جاہ ہووے۔