پیدائش 4

قائن تے ہابل

1آدم آپنڑی ذال حوّا دے کولھ گِیا تاں او حاملہ تھئی تے اُنہاں دا پوتر قائن جمیا۔ حوّا آکھیا، ”رب العالمین دی مدد نال مَیں تُوں ہِک مرد نِکلیا۔“ 2بعد ءچ قائن دا بِھرا ہابل جمیا۔ ہابل بھیڈ بکریاں دا چھیڑو بنڑ گِیا تے قائن رَڑھ واہی کرݨ لگا۔

پہلا قتل

3کُجھ دیر تُوں بعد قائن رب العالمین کُوں آپنڑیاں فصلاں ءچوں کُجھ پھل نذرانے دے طور تے پیش کیتا۔ 4ہابل وی آپنڑیاں بھیڈ بکریاں دے کُجھ پلوٹھے اُنہاں دی چربی سمیت گِھن آیا۔ تے ہابل تے اُوندا نذرانہ رب العالمین قبول کیتا 5پر قائن تے اُوندا نذرانہ قبول نہ کیتا۔ ایہ ڈیکھ تے قائن کاوڑ ءچ آ گِیا تے اُوندے مُنہ دا رنگ بدل گِیا۔ 6رب العالمین پُچھیا، ”تُوں کاوڑ ءچ کیوں آ گئیں؟ تیڈا مُنہ کیوں وِگڑیا ہویا ہے۔ 7جے تُوں چنگا کریں تاں کیا تُوں قبول نہ تھیسیں؟ پر جے تُوں چنگا نہ کریں تاں خبردار! گُناہ دروازے اُتے تیڈی تاڑ ءچ ہے تے تیڈے اُتے غالب آونڑا چاہندے۔ پر تیکُوں اُوندے اُتے غالب آونڑا ہے۔“

8ہِک ڈینہہ قائن آپنڑے بِھرا کُوں آکھیا، ”آ اساں باہر کُھلے میدان ءچ جُلوں“ تے جِیں ویلے او کُھلے میدان ءچ ہَن تاں قائن آپنڑے بِھرا ہابل اُتے حملہ کر تے اُونکُوں مار سٹیا۔

9وَل رب العالمین قائن تُوں پُچھیا، ”تیڈا بِھرا ہابل کِتھاں ہے؟“

قائن جواب ڈِتا، ”میکُوں کیا پتہ؟ کیا مَیں آپنڑے بِھرا دا محافظ ہاں؟“

10رب العالمین آکھیا، ”تَیں ایہ کیا کیتے؟ تیڈے بِھرا دی رَت زمین ءچوں میکُوں فریاد کریندی ہے۔ 11اِیں کیتے تیڈے اُتے لعنت ہے تے اُوں زمین جئیں مُنہ کھول تے تیڈے ہتُھوں قتل کیتے ہوئے بِھرا دی رَت پی گِھدی ہے، تیکُوں رَد کر ڈِتے۔ 12ہُنڑ تُوں، جِیں ویلے وی واہی بِیجی کریسیں تاں زمین آپنڑی پیداوار نہ ڈیسی۔ تُوں ساری عُمر بے گھر راہسیں تے زمین اُتے رُلدا راہسیں۔“

13قائن آکھیا، ”میڈی سزا بہُوں سخت ہے۔ مَیں اِینکُوں برداشت نہ کر سگساں۔ 14اَج تُوں، میکُوں زمین دے اُتوں بھجیندا پئیں تے مَیں تیڈی حضُوری تُوں وی لُکیا راہساں۔ مَیں بے گھر راہساں تے زمین اُتے رُلدا راہساں تے جیہڑا کوئی میکُوں ڈیکھسی او میکُوں قتل کر ڈیسی۔“

15پر رب العالمین اُونکُوں آکھیا، ”ہرگز نئیں بلکہ جیہڑا قائن کُوں قتل کریسی اُوندے تُوں سَت گُنا بدلہ گِھدا ویسی۔“ وَل رب العالمین اُوندے اُتے ہِک نشان لایا تاں جو جیہڑا وی قائن کُوں ڈیکھے اُونکُوں قتل نہ کرے۔ 16اِیندے بعد قائن رب العالمین دے حضُور تُوں چلیا گِیا تے عدن دے مشرق آلے پاسے نُود دے علاقے ءچ وَنج وسیا۔

قائن دا خاندان

17قائن آپنڑی ذال دے کولھ گِیا تاں او حاملہ تھئی تے اُوندے پوتر جمیا جِیندا ناں حنُوک رکھیا گِیا۔ قائن ہِک شہر اُساریا تے آپنڑے پوتر دے ناں اُتے اُوندا ناں حنُوک رکھیا۔ 18حنُوک دا پوتر عیراد ہا، عیراد دا پوتر محویاایل، محویاایل دا پوتر متوساایل تے متوساایل دا پوتر لمک ہا۔ 19لمک ڈُو ذالاں کیتیاں، ہِک دا ناں عدّہ تے ڈُوجھی دا ناں ضِلّہ ہا۔ 20تے عدّہ تُوں یابل جمیا۔ اُوندی نسل دے لوک تمبُواں ءچ راہندے تے ڈھورڈنگر پِلیندے ہَن۔ 21یابل دا بِھرا یوبل ہا۔ اُوندی نسل دے لوک ستار تے بانسری وجیندے ہَن۔ 22ضِلّہ دا وی پوتر جمیا جِیندا ناں توبلقائن ہا۔ او لُوہار ہا۔ اُوندی نسل دے لوک پِتّل تے لُوہے دیاں چیزاں بنڑیندے ہَن۔ توبلقائن دی بھینڑ دا ناں نعمہ ہا۔ 23ہِک ڈینہہ لمک آپنڑی ذالاں کُوں آکھیا،

”عدّہ تے ضِلّہ! میڈی گالھ سُنڑو

لمک دی ذالو! میڈے لفظاں اُتے غور کرو

ہِک بندے میکُوں زخمی کیتا تے مَیں اُونکُوں مار سٹیا۔

ہِک چھوہر میکُوں سَٹ ماری تے مَیں اُونکُوں قتل کر ڈِتا

24جے قائن کُوں قتل کرݨ دا سَت گُنا بدلہ گِھدا ویسی

تاں جیہڑا لمک کُوں قتل کریسی اُوندے تُوں سَتتر (77) گُنا بدلہ گِھدا ویسی۔“

سیت تے انُوس

25آدم وَل آپنڑی ذال حوّا دے کولھ گِیا تے اُوندا ہِک بِیا پوتر جمیا۔ حوّا اُوندا ناں سیت رکھیا تے آکھیا، ”خُدا میکُوں ہابل دی جاہ تے جِینکُوں قائن قتل کیتا ہا ہِک بِیا پوتر ڈِتے۔“ 26سیت دا وی پوتر جمیا تے اُوں اُوندا ناں انُوس رکھیا۔

اُوں ویلے تُوں لوک رب العالمین دا ناں گِھن تے عبادت کرݨ لگے۔