Modern Central Saraiki Bible
پیدائش 5
آدم تُوں نُوح تئیں دی نسل
آدم دا شجرہ ایہ ہے:
جِیں ویلے خُدا اِنسان کُوں بنڑایا تاں اُوں اُونکُوں آپنڑے جِیہا بنڑایا، تے اُنہاں کُوں مرد تے عورت پیدا کیتا۔ تے جیہڑے ڈینہہ اُوں اُنہاں کُوں بنڑایا اُوں ڈینہہ اُنہاں کُوں برکت ڈے تے اُنہاں دا ناں اِنسان1 رکھیا۔
آدم دی عُمر ہِک سو ترِیح (130) سال ہئی جِیں ویلے اُوندے جِیہا تے اُوندی صورت اُتے پوتر جمیا، تے اُوں اُوندا ناں سیت رکھیا۔ سیت دے جمنڑ تُوں بعد آدم اَٹھ سو (800) سال بِیا زندہ ریہا۔ اُوندے بئے دِھیاں تے پوتر وی جمّے۔ تے آدم نؤں سو ترِیح (930) سال دی عُمر ءچ فوت تھیّا۔
سیت دی عُمر ہِک سو پنج (105) سال ہئی جِیں ویلے اُوندا پوتر انُوس جمیا۔ اِیندے بعد او بِیا اَٹھ سو سَت (807) سال زندہ ریہا۔ اُوندے بئے دِھیاں پوتر وی جمّے۔ تے سیت نؤں سو بارہاں (912) سال دی عُمر ءچ فوت تھیّا۔
انُوس دی عُمر نوّے (90) سال ہئی جِیں ویلے اُوندا پوتر قِینان جمیا۔ اِیندے بعد او بِیا اَٹھ سو پندھراں (815) سال زندہ ریہا۔ اُوندے بئے دِھیاں پوتر وی جمّے۔ تے انُوس نؤں سو پنج (905) سال دی عُمر ءچ فوت تھیّا۔
قِینان دی عُمر ستّر (70) سال ہئی جِیں ویلے اُوندا پوتر مَحَلَل ایل جمیا۔ اِیندے بعد او بِیا اَٹھ سو چالیہہ (840) سال زندہ ریہا۔ اُوندے بئے دِھیاں پوتر وی جمّے۔ تے قِینان نؤں سو ڈاہ (910) سال دی عُمر ءچ فوت تھیّا۔
مَحَلَل ایل دی عُمر پنجئیٹھ (65) سال ہئی جِیں ویلے اُوندا پوتر یارد جمیا۔ اِیندے بعد او بِیا اَٹھ سو ترِیح (830) سال زندہ ریہا۔ اُوندے بئے دِھیاں پوتر وی جمّے۔ تے مَحَلَل ایل اَٹھ سو پِچانوے (895) سال دی عُمر ءچ فوت تھیّا۔
یارد دی عُمر ہِک سو بیئٹھ (162) سال ہئی جِیں ویلے اُوندا پوتر حنُوک جمیا۔ اِیندے بعد او بِیا اَٹھ سو (800) سال زندہ ریہا۔ اُوندے بئے دِھیاں پوتر وی جمّے۔ تے یارد نؤں سو بیئٹھ (962) سال دی عُمر ءچ فوت تھیّا۔
حنُوک دی عُمر پنجئیٹھ (65) سال ہئی جِیں ویلے اُوندا پوتر متوسِلح جمیا۔ اِیندے بعد او بِیا ترے سو (300) سال خُدا دے نال ٹُردا2 ریہا۔ اُوندے بئے دِھیاں پوتر وی جمّے۔ اِیندے بعد او بِیا ترے سو پنجئیٹھ (365) سال زندہ ریہا۔ حنُوک خُدا دے نال چلدا ریہا، وَل او غائب تھی گِیا کیوں جو خُدا اُونکُوں چا گِھدا ہا۔
متوسِلح دی عُمر ہِک سو ستاسی (187) سال ہئی جِیں ویلے اُوندا پوتر لمک جمیا۔ اِیندے بعد او بِیا سَت سو بیاسی (782) سال زندہ ریہا۔ اُوندے بئے دِھیاں پوتر وی جمّے۔ تے متوسِلح نؤں سو اُنہتّر (969) سال دی عُمر ءچ فوت تھیّا۔
لمک دی عُمر ہِک سو بیاسی (182) سال ہئی جِیں ویلے اُوندا ہِک پوتر جمیا۔ اُوں اُوندا ناں نُوح رکھیا تے آکھیا، ”ساڈا واہی بِیجی دا کم بہُوں تکلیف آلا ہے کیوں جو رب العالمین زمین اُتے لعنت کیتی ہے۔ پر ہُنڑ اساں پوتر پارُوں ارام پیسُوں۔“ اِیندے بعد او بِیا پنج سو پِچانوے (595) سال زندہ ریہا۔ اُوندے بئے دِھیاں پوتر وی جمّے۔ تے لمک سَت سو سَتتر (777) سال دی عُمر ءچ فوت تھیّا۔
نُوح دی عُمر پنج سو (500) سال ہئی جِیں ویلے اُوندے پوتر سم، حام تے یافت جمّے۔
Source notes (2)
- Footnote عبرانی ءچ آدم دا مطلب اِنسان ہے۔
- Footnote یعنی او خُدا دی رفاقت ءچ رہ تے اُوندی مرضی پُوری کریندا ہا۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.