پیدائش 29

یعقُوب لابن دے گھر پُجدے

1یعقُوب آپنڑا سفر جاری رکھیا تے ٹُردے ٹُردے مشرقی لوکاں دے مُلک ءچ پُج گِیا۔ 2اُتھاں اُوں کھیت ءچ ہِک کُھوہ ڈِٹھا، جیندے آسُوں پاسُوں بھیڈ بکریاں دے ترے اِجڑ جمع ہَن کیوں جو آجڑی اِجڑاں کُوں اِیں کُھوہ ءچوں پانڑی پِلیندے ہَن۔ پر اُوندے مُنہ اُتے وڈا پتھر پِیا ہا۔ 3جِیں ویلے سارے اِجڑ کٹھے تھیندے ہَن تاں وَل آجڑی پتھر کُوں ریڑھ تے مُنہ تُوں ہٹا ڈیندے ہَن۔ تے بھیڈاں کُوں پانڑی پِلاوݨ تُوں بعد او پتھر کُوں ولا مُنہ اُتے رکھ ڈیندے ہَن۔

4یعقُوب آجڑیاں کُوں آکھیا، ”میڈے بِھراؤ، تُساں کِتھوں دے ہیوے؟“

اُنہاں جواب ڈِتا، ”حاران دے۔“

5اُوں پُچھیا، ”کیا تُساں نحُور دے پوترے لابن کُوں جانڑدے ہیوے؟“

اُنہاں آکھیا، ”ہا، جانڑدے ہیں۔“

6وَل پُچھیا، ”کیا او خیر نال ہے؟“

اُنہاں آکھیا، ”جیا او خیر نال ہے۔ تے او ڈیکھ، اُوندی دِھی راخِل اِجڑ گِھن تے آندی پئی ہے۔“

7یعقُوب آکھیا، ”حالی تاں پیشی دا ویلا ہے۔ ایہ اِجڑاں کُوں کٹھا کرݨ دا ویلا تاں نئیں۔ اُنہاں کُوں پانڑی پِلا تے چراوݨ کیتے گِھن ونجو۔“

8اُنہاں جواب ڈِتا، ”ضروری ہے جو پہلے سارے اِجڑ اِتھاں کٹھے تھیوݨ، وَل ای اِیں پتھر کُوں ریڑھ تے ہِک پاسے ہٹایا ویسی تے اساں اِجڑاں کُوں پانڑی پِلیسوں۔“

9یعقُوب اجنڑ اُنہاں نال گالھیں کریندا ای پِیا ہا جو راخِل آپنڑے پِیُو دا اِجڑ گِھن تے آ پُجی، کیوں جو او اُنہاں کُوں چریندی ہئی۔ 10جِیں ویلے یعقُوب آپنڑے مامے لابن دی دِھی راخِل کُوں اُوندے پِیُو دے اِجڑ نال آندے ڈِٹھا تاں اُوں کُھوہ دے کولھ وَنج تے پتھر کُوں ریڑھ تے مُنہ تُوں ہٹا ڈِتا تے آپنڑے مامے دیاں بھیڈاں بکریاں کُوں پانڑی پِلایا۔ 11وَل اُوں راخِل کُوں چُمیا تے بہُوں رُنّا۔ 12اُوں آکھیا، ”مَیں تیڈے پِیُو دا رشتہ دار یعنی رِبقہ دا پوتر ہاں۔“ ایہ سُنڑ تے راخِل بھج تے آپنڑے پِیُو کُوں خبر ڈِتی۔

13جِیں ویلے لابن سُنڑیا جو میڈا بھنڑینجا یعقُوب آئے تاں او بھج تے اُونکُوں مِلنڑ گِیا تے اُونکُوں ہاں نال لایا تے چُمیا تے آپنڑے گھر گِھن آیا۔ یعقُوب اُونکُوں او سبھ کُجھ ڈسا ڈِتا، جیہڑا کُجھ تھیّا ہا۔ 14لابن آکھیا، ”تُوں سچ مُچ میڈا خون تے گوشت ہیں۔“ یعقُوب پُورا ہِک مہینہ لابن کولھ ٹِکیا رِیہا۔

آپنڑیاں ذالیں کیتے یعقُوب دی محنت مُشقت

15وَل لابن یعقُوب کُوں آکھنڑ لگا، ”بیشک تُوں میڈا رشتے دار ہیں، پر کیا ایہ لازم ہے جو تُوں میڈی خدمت مُفت کریں؟ میکُوں ڈسا جو تیکُوں کیا ڈیواں؟“

16لابن دیاں ڈُو دِھیاں ہَن۔ وڈی دا ناں لیاہ تے چھوٹی دا راخِل۔ 17لیاہ دے اکھیں چُندھیاں ہَن پر راخِل بہُوں حسِین تے سوہنڑی ہئی۔ 18یعقُوب کُوں راخِل نال ڈاڈھی محبت تھی گئی ہئی، اِیں کیتے اُوں آکھیا، ”جے تُساں میکُوں آپنڑی دِھی راخِل ڈے ڈیؤ تاں مَیں تُہاڈے کیتے سَت سال کم کریساں۔“

19لابن آکھیا، ”کہیں غیر بندے نال پرناوݨ تُوں چنگا ہے جو مَیں اُونکُوں تیڈے نال پرنا ڈیواں۔ تُوں میڈے نال رہ۔“

20یعقُوب راخِل نال پرنیجنڑ کیتے سَت سال کم کیتا۔ پر اُونکُوں اِینویں لگیا جِینویں تھوڑے ڈینہہ ای گُزرے ہووݨ، کیوں جو او راخِل کُوں بہُوں پیار کریندا ہا۔ 21اِیندے بعد اُوں لابن کُوں آکھیا، ”میڈی مُدت پُوری تھی گئی ہے۔ ہُنڑ میکُوں میڈی ذال ڈیؤ تاں جو مَیں اُوندے کولھ وَنجاں۔“ 22وَل لابن اُوں جاہ دے سارے لوکاں کُوں سڈ تے اُنہاں دی دعوت کیتی۔ 23پر اُوں رات او راخِل دی جاہ تے لیاہ کُوں یعقُوب دے کولھ گِھن آیا تے یعقُوب لیاہ دے کولھ گِیا۔ 24لابن لیاہ کُوں آپنڑی کنیز زِلفہ ڈے ڈِتی ہئی تاں جو او اُوندی خدمت کرے۔

25جِیں ویلے سویل تھئی تاں یعقُوب ڈِٹھا جو ایہ تاں لیاہ ہے۔ اُوں لابن کُوں وَنج تے آکھیا، ”ایہ تُساں میڈے نال کیا کیتے؟ کیا مَیں راخِل کیتے خدمت نہ کیتی ہئی؟ تُساں میکُوں کیوں دوکھا ڈِتے؟“

26لابن جواب ڈِتا، ”اِتُھوں دا دستور نئیں جو چھوٹی دِھی دی شادی وڈی تُوں پہلے کر ڈِتی ونجے۔ 27تُوں شادی دی رسم دا ہفتہ پُورا کر ڈے وَل اساں تیکُوں راخِل وی ڈے ڈیسوں۔ پر تیکُوں بِیا سَت سال میڈی خدمت کرنڑی پوسی۔“

28یعقُوب مَن گِیا۔ جِیں ویلے ہِک ہفتے دے بعد شادی دیاں رسماں توڑ پُجیاں تاں لابن آپنڑی ڈُوجھی دِھی راخِل وی اُوندے نال پرنا ڈِتی۔ 29لابن راخِل کُوں آپنڑی کنیز بِلہاہ ڈے ڈِتی تاں جو او اُوندی خدمت کرے۔ 30یعقُوب راخِل دے کولھ وی گِیا۔ او لیاہ دی نسبت اُوندے نال زیادہ پیار کریندا ہا۔ وَل اُوں راخِل دے بدلے بِیا سَت سال لابن دی خدمت کیتی۔

یعقُوب دے بال

31جِیں ویلے رب العالمین ڈِٹھا جو لیاہ نال محبت نئیں کیتی ویندی تاں اُوں اُونکُوں اولاد ڈِتی، پر راخِل بے اولاد ریہی۔ 32تے لیاہ حاملہ تھئی تے اُوندے پوتر جمیا تے اُوں اُوندا ناں رُوبِن1 رکھیا کیوں جو اُوں آکھیا، ”رب العالمین میڈی مُصیبت ڈِٹھی ہے۔ ہُنڑ میڈا پایا میڈے نال پیار کریسی۔“

33لیاہ ولا حاملہ تھئی تے اُوندے ہِک بِیا پوتر جمیا۔ اُوں آکھیا، ”رب العالمین سُنڑیا جو میڈا پایا میں تُوں نفرت کریندے، اِیں واسطے اُوں میکُوں ایہ وی ڈِتے۔“ اُوں اُوندا ناں شمعون2 رکھیا۔

34لیاہ ولا حاملہ تھئی تے تریجھا پوتر جمیا۔ تے اُوں آکھیا، ”ہُنڑ میڈا پایا میڈے نال محبت کریسی کیوں جو مَیں اُوندے کیتے ترے پوتر جمّے ہِن۔“ اُوں اُوندا ناں لاوی3 رکھیا۔

35او ہِک پھیری ولا حاملہ تھئی تے چوتھا پوتر جمیا۔ اُوں آکھیا، ”ہُنڑ مَیں رب العالمین دی تمجید کریساں۔“ اُوں اُوندا ناں یہُوداہ4 رکھیا۔ اِیندے بعد اُوندے بئے بال نہ جمّے۔