پیدائش 1

دُنیا دی تخلیق دا پہلا ڈینہہ: روشنی

1ابتدا ءچ خُدا اسمان تے زمین کُوں بنڑایا۔ 2حالی تئیں زمین ویران تے خالی ہئی۔ ڈونگھے پانڑی اُتے اندھارا ای اندھارا ہا تے خُدا دا رُوح پانڑی اُتے ہَلدا ہا۔

3خُدا آکھیا، ”روشنی تھی ونجے،“ تاں روشنی تھی گئی۔ 4خُدا ڈِٹھا جو روشنی چنگی ہے، تے اُوں روشنی کُوں اندھارے تُوں اَنج کر ڈِتا۔ 5خُدا روشنی کُوں ڈینہہ دا ناں ڈِتا تے اندھارے کُوں رات دا۔ شام تھئی تے سویل۔ اِینویں پہلا ڈینہہ لنگھ گِیا۔

ڈُوجھا ڈینہہ: اسمان

6خُدا آکھیا، ”پانڑیاں دے اَدھ ءچ خالی جاہ پیدا تھی ونجے جیندے نال تلواں پانڑی اُتوں دے پانڑی تُوں اَنج تھی ونجے۔“ 7تے اِینویں ای تھیّا۔ خُدا خالی جاہ بنڑا تے تلویں پانڑی کُوں اُتلے پانڑی تُوں اَنج کر ڈِتا۔ 8خُدا خالی جاہ کُوں اسمان دا ناں ڈِتا۔ شام تھئی تے سویل۔ اِینویں ڈُوجھا ڈینہہ لنگھ گِیا۔

تریجھا ڈینہہ: سُکی زمین تے بُوٹے

9خُدا آکھیا، ”جیہڑا پانڑی اسمان دے تلے ہے او ہِک جاہ تے جمع تھی ونجے تاں جو سُکی جاہ نظر آوے،“ تے اِینویں ای تھیّا۔ 10خُدا سُکی جاہ کُوں زمین دا ناں ڈِتا تے جمع تھئے پانڑی کُوں سمندر دا۔ تے خُدا ڈِٹھا جو ایہ چنگا ہے۔ 11وَل خُدا آکھیا، ”زمین ساوِل پیدا کرے، ایجھے بُوٹے جیہڑے بیج رکھیندے ہووݨ تے ایجھے درخت جِنہاں دے پھل آپنڑی آپنڑی قِسم دے بیج رکھیندے ہووݨ،“ تے اِینویں ای تھیّا۔ 12زمین ساوِل پیدا کیتی، ایجھے بُوٹے جیہڑے آپنڑی آپنڑی قِسم دے بیج رکھیندے ہَن تے ایجھے درخت جِنہاں دے پھل آپنڑی آپنڑی قِسم دے بیج رکھیندے ہَن۔ تے خُدا ڈِٹھا جو ایہ چنگا ہے۔ 13شام تھئی تے سویل۔ اِینویں تریجھا ڈینہہ لنگھ گِیا۔

چوتھا ڈینہہ: سِجھ، چَن تے تارے

14خُدا آکھیا، ”اسمان اُتے روشنیاں پیدا تھی ونجنڑ تاں جو ڈینہہ تے رات کُوں اَنج کرݨ تے مختلف موسماں، ڈینہاں تے سالاں دے نشاناں کیتے ہووݨ۔ 15اسمان دیاں ایہ روشنیاں دُنیا کُوں روشن کرݨ۔“ تے اِینویں ای تھیّا۔ 16خُدا ڈُو وڈیاں روشنیاں بنڑائیاں۔ سِجھ جیہڑا وڈا ہا، ڈینہہ اُتے راج کرݨ کیتے تے چَن جیہڑا چھوٹا ہا، رات اُتے۔ اُوں تارے وی بنڑائے۔ 17خُدا اُنہاں کُوں اسمان اُتے رکھیا تاں جو او دُنیا کُوں روشن کرݨ، 18ڈینہہ تے رات اُتے راج کرݨ تے روشنی تے اندھارے ءچ فرق کرݨ۔ خُدا ڈِٹھا جو ایہ چنگا ہے۔ 19شام تھئی تے سویل۔ اِینویں چوتھا ڈینہہ لنگھ گِیا۔

پنجواں ڈینہہ: پانڑی تے ہوا دے جاندار

20خُدا آکھیا، ”پانڑی جانداراں نال بھریج ونجے تے فضا ءچ پکھی اُڈدے پِھرݨ۔“ 21خُدا وڈے وڈے سمندری جانور بنڑائے، پانڑی دیاں ڈُوجھیاں ساریاں مخلوقاں، تے ہر قِسم دے پکھی وی بنڑائے۔ خُدا ڈِٹھا جو ایہ چنگا ہے۔ 22خُدا اُنہاں کُوں برکت ڈِتی تے آکھیا، ”پھلو تے گِنتری ءچ ودھدے ونجو۔ سمندر تُہاڈے نال بھریج ونجے۔ اِینویں ای پکھی وی زمین اُتے گِنتری ءچ ودھ ونجنڑ۔“ 23شام تھئی تے سویل۔ اِینویں پنجواں ڈینہہ لنگھ گِیا۔

چِھینواں ڈینہہ: زمین اُتے ٹُرݨ آلے جانور تے اِنسان

24خُدا آکھیا، ”زمین ہر قِسم دے جاندار پیدا کرے: ڈھورڈنگر، ریڑھن آلے تے قِسم قِسم دے جنگلی جانور۔“ تے اِینویں ای تھیّا۔ 25خُدا ہر قِسم دے ڈھورڈنگر، ہر قِسم دے ریڑھن آلے تے ہر قِسم دے جنگلی جانور بنڑائے۔ اُوں ڈِٹھا جو ایہ چنگا ہے۔

26خُدا آکھیا، ”آؤ ہُنڑ اساں اِنسان کُوں آپنڑی صورت اُتے آپنڑے جِیہا بنڑاؤں۔ او سارے جانوراں اُتے، سمندر دیاں مچھیاں اُتے، ہوا دے پکھیاں اُتے، ڈھورڈنگراں اُتے، جنگلی جانوراں اُتے، تے زمین اُتے ریڑھن آلے سارے جانداراں اُتے راج کرے۔“

27اِینویں خُدا اِنسان کُوں آپنڑی صورت اُتے بنڑایا،

خُدا دی صورت اُتے اُنہاں کُوں بنڑایا۔

اُوں اُنہاں کُوں مرد تے عورت بنڑایا۔

28خُدا اُنہاں کُوں برکت ڈِتی تے آکھیا، ”پھلو تے گِنتری ءچ ودھدے ونجو۔ دُنیا تُہاڈے نال بھریج ونجے تے تُہاڈا اُوندے اُتے اِختیار ہووے۔ سمندر دیاں مچھیاں، ہوا دے پکھی تے زمین اُتے ریڑھن آلے سارے جانداراں اُتے راج کرو۔“

29خُدا اُنہاں کُوں مزید آکھیا، ”میں یکے بِیجاں آلے بُوٹے تے پھلاں آلے درخت تُہاکُوں کھاوݨ کیتے ڈیندا ہاں۔ 30اِینویں ای میں یکے جانوراں، ہوا دے پکھیاں، زمین اُتے ریڑھن آلے جانوراں بلکہ جِیندے ءچ وی جان ہے اُنہاں سبھ دے کھاوݨ کیتے ساوِل ڈیندا ہاں۔“ تے اِینویں ای تھیّا۔ 31خُدا سبھ کُجھ اُتے جیہڑا اُوں بنڑایا ہا، دِید بھنوائی تاں ڈِٹھا جو ایہ بہُوں چنگا ہے۔ شام تھئی تے سویل۔ اِینویں چِھینواں ڈینہہ لنگھ گِیا۔