پیدائش 47

1یُوسف فرعون دے کولھ گِیا تے اُونکُوں خبر ڈِتی جو ”میڈا پِیُو تے میڈے بِھرا آپنڑے بھیڈ بکریاں، ڈاند گائیں تے سارے مال سمیت کنعان مُلک تُوں جشن ءچ آ گئے ہِن۔“ 2اُوں آپنڑے بِھرانواں ءچوں پنج کُوں چُنڑ تے فرعون دے سامنڑے پیش کیتا۔ 3فرعون بِھرانواں تُوں پُچھیا، ”تُساں کیا کم کریندے ہیوے؟“

اُنہاں جواب ڈِتا، ”تُہاڈے خادم آپنڑے پِیُو ڈاڈے آلی کار آجڑی ہِن۔ 4اساں کُجھ دیر کیتے مُلک ءچ راہوݨ آئے ہیں کیوں جو کال کنعان ءچ سخت تھی گیا ہے، تے اُتھاں تُہاڈے خادماں دے ڈھورڈنگراں کُوں چراوݨ دے جاہیں مُک گئیاں ہِن۔ اِیں کیتے مہربانی کر تے ساکُوں جشن ءچ راہوݨ دی اِجازت ڈیؤ۔“

5بادشاہ یُوسف کُوں آکھیا، ”تیڈا پِیُو تے تیڈے بِھرا تیڈے کولھ آ گئے ہِن۔ 6سارا مِصر مُلک تیڈے سامنڑے ہے۔ اِنہاں کُوں بہترین جاہ تے آباد کر۔ او جشن ءچ راہوݨ تے جے اُنہاں ءچوں کُجھ خاص قابل ہِن تاں اُنہاں کُوں میڈے ڈنگراں دی نِگرانی کیتے رکھ گِھن۔“

7وَل یُوسف آپنڑے پِیُو یعقُوب کُوں گِھن آیا تے فرعون دے سامنڑے پیش کیتا۔ یعقُوب بادشاہ کُوں برکت دی دُعا ڈِتی۔ 8بادشاہ اُوں تُوں پُچھیا، ”تیڈی عُمر کتنی ہے؟“

9یعقُوب جواب ڈِتا، ”مَیں ہِک سو ترِیح سال تُوں اِیں دُنیا دا مسافر ہاں۔ میڈی حیاتی نِکی تے تکلیف دہ ہئی تے میڈے پِیُو ڈاڈے دی مسافرت دے مُقابلے ءچ کُجھ وی نئیں۔“ 10ایہ آکھ تے یعقُوب فرعون کُوں ولا برکت دی دُعا ڈے تے لگا گِیا۔

11وَل یُوسف آپنڑے پِیُو تے بِھرانواں کُوں مِصر ءچ آباد کیتا۔ اُوں بادشاہ دے حُکم دے مطابق اُنہاں کُوں رعمسِیس دے علاقے ءچ بہترین زمین ڈِتی۔ 12یُوسف آپنڑے پِیُو تے آپنڑے بِھرانواں تے آپنڑے پِیُو دے سبھ بندیاں کُوں ہر ہِک دے بالاں دی گِنتری دے مطابق خوراک ڈیندا ریہا۔

کال دا اثر

13کال ایڈا سخت ہا جو کِتھائیں وی روٹی نہ لبھدی ہئی۔ مِصر تے کنعان ءچ لوک بے حال تھی گئے۔

14مِصر تے کنعان دے سارے پیسے اناج مُل گِھننڑ ءچ لگ گئے۔ یُوسف سارا پیسہ کٹھا کیتا تے فرعون دے محل ءچ گِھن آیا۔ 15جِیں ویلے مِصر تے کنعان دے پیسے مُک گئے تاں مِصریاں یُوسف دے کولھ آ تے آکھیا، ”ساکُوں روٹی ڈیؤ کیوں جو ساڈے پیسے مُک گئے ہِن۔ اساں تُہاڈے اکھیں دے سامنڑے کیوں مرُوں؟“

16یُوسف جواب ڈِتا، ”جے تُہاڈے پیسے مُک گئے ہِن تاں میکُوں آپنڑے ڈھورڈنگر ڈیؤ۔ مَیں اُنہاں دے بدلے ءچ تُہاکُوں اناج ڈیساں۔“ 17اِیں واسطے او آپنڑے گھوڑے، کھوتے، بھیڈ بکریاں تے گائیں یُوسف کولھ گِھن آئے۔ اُنہاں دے بدلے یُوسف اُنہاں کُوں اناج ڈِتا تے پُورے سال اُوں اُنہاں دے ڈنگراں دے بدلے اُنہاں کُوں اناج ڈِتا۔

18اگلے سال او ولا اُوندے کولھ آئے۔ اُنہاں آکھیا، ”مالک! اساں تُہاڈے تُوں ایہ گالھ لُکا نئیں سگدے جو ہُنڑ ساڈے کولھ کُجھ نئیں ریہا کیوں جو ساڈے پیسے مُک گئے ہِن تے ساڈے ڈنگر وی ساڈے مالک دے تھی گئے ہِن۔ ہُنڑ ساڈے مالک دے سامنڑے ساڈے جِسم تے ساڈی زمین دے سِوا کُجھ باقی نئیں۔ 19اساں کیوں تُہاڈے اکھیں دے سامنڑے مر ونجُوں؟ تے ساڈی زمین کیوں تباہ تھی ونجے؟ اناج دے بدلے ءچ ساکُوں تے ساڈی زمین کُوں مُل گِھن گِھنو تے اساں آپنڑی زمین سمیت فرعون دے غُلام بنڑ ویسُوں۔ بس ساکُوں رہاونڑ کیتے بیج ڈیؤ تاں جو اساں زندہ راہوں تے زمین وی تباہ نہ تھیوے۔“

20اِینویں یُوسف فرعون کیتے مِصر دی پُوری زمین مُل گِھن گِھدی۔ کال دی سختی پارُوں سارے مِصریاں آپنڑے کھیت ویچ ڈِتے۔ اِیں طریقے نال پُورا مُلک فرعون دا تھی گِیا۔ 21یُوسف یکے لوکاں کُوں مِصر دے ہِک سرے تُوں بئے سرے تئیں غُلام بنڑا ڈِتا۔ 22پر مذہبی راہنماواں دی زمین اُوں مُل نہ گِھدی۔ کیوں جو اُنہاں کُوں فرعون تُوں راشن مِلدا ہا، اِیں واسطے اُنہاں کُوں آپنڑی زمین ویچنڑ دی لوڑ نہ ہئی۔

23یُوسف لوکاں کُوں آکھیا، ”ڈیکھو اَج مَیں تُہاکُوں تے تُہاڈی زمین کُوں فرعون کیتے مُل گِھن گِھدے۔ ہُنڑ ایہ بیج گِھن تے آپنڑے کھیتاں ءچ رہاؤ۔ 24تُہاکُوں فصل دا پنجواں حصہ فرعون کُوں ڈیونڑا پوسی۔ باقی چار حصے تُہاڈے ہوسن۔ تُساں اِیندے تُوں بیج رَہا سگدے ہیوے تے باقی تُہاڈے تے تُہاڈے بال بچیاں دے کھاوݨ کیتے ہوسی۔“

25اُنہاں جواب ڈِتا، ”تُساں ساکُوں بچائے۔ ساڈے مالک دی نظرِکرم ساڈے اُتے راہوے تے اساں فرعون دے غُلام بنڑے راہسوں۔“

26اِیں طرحاں یُوسف مِصر ءچ ایہ قانُون بنڑایا جو ہر فصل دا پنجواں حصہ بادشاہ دا ہوسی۔ ایہ قانُون مِصر ءچ اَج تئیں ہے۔ صرف مذہبی راہنماواں دی زمین بادشاہ دی ملکیت نہ بنڑی۔

یعقُوب دی وصیّت

27بنی اِسرائیل مِصر ءچ جشن دے علاقے ءچ آباد تھئے۔ اُتھاں اُنہاں کُوں زمین مِلی تے او ودھدے ریہے تے تعداد ءچ بہُوں زیادہ تھی گئے۔

28یعقُوب ستارہاں سال مِصر ءچ ریہا تے ہِک سو سنتالیہہ (147) سال دی عُمر ءچ فوت تھیّا۔ 29جِیں ویلے مرݨ دا ویلا نیڑے آیا تاں اُوں آپنڑے پوتر یُوسف کُوں سڈ تے آکھیا، ”مہربانی کر تے آپنڑا ہتھ میڈی ستھل تلے رکھ، تے قَسم کھا جو تُوں میڈے نال شفقت تے وفاداری دا اِیں طرحاں اِظہار کریسیں جو میکُوں مِصر ءچ دفن نہ کریسیں۔ 30جِیں ویلے مَیں مر تے آپنڑے پِیُو ڈاڈے نال وَنج مِلساں تاں میکُوں مِصر ءچوں گِھن وَنج تے میڈے پِیُو ڈاڈے دے قبرستان ءچ دفن کریں۔“

یُوسف جواب ڈِتا، ”مَیں تُہاڈے آکھنڑ دے مطابق کریساں۔“

31یعقُوب آکھیا، ”قَسم کھا جو تُوں اِینویں ای کریسیں۔“

یُوسف قَسم کھادی۔ وَل اِسرائیل آپنڑے بسترے دے سراہنڑے آلے پاسے خُدا کُوں سجدہ کیتا۔