پیدائش 46

یعقُوب مِصر ویندے

1اِسرائیل آپنڑا سبھ کُجھ گِھن تے ٹُر پِیا تے بیرسبع وَنج پُجیا۔ اُتھاں اُوں آپنڑے پِیُو اِضحاق دے خُدا کیتے قُربانیاں پیش کیتیاں۔ 2رات کُوں خُدا رویا ءچ اِسرائیل نال گالھیں کیتیاں۔ اُوں آکھیا، ”یعقُوب، یعقُوب!“

یعقُوب جواب ڈِتا، ”جی مَیں حاضر ہاں۔“

3خُدا آکھیا، ”مَیں خُدا ہاں، تیڈے پِیُو اِضحاق دا خُدا۔ مِصر ونجنڑ تُوں نہ ڈر کیوں جو مَیں اُتھاں تیڈے ءچوں ہِک وڈی قوم بنڑیساں۔ 4مَیں تیڈے نال مِصر ویساں تے تیکُوں اِیں مُلک ءچ واپس وی گِھن آساں۔ جِیں ویلے تُوں مرسیں تاں یُوسف خود تیڈے اکھیں بند کریسی۔“

5وَل یعقُوب بیرسبع تُوں روانہ تھیّا۔ اُوندے پوتراں آپنڑے پِیُو تے آپنڑے بال بچیاں کُوں اُنہاں ریڑھیاں ءچ بِلھایا جیہڑے مِصر دے بادشاہ بھیجے ہَن۔ 6اِینویں یعقُوب تے اُوندی ساری اولاد آپنڑے ڈھورڈنگراں تے کنعان ءچوں کمتّا ہویا سارا مال گِھن تے مِصر لگے گئے۔ 7یعقُوب آپنڑے دِھیاں پوتر، پوترے، پوترِیاں یعنی ساری اولاد، نال گِھن گیا۔

8مِصر ونجنڑ آلے بنی اِسرائیل یعنی یعقُوب تے اُوندی اولاد دے ناں ایہ ہِن:

یعقُوب دا پلوٹھا رُوبِن۔ 9تے رُوبِن دے پوتر حنُوک، فلُّو، حصرون تے کرمی ہَن۔

10شمعون دے پوتر یموایل، یمِین، اُہد، یکِین، صُحر تے ساؤل ہَن۔ ساؤل کنعانی عورت دا پوتر ہا۔

11لاوی دے پوتر جیرسون، قہات تے مراری ہَن۔

12یہُوداہ دے پوتر عیر، اونان، سیلہ، فارص تے زارح ہَن۔ عیر تے اونان کنعان ءچ مر گئے ہَن۔ فارص دے ڈُو پوتر حصرون تے حمُول ہَن۔

13اِشکار دے پوتر تولع، فُووہ، یوب تے سِمرون ہَن۔

14زبُولُون دے پوتر سرد، ایلون تے یَحلی ایل ہَن۔

15ایہ سبھ یعقُوب دے اُنہاں پوتراں دی اولاد ہِن جیہڑے فدّان ارام ءچ لیاہ تُوں پیدا تھئے تے یعقُوب دی دِھی دِینہ وی اِنہاں ءچ شامل ہے۔ ایہ کُل تیتریح لوک ہَن۔

16جد دے پوتر صفِیان، حَجّی، سُونی، اصبُون، عیری، ارودی تے اریلی ہَن۔

17آشر دے پوتر یِمنہ، اِسواہ، اِسوی تے برِیعاہ ہَن۔ اُنہاں دی بھینڑ سِرہ ہئی۔ برِیعاہ دے ڈُو پوتر حِبر تے مَلکی ایل ہَن۔

18ایہ سبھ یعقُوب دے اُنہاں پوتراں دی اولاد ہِن جیہڑے زِلفہ تُوں پیدا تھئے جِینکُوں لابن آپنڑی دِھی لیاہ کُوں ڈِتا ہا۔ ایہ کُل سولہاں لوک ہَن۔

19یعقُوب دی ذال راخِل دے پوتر یُوسف تے بِنیمِین ہَن۔

20یُوسف دے ڈُو پوتر منسّی تے اِفرائِیم مِصر ءچ جمّے۔ اُنہاں دی ماء اون شہر دے مذہبی راہنما فوطِفیرع دی دِھی آسِناتھ ہئی۔

21بِنیمِین دے پوتر بالع، بکر، اَشبیل، جِیرا، نعمان، اخی، روس، مُفیم، حُفیم تے اَرد ہَن۔ 22ایہ سبھ یعقُوب دے اُنہاں پوتراں دی اولاد ہِن جیہڑے راخِل تُوں پیدا تھئے۔ ایہ کُل چوڈھاں لوک ہَن۔

23دان دا پوتر حُشِیم ہا۔

24نفتالی دے پوتر یحصی ایل، جُونی، یصر تے سِلیم ہَن۔

25ایہ سبھ یعقُوب دے اُنہاں پوتراں دی اولاد ہِن جیہڑے بِلہاہ تُوں پیدا تھئے جِینکُوں لابن آپنڑی دِھی راخِل کُوں ڈِتا ہا۔ ایہ کُل سَت لوک ہَن۔

26یعقُوب دی اولاد دے کُل چِھیئیٹھ (66) بندے اُوندے نال مِصر چلے گئے۔ اِیں گِنتری ءچ اُوندے پوتراں دیاں ذالاں شامل نئیں۔ 27[یعقُوب، یُوسف تے] یُوسف دے ڈُو پوتر جیہڑے مِصر ءچ پیدا تھئے، اُنہاں ءچ شامل ہووݨ تاں یعقُوب دے خاندان دے کُل ستّر لوک مِصر گئے۔

یعقُوب تے اُوندا خاندان مِصر ءچ

28یعقُوب یہُوداہ کُوں آپنڑے اگُوں یُوسف دے کولھ بھیجیا تاں جو او جشن ءچ اُونکُوں مِلے۔ جِیں ویلے او اُتھاں پُجے 29تاں یُوسف آپنڑی بگھی اُتے بہہ تے آپنڑے پِیُو کُوں مِلنڑ کیتے جشن گِیا۔ اُونکُوں ڈیکھ تے او آپنڑے پِیُو دے گَل لگ تے دیر تئیں روندا ریہا۔ 30یعقُوب یُوسف کُوں آکھیا، ”ہُنڑ میکُوں مرݨ دا ڈُکھ نئیں کیوں جو مَیں تیکُوں ڈیکھ گِھدے جو تُوں زندہ ہیں۔“

31وَل یُوسف آپنڑے بِھرانواں تے آپنڑے پِیُو دے خاندان دے باقی لوکاں کُوں آکھیا، ”مَیں وَنج تے بادشاہ کُوں خبر ڈیواں جو کنعان ءچ راہوݨ آلے میڈے بِھرا تے میڈے پِیُو دا پُورا خاندان میڈے کولھ آ گئے۔ 32مَیں اُونکُوں اکھیساں جو ایہ بندے آجڑی ہِن۔ او ڈھورڈنگر پلیندے ہِن تے آپنڑیاں بھیڈ بکریاں، ڈاند گائیں تے باقی سارا مال آپنڑے نال گِھن آئے ہِن۔ 33جڈاں بادشاہ تُہاکُوں سڈ تے پُچھے جو تُساں کیا کم کریندے ہیوے 34تاں تُساں جواب ءچ اکھائے جو ’تُہاڈے خادم نِکے لا تُوں ہُنڑ تئیں آپنڑے پِیُو ڈاڈے وانگُوں ڈھورڈنگر پلیندے آئے ہِن۔‘ وَل تُساں جشن ءچ رہ سگسو کیوں جو مِصری آجڑیاں تُوں نفرت کریندے ہِن۔“