پیدائش 35

بیت ایل ءچ خُدا یعقُوب کُوں برکت ڈیندے

1وَل خُدا یعقُوب کُوں آکھیا، ”اُٹھی! بیت ایل کُوں وَنج تے اُتھائیں رہ۔ اُتھاں میڈے کیتے جیہڑا تیڈے اُتے اُوں ویلے ظاہر تھیّا ہم جِیں ویلے تُوں آپنڑے بِھرا عیسو تُوں بھجدا پِیا ہَویں، قُربان گاہ بنڑا۔“ 2اِیں واسطے یعقُوب آپنڑے گھر آلیاں تے باقی سبھ ساتھیاں کُوں آکھیا، ”جیہڑے وی بُت تُہاڈے کولھ ہِن اُنہاں کُوں سَٹ ڈیؤ۔ آپنڑے آپ کُوں پاک صاف کر تے کپڑے بدل گِھنو۔ 3تے آؤ اساں اِیں جاہ کُوں چھوڑ تے بیت ایل جُلوں۔ اُتھاں مَیں خُدا کیتے قُربان گاہ بنڑیساں جئیں مُصیبت ءچ میڈی دُعا سُنڑی۔ مَیں جِتھاں وی گِیا او میڈے نال ریہا۔“

4ایہ سُنڑ تے اُنہاں یعقُوب کُوں سارے بُت ڈے ڈِتے جیہڑے اُنہاں دے کولھ ہَن، تے او ساریاں والیاں1 وی جیہڑیاں اُنہاں کَناں ءچ پا تیاں ہوئیاں ہَن۔ تے یعقُوب ایہ سبھ کُجھ سِکم دے کولھ بلُوط دے درخت دے تلے زمین ءچ پُور ڈِتا۔ 5وَل او ٹُر پئے تے آسُوں پاسُوں دے شہراں اُتے خُدا دی طرفوں ایجھا خوف چھا گِیا، جو اُنہاں یعقُوب تے اُوندے پوتراں دا پِچھا نہ کیتا۔

6ٹُردے ٹُردے یعقُوب آپنڑے لوکاں سمیت کنعان دے شہر لُوز پُج گِیا جِینکُوں بیت ایل وی آکھیا ویندے۔ 7یعقُوب اُتھاں قُربان گاہ بنڑا تے اُوں جاہ دا ناں بیت ایل دا خُدا رکھیا، کیوں جو خُدا اُوں جاہ تے آپنڑے آپ کُوں اُوں ویلے ظاہر کیتا ہا جِیں ویلے او آپنڑے بِھرا کولُھوں بھجدا ویندا ہا۔

8اُتھاں رِبقہ دی آیا دبورہ مر گئی۔ او بیت ایل دی اُترائی ءچ بلُوط دے درخت تلے دفن تھئی۔ اِیں کیتے اُوں درخت دا ناں الون بکُوت یعنی ماتم دا درخت رکھیا گِیا۔

9یعقُوب دے فدّان ارام تُوں واپس آوݨ تُوں بعد خُدا ڈُوجھی پھیری اُوندے اُتے ظاہر تھیّا تے اُونکُوں برکت ڈِتی۔ 10خُدا اُونکُوں آکھیا، ”ہُنڑ تُوں تیڈا ناں یعقُوب نئیں بلکہ اِسرائیل ہوسی۔“ اِینویں اُوں اُوندا نواں ناں اِسرائیل رکھیا۔ 11خُدا اُونکُوں ایہ وی آکھیا، ”مَیں قُدرت آلا خُدا ہاں۔ پھل پُھل تے گِنتری ءچ ودھدا رہ۔ تیڈے ءچوں ہِک نئیں بلکہ قوماں دے ڈھگ نِکلسن۔ تیڈی اولاد ءچوں بادشاہ وی ہوسن۔ 12مَیں تیکُوں او مُلک ڈیساں جیہڑا ابرہام تے اِضحاق کُوں ڈِتے تے تیڈے بعد ایہ مُلک تیڈی اولاد کُوں ڈیساں۔“

13وَل خُدا جیہڑی جاہ اُوندے نال ہم کلام تھیّا ہا، اُتھوں اسمان اُتے چلیا گِیا۔ 14اِیندے بعد یعقُوب اُوں جاہ تے جِتھاں خُدا اُوندے نال ہم کلام تھیّا ہا، پتھر دا تھمبا کھڑا کیتا تے اُوندے اُتے وِیٹے ونجنڑ آلی نذر تے زیتون دا تیل وِیٹ تے اُونکُوں مخصوص کیتا۔ 15تے یعقُوب اُوں جاہ دا ناں جِتھاں خُدا اُوندے نال کلام کیتا ہا، بیت ایل رکھیا۔

راخِل دی موت

16وَل یعقُوب آپنڑے گھر آلیاں نال بیت ایل تُوں روانہ تھی تے اِفراتہ دو ٹُر پِیا۔ رستے ءچ راخِل دے بال جمنڑ دا ویلا آ گِیا تے اُونکُوں بہُوں تکلیف تھئی۔ 17جِیں ویلے درد بہُوں ودھ گِیا تاں دائی اُونکُوں آکھیا، ”نہ ڈر کیوں جو تیڈے کیتے ہِک بِیا پوتر ہے۔“ 18پر او مرݨ آلی ہئی تے مردے مردے اُوں اُوندا ناں بِنؤنی2 رکھیا۔ پر اُوندے پِیُو اُوندا ناں بِنیمِین3 رکھیا۔ 19راخِل مر گئی تے او اِفراتہ دے رستے ءچ دفن تھئی۔ اِفراتہ کُوں بیت لحم وی آکھیا ویندے۔ 20یعقُوب اُوندی قبر اُتے پتھر دا تھمبا کھڑا کیتا، جیہڑا اَج تئیں راخِل دی قبر دی نشاندہی کریندے۔

21اُوں جاہ تُوں یعقُوب آپنڑا سفر جاری رکھیا تے عدر دے بُرج دے پرلے پاسے آپنڑا ڈیرہ لایا۔ 22جِیں ویلے او اُتھاں راہندے ہَن تاں رُوبِن آپنڑے پِیُو دی حرم بِلہاہ نال ہم بستر تھی گِیا تے یعقُوب کُوں پتہ لگ گِیا۔

یعقُوب دے پوتر

یعقُوب دے بارہاں پوتر ہَن۔

23لیاہ دے پوتر ایہ ہَن: یعقُوب دا سبھ تُوں وڈا پوتر رُوبِن، وَل شمعون، لاوی، یہُوداہ، اِشکار تے زبُولُون۔

24راخِل دے پوتر یُوسف تے بِنیمِین ہَن۔

25راخِل دی کنیز بِلہاہ دے پوتر دان تے نفتالی ہَن۔

26لیاہ دی کنیز زِلفہ دے پوتر جد تے آشر ہَن۔

ایہ سبھ یعقُوب دے پوتر ہِن جیہڑے فدّان ارام ءچ جمّے۔

اِضحاق دی موت

27وَل یعقُوب آپنڑے پِیُو اِضحاق دے کولھ مَمرے ءچ آیا جیہڑا قریت اربع یعنی حبرون دے نیڑے ہے جِتھاں ابرہام تے اِضحاق ڈیرہ لایا ہا۔ 28اِضحاق ہِک سو اسّی سال دا ہا۔ 29وَل اِضحاق دم چھوڑ ڈِتا تے مر گِیا، تے پُوری عُمر کر تے آپنڑے پِیُو ڈاڈے نال وَنج مِلیا۔ اُوندے پوتراں عیسو تے یعقُوب اُونکُوں دفن کیتا۔