پیدائش 36

عیسو دی اولاد

1عیسو یعنی ادُوم دا شجرہ ایہ ہے:

2عیسو ترے کنعانی عورتاں نال پرنیجیا۔ ایلون حِتّی دی دِھی عدّہ نال، صبعون حِوّی دی ڈوہتری تے عنہ دی دِھی اُہلیبامہ نال، 3تے اِسمٰعیل دی دِھی بشامہ نال جیہڑی نبایوت دی بھینڑ ہئی۔

4عدّہ دا ہِک پوتر الِیفز تے بشامہ دا ہِک پوتر رعُوایل جمیا۔ 5اُہلیبامہ دے ترے پوتر جمّے، یعُوس، یعلام تے قورح۔ عیسو دے ایہ سارے پوتر مُلک کنعان ءچ جمّے۔

6تے عیسو آپنڑیاں ذالاں، دِھیاں، پوتراں، آپنڑے گھر دے سبھ نوکر چاکراں، سارے ڈنگراں تے آپنڑے سارے مال کُوں جیہڑا اُوں مُلک کنعان ءچ کمتّا ہا، نال گِھدا تے آپنڑے بِھرا یعقُوب دے کولُھوں ہِک بئے مُلک کُوں چلیا گِیا۔ 7کیوں جو اُنہاں دا مال بہُوں زیادہ تھی گِیا ہا، اِیں پارُوں او کٹھے نہ رہ سگدے ہَن۔ اُنہاں دے کولھ اِتنے اِجڑ ہَن جو چراوݨ دی جاہ گھٹ تھی گئی ہئی۔ 8اِیں واسطے عیسو جِیندا ڈُوجھا ناں ادُوم ہے، پہاڑی علاقے شعِیر ءچ راہوݨ لگا۔

9ایہ عیسو دا شجرہ ہے جیہڑا شعِیر دے پہاڑی علاقے دے ادُومیاں دا پِیُو ہا:

10عیسو دی ذال عدّہ دا ہِک پوتر الِیفز ہا تے اُوندی ذال بشامہ دا ہِک پوتر رعُوایل ہا۔

11الِیفز دے پوتر تیمان، اومر، صفو، جعتام، قنز 12تے عمالیق ہَن۔ عمالیق الِیفز دی حرم تِمنع دا پوتر ہا۔ ایہ سارے عیسو دی ذال عدّہ دی اولاد ہَن۔

13رعُوایل دے پوتر نحت، زارح، سمّہ تے مِزّہ ہَن۔ ایہ سارے عیسو دی ذال بشامہ دی اولاد ہَن۔

14عیسو دی ذال اُہلیبامہ جیہڑی عنہ دی دِھی تے صبعون دی ڈوہتری ہئی، اِیندے ترے پوتر یعُوس، یعلام تے قورح ہَن۔

15عیسو دی اولاد ءچوں جیہڑے اَنج اَنج قبیلیاں دے سردار نِکلے، او ایہ ہَن:

اُوندے پلیٹھی دے بال الِیفز تُوں ایہ قبائلی سردار نِکلے: تیمان، اومر، صفو، قنز، 16قورح، جعتام تے عمالیق۔ ایہ سارے ادُوم ءچ عیسو دی ذال عدّہ دی اولاد ہِن۔

17عیسو دے پوتر رعُوایل ءچوں ایہ قبائلی سردار نِکلے: نحت، زارح، سمّہ تے مِزّہ۔ ایہ سارے ادُوم ءچ عیسو دی ذال بشامہ دی اولاد ہَن۔ 18عیسو دی ذال اُہلیبامہ یعنی عنہ دی دِھی ءچوں ایہ قبائلی سردار نِکلے: یعُوس، یعلام تے قورح۔

19ایہ سارے سردار عیسو یعنی ادُوم دی اولاد تے قبائلی سردار ہَن۔

شعِیر دی اولاد

20شعِیر حوری دے پوتر جیہڑے اُوں مُلک ءچ راہندے ہَن ایہ ہَن: لوطان، سوبل، صبعون، عنہ، 21دِیسون، ایصر تے دِیسان۔ شعِیر دے ایہ پوتر ادُوم مُلکِ ءچ حوری قبیلے دے سردار ہَن۔

22لوطان دے پوتر حوری تے ہِیمام ہَن تے تِمنع لوطان دی بھینڑ ہئی۔

23سوبل دے پوتر علوان، مانحت، عیبال، سفو تے اونام ہَن۔

24صبعون دے پوتر آیّاہ تے عنہ ہَن۔ ایہ اُوہو عنہ ہے جِینکُوں بیابان ءچ آپنڑے پِیُو دے کھوتے چریندے ہوئے گرم چشمے لبھے۔

25عنہ دا ہِک پوتر دِیسون تے ہِک دِھی اُہلیبامہ ہئی۔

26دِیسون دے پوتر، حمدان، اِشبان، یتران تے کِران ہَن۔

27ایصر دے پوتر بِلہان، زعوان تے عقان ہَن۔

28دِیسان دے پوتر عُوض تے اِران ہَن۔

29جیہڑے حوریاں دے سردار تھئے، او ایہ ہَن : لوطان، سوبل، صبعون، عنہ، 30دِیسون، ایصر تے دِیسان۔ ایہ اُنہاں حوریاں دے قبائلی سردار ہِن جیہڑے شعِیر مُلک ءچ ہَن۔

ادُوم دے بادشاہ

31بنی اِسرائیل اُتے حکُومت کرݨ آلے بادشاہاں تُوں پہلے ایہ بادشاہ ہِک بئے دے بعد ادُوم مُلک اُتے حکُومت کریندے ہَن:

32بالع بِن بعور جیہڑا دِنہابا شہر دا ہا، مُلک ادُوم دا بادشاہ ہا۔

33بالع دے مرݨ تُوں بعد یُوباب بِن زارح جیہڑا بُصراہ شہر دا ہا، اُوندی جاہ تے بادشاہ بنڑیا۔

34یُوباب دے مرݨ تُوں بعد حُشام جیہڑا تیمانیاں دے مُلک دا ہا، اُوندی جاہ تے بادشاہ بنڑیا۔

35حُشام دے مرݨ تُوں بعد ہدد بِن بِدد، جیہڑا عوِیت شہر دا ہا، اُوندی جاہ تے بادشاہ بنڑیا۔ ہدد موآب مُلک ءچ مِدیانیاں کُوں ہرایا ہا۔

36ہدد دے مرݨ تُوں بعد شملہ جیہڑا مسرِقہ شہر دا ہا، اُوندی جاہ تے بادشاہ بنڑیا۔

37شملہ دے مرݨ تُوں بعد ساؤل جیہڑا فرات دریا دے کولھ رحوبوت شہر دا ہا، اُوندی جاہ تے بادشاہ بنڑیا۔

38ساؤل دے مرݨ تُوں بعد بعلحنان بِن عکبُور اُوندی جاہ تے بادشاہ بنڑیا۔

39بعلحنان دے مرݨ تُوں بعد حدر اُوندی جاہ تے بادشاہ بنڑیا۔ او پاعُو شہر دا ہا تے اُوندی ذال دا ناں مہیطب ایل ہا، جیہڑی مَطرِد دی دِھی تے میزاہاب دی ڈوہتری ہئی۔

40عیسو دے سرداراں دے ناں اُنہاں دے خانداناں تے وراثتی زمین دیاں آبادیاں دے مطابق ایہ ہَن :تِمنع، علوہ، یتیت، 41اُہلیبامہ، ایلہ، فِینون، 42قنز، تیمان، مِبصار، 43مَجدایل تے عِرام۔ ادُوم دے سرداراں دے ناں اِیہو ہَن جیہڑے اُوں مقام دے مطابق ہَن جِتھاں او راہندے ہَن۔ ایہ ادُومیاں دے پِیُو عیسو دا شجرہ ہا۔