پیدائش 34

دِینہ نال زیادتی

1ہِک ڈینہہ یعقُوب تے لیاہ دی دِھی دِینہ کنعانی عورتاں کُوں مِلنڑ کیتے باہر نِکلی۔ 2اُوں علاقے دا سردار حمُور، حِوّی قوم دا ہا۔ جِیں ویلے اُوندے پوتر سِکم دِینہ کُوں ڈِٹھا تاں اُوں اُونکُوں پکڑ تے اُوندی عزت لُٹ گِھدی۔ 3پر اُوندا دل دِینہ نال لگ گِیا تے اُوں اُوندے نال پیار دے گالھیں کیتیاں۔ 4اُوں آپنڑے پِیُو حمُور کُوں آکھیا، ”میکُوں اِیں چھوہیر نال پرنا ڈیؤ۔“

5جِیں ویلے یعقُوب آپنڑی دِھی دی عزت لُٹے ونجنڑ دی خبر سُنڑی تاں اُوندے پوتر ڈھورڈنگراں نال چراگاہیں ءچ ہَن۔ اِیں کیتے او اُنہاں دے واپس آوݨ تئیں چُپ ریہا۔

6سِکم دا پِیُو حمُور شہر تُوں نِکل تے یعقُوب نال گالھ کرݨ کیتے آیا۔ 7یعقُوب دے پوتر آپنڑی بھینڑ دی خبر سُنڑ تے چراگاہیں ءچوں سِدھے واپس آئے۔ او ڈُکھ تے کاوڑ نال بھریج گئے جو سِکم یعقُوب دی دِھی نال زیادتی کر تے اِسرائیل دی بے عزتی کیتی ہے تے ایجھا کم کیتے جیہڑا ہرگز نہ ہوونڑا چاہیدا ہا۔ 8حمُور اُنہاں کُوں آکھیا، ”میڈے پوتر سِکم دا دل تُہاڈی دِھی اُتے آ گئے۔ مہربانی کر تے اُونکُوں میڈے پوتر نال پرنا ڈیؤ۔ 9ساڈے نال رشتہ بدھو، آپنڑیاں دِھیاں ساکُوں ڈیؤ تے ساڈیاں دِھیاں تُساں گِھنو۔ 10وَل تُساں ساڈے نال اِیں مُلک ءچ رہ سگسو تے پُورا مُلک تُہاڈے کیتے کُھلا ہوسی۔ تُساں جِتھاں چاہسو آباد تھی سگسو، تجارت کر سگسو تے زمین مُل گِھن سگسو۔“

11تے سِکم وی دِینہ دے پِیُو تے بِھرانواں کُوں آکھیا، ”میڈے اُتے بس تُہاڈے کرم دی نظر تھی ونجے، وَل جیہڑا کُجھ تُساں اکھیسو مَیں ادا کریساں۔ 12جِتنا وی حق مہر تے تحفے مقرر کریسو مَیں ڈے ڈیساں پر چھوہیر کُوں میڈے نال پرنا ڈیؤ۔“

13پر یعقُوب دے پوتراں دِینہ نال زیادتی ہووݨ دے سببّوں، سِکم تے اُوندے پِیُو حمُور نال چالاکی کر تے 14آکھیا، ”اساں اِینویں نئیں کر سگدے۔ اساں آپنڑی بھینڑ دا پرنیوا ایجھے کہیں بندے نال نئیں کر سگدے جِیندا ختنہ نہ تھیّا ہووے۔ ایہ ساڈے کیتے شرم دی گالھ ہوسی۔ 15اساں صرف اِیں شرط تے راضی تھیسوں جو تُساں آپنڑے سارے چھوہراں تے مرداں دا ختنہ کروا تے ساڈے آلی کار تھی ونجو۔ 16وَل تُہاڈیاں دِھیاں پوتراں دے پرنیوے ساڈے نال تھی سگسن تے اساں تُہاڈے نال راہسوں تے ہِک قوم بنڑ ویسوں۔ 17پر جے تُساں ختنے کیتے تیار نئیں تاں اساں آپنڑی بھینڑ کُوں گِھن تے لگے ویسوں۔“

18ایہ گالھیں حمُور تے اُوندے پوتر کُوں چنگیاں لگیاں۔ 19اُوں جوان فوراً اُوندے اُتے عمل کیتا، کیوں جو او دِینہ کُوں بہُوں پسند کریندا ہا۔ سِکم آپنڑے خاندان ءچ سبھ تُوں عزت آلا ہا۔ 20حمُور آپنڑے پوتر سِکم نال شہر دے پھاٹک1 تے گِیا تے اُتھاں اُوں باقی لوکاں نال ایہ گالھ کیتی، 21”ایہ لوک ساڈے نال بِھڑن آلے نئیں۔ اِیں کیتے کیوں نہ او اِیں مُلک ءچ ساڈے نال راہوݨ تے ساڈے نال تجارت کرݨ۔ ساڈے مُلک ءچ اِنہاں کیتے وی بہُوں جاہ ہے۔ آؤ اساں اُنہاں دیاں دِھیاں پوتراں نال پرنیجوں۔ 22پر ایہ بندے صرف اِیں شرط تے ساڈے ءچ راہوݨ تے ہِکو قوم بنڑن کیتے تیار ہِن جے اساں اِنہاں آلی کار آپنڑے یکے چھوہراں تے مرداں دا ختنہ کرواؤں۔ 23جے اساں اِینویں کرُوں تاں اِنہاں دے سارے ڈھورڈنگر تے سارا مال ساڈا تھی ویسی۔ اِیں واسطے آؤ اساں اُنہاں دی گالھ مَن گِھنوں تاں او ساڈے ءچ راہسن۔“

24شہر دے لوک حمُور تے سِکم دے مشورے اُتے راضی تھی گئے۔ تے شہر دے سبھ مرداں دا ختنہ کرایا گِیا۔ 25ترے ڈینہاں بعد جِیں ویلے ختنے پارُوں لوکاں دی حالت بُری ہئی تاں دِینہ دے ڈُو بِھرا شمعون تے لاوی آپنڑیاں تلواراں گِھن تے اچانک شہر ءچ وڑ گئے۔ اندر وَنج تے اُنہاں سارے مرداں کُوں قتل کر ڈِتا، 26جِنہاں ءچ حمُور تے اُوندا پوتر سِکم وی شامل ہَن۔ وَل او دِینہ کُوں سِکم دے گھرُوں گِھن تے چلے گئے۔

27اِیں قتل ِ عام دے بعد یعقُوب دے باقی پوتر پُجے۔ اُنہاں سبھ مرداں کُوں قتل تھئے ہوئے ڈیکھ تے شہر کُوں لُٹ گِھدا کیوں جو اُتھاں اُنہاں دی بھینڑ دی عزت لُٹی گئی ہئی۔ 28او بھیڈ بکریاں، ڈاند گائیں، کھوتے تے جیہڑا کُجھ شہر ءچ تے کھیت ءچ ہا، گِھن تے ٹُر پئے۔ 29اُنہاں سارے مال اُتے قبضہ کر گِھدا، عورتاں تے بالاں کُوں قیدی بنڑا گِھدا تے سارے گھراں دا سامان وی گِھن گئے۔

30وَل یعقُوب شمعون تے لاوی کُوں آکھیا، ”تُساں میکُوں مُصیبت ءچ پا ڈِتے۔ ہُنڑ مُلک دے سبھ لوک یعنی کنعانی تے فرِزّی میڈے تُوں نفرت کریسن۔ میڈے کولھ بندے گھٹ ہِن۔ جے ڈُوجھے رَل تے میڈے اُتے حملہ کرݨ تاں میکُوں تے میڈے پُورے خاندان کُوں تباہ کر ڈیسن۔“

31پر اُنہاں آکھیا، ”کیا ایہ ٹھیک ہے جو اُوں ساڈی بھینڑ نال طوائف جِیہا سلوک کیتے۔“